Judges 21

Guarani 2015 (Ñanderuete Ñe’ẽ Porã 2015)

← Chapter 20 Jump to:

1Umi ambue 11 Israel tríbu oñembyatyva’ekue Mizpápe he’i nome’ẽiva’erãha itajyrakuéra Bejaminguakuérape hembirekokuerarã ramo.

2Ha pe ñorãirõ rire umi 11 Israel tríbu oñembyaty jevy Ñanderuete róga ypýpe, jahe’o ha sapukaipópe he’i hikuái:

3Ore Ruete, Israel Jára, mba’érehe piko ojehukuaa ko’ã mba’e Israélpe, opa peve peteĩ Israel tríbu.

4Ha uperiregua ko’ẽme Israelguakuéra opu’ã pyhareve ha omopu’ã upépe peteĩ kuave’ẽmby renda oikuave’ẽ hag̃ua hi’ári kuave’ẽmby ojehapypáva ha kuave’ẽmby py’aguapy reheguáva.

5Ha umi Israel ñemoñare he’i: Mávapa Israel tribukuéragui ndojupirira’e pe atyguasúpe jajapova’ekue Mizpápe, Ñanderuete renondépe. He’ígui hikuái umi ojupi’ỹva Ñanderuete rendápe, Mizpápe, omanova’erãha.

6Ha Israelguakuéra oñembyasy pe ojehuva’ekue rehe Benjamin, ipehẽnguekuéra apytépe, ha he’i hikuái: Oñekytĩ peteĩ tríbu Israel retãgui ko ára kóvape.

7Mba’épa jajapóta ikatu hag̃uáicha umi hembýva oñemohembireko jevy. Ñande ñañe’ẽme’ẽma Ñanderuetépe nañame’ẽmo’ãiha ichupekuéra ñande rajykuéra hembirekokuerarã ramo.

8Ha he’i hikuái: Oĩpa Israel tríbu apytégui umi ou’ỹva Ñanderuete rendápe Mizpápe. Ha ojohu umi Jabes-galaadgua ndoúi hague pe ñembyatyha rendápe, ijatyguasúpe.

9Ojepapávo umi tetãygua ndojejohúi kuimba’e Jabes-galaadgua ijapytépe.

10Upéramo umi oñembyatýva omondo 12.000 kuimba’e, ipy’aguasuvévape oĩva ijapytégui, ha he’i ichupekuéra: Tapeho ha pejuka kyse puku hãimbépe umi Jabes-galaadguápe, kuña ha mitãkuéra reheve.

11Pejukapa mayma kuimba’épe ha umi kuñáme, oikomava’ekue guive kuimba’e ndive.

12Ha ojohúnte umi Jabes-galaadgua apytépe 400 kuñataĩ oiko’ỹva gueteri kuimba’e ndive ha ogueru ichupekuéra Sílo atyguasuha rendápe, opytáva Canaan yvýpe.

13Umi 11 Israel tríbu he’iuka umi Benjamin ñemoñare opytava’ekuépe gueteri Rimon itaguasu rendápe ou hag̃ua avei ijatyguasúpe oñembopy’apeteĩ jevy hag̃ua.

14Ha ou jevy umi Benjamingua, ha oñeme’ẽ ichupekuéra umi Jabes-galaad pegua kuñataĩkuérape, hembirekorã ramo, ha ndohupitypái katu ichupekuéra.

15Ha opaite Israelguakuéra oiporiahuvereko Benjamínpe, Ñanderuete ohejágui oñehundipamo’ã peteĩ tríbu Israel retã apytégui.

16Upémaramo umi karai anciáno he’i: Mba’épa jajapóta umi hembýva ha hembireko’ỹvagui, ojejukapágui Benjamin pegua kuñakuérape.

17Ha he’i hikuái: Benjamingua hembýva topyta ijyvyteépe ani hag̃ua oñehundiete peteĩ Israel tríbu.

18Ha ñande ndaikatúi ñame’ẽ ichupekuéra ñande rajykuéra hembirekorã ramo, umi Israelguakuéra ome’ẽgui iñe’ẽ, he’ívo: Toñemaldeci upe ome’ẽva itajýra hembirekorã ramo Benjamin ñemoñarenguérape.

19Ha he’i hikuái, péina ápe meme áño oiko areteguasu Ñanderuetépe g̃uarã Sílope, opytáva Betélgui nórtepe, ha kuarahyresẽ gotýo pe tapégui ohóva Betélgui Siquémpe, ha Lebonágui sur gotýo.

20Ha he’i hikuái Benjamin ñemoñarenguérape: Tapeho ha pemoĩ ñuhã umi parralty rupi.

21Ha peñangareko porãke, ha pehechávo Sílo pegua kuñataĩkuéra osẽva jeroky atyhápe, pesẽ umi parraltýgui, ha peguerokañy peteĩteĩva pene rembirekorã umi Silogua rajykuéragui, ha tapeho joaite Benjamin yvýpe.

22Ha ou ramo ituvakuéra térã ityke’yrakuéra omba’ejerurévo oréve, ore ro’éta ichupekuéra: Pejapóna oréve mba’eporã ha peme’ẽ oréve, pe ñorãirõháme ningo ore ndorojapyhýikuri kuñakuéra maymaitépe g̃uarã; ha hi’ári napeẽi peme’ẽva’ekue pende rajykuéra Benjaminguakuérape, upévare peẽ napeñemoangaipái.

23Ha umi Benjamingua hembýva ojapo péicha; ha ogueraha hikuái kuñataĩkuéra oikotevẽ háicha, oguerokañývo umi ojerokýva apytégui; ha oho jevy hikuái ijyvyteépe, omyatyrõ pyahu jevy hag̃ua umi táva ojehapyva’ekue ha oiko hikuái ipype.

24Upéramo Israelguakuéra ohopa avei, peteĩteĩ itríbu yvyteépe, ha hogateépe.

25Umi árape ndaipóri gueteri tetã ruvicha Israélpe; peteĩteĩ ojapo iporãve háicha ichupekuéra.

← Chapter 20 Jump to: