Judges 11

Guarani 2015 (Ñanderuete Ñe’ẽ Porã 2015)

← Chapter 10 Jump to: Chapter 12 →

1Jefte, peteĩ Galaadgua ipy’aguasúva; isy katu peteĩ kuña reko vaíva, ha Jefte ru peteĩ Galaadgua.

2Ha Jefte ru rembirekoteéva, uperire imemby avei, ha imembykuéra ituichapa rire omosẽ Jeftépe, he’ívo ichupe hikuái: Noñeme’ẽmo’ãi ndéve mba’eve ore ru mba’éva apytégui nde ha’égui ambue kuña memby.

3Ha Jefte okañy ipehẽnguekuéragui, ha oho oiko hag̃ua Tob retã rupi ha oñembyaty hese kuimba’ekuéra hembiapo porã’ỹva, ha umíva oiko oguatávo hendive upérupi.

4Ha ohasa ohóvo umi ára, umi Amon ñemoñare ou ojeity hag̃ua Israel ári.

5Upémaramo, umi Galaadgua ruvichakuéra oho Jefte rendápe, Tob retãme,

6ha he’i hikuái ichupe: Eju, eiko hag̃ua oréve mburuvicha ramo ñañorãirõ hag̃ua Amon ñemoñarenguéra ndive.

7Jefte katu he’i ichupekuéra: Ndapejahéi piko raka’e peẽ cherehe, ha pechemosẽva’ekue che ru rógagui. Mba’érehe piko ko’ág̃a pejejopy vaíma ramo peju che rendápe.

8Ha umi Galaad ruvicha he’i Jeftépe: Upévare roju ne rendápe, nde reho hag̃ua orendive ñañorãirõvo Amon ñemoñare ndive, ha reiko hag̃ua Galaad ruvicha ramo.

9Upérõ Jefte he’i Galaad ruvichakuérape: Pechereraha ramo penendive ajeity hag̃ua Amon ñemoñarenguéra ári, ha Ñanderuete omoĩ ramo ichupekuéra che pópe aikótapa añetehápe pende ruvicha ramo.

10Ha Galaadgua ruvichakuéra he’i jevy Jeftépe: Ñanderuete toĩ techahare ramo ñande apytépe, ndorojapói ramog̃uarã nde ere háicha.

11Upéramo Jefte ou Galaadgua ruvichakuéra ndive, ha umi tavaygua omoĩ Jeftépe imburuvicha ramo; ha Jefte he’i jevy opaite ñe’ẽ Ñanderuete renondépe Mizpápe, oñembyatyhápe ambue hetãyguakuéra.

12Ha Jefte omondo ñe’ẽrerahahára Amongua retã ruvicha rendápe, ha he’iuka ichupe: Mba’éiko nde rereko chendive, reju hag̃ua reñorãirõ che retãme.

13Ha Amon retã ruvicha he’iuka jevy Jeftépe: Israel oñemomba’égui che retã yvy rehe, osẽ ramoguare Egíptogui, pe Arnon y guive Jaboc ha Jordan y peve; ko’ág̃a eme’ẽ jevýna oréve ñañorãirõ’ỹre umi ore mba’e guive.

14Ha Jefte omondo jevy ambue ñe’ẽrerahahára Amon retã ruvicha rendápe,

15ha he’iuka ichupe: Israel ndojapyhýiri Moab yvy, ha ndojapyhýiri avei Amon ñemoñarenguéra yvy.

16Israel osẽ ramoguare Egíptogui, oikókuri pe desiérto rehe, ohasa Yguasu Pytã rupi og̃uahẽ meve Cadéspe.

17Upéramo Israel omondo ñe’ẽrerahahára Edom retã ruvicha rendápe, ha he’i: Che ajerure ndéve ahasa hag̃ua ne retã rupi; ha Edom retã ruvicha katu nohendúikuri avei ichupe. Israel omondo avei ñe’ẽrerahahára Moab retã ruvicha rendápe, ha ha’e ndoipotái avei, upémaramo Israel opyta Cadéspe.

18Upégui osẽ oho desiérto rupi, ojerévo Edom ha Moab retãgui, og̃uahẽ meve Moab retã rembe’ýpe kuarahy resẽ gotýo, ha opyta Arnon ysyry mboypýri, ha ndoikéi Moab retãme; pe Arnon ningo Moab yvýnte avei.

19Upégui Israel omondo ñe’ẽrerahahára Amor retã ruvicha Sehon rendápe, oikóva Hesbónpe, he’ívo ichupe: Ajerure ndéve reheja hag̃ua ahasa ne retã rupi ag̃uahẽ meve che rendag̃uáme.

20Ha Sehon katu ndojeroviapáikuri Israel rehe, ha ndohejái ichupekuéra ohasa hetã rupi, Sehon ombyaty uvei mayma hetãyguakuérape Jaházpe ojeity hag̃ua Israel ári.

21Ñanderuete, Israel Jára, katu oity Sehon ha mayma hetãyguápe Israel poguýpe, ha sarambi ojapo ichuguikuéra; ha Israel oñemomba’epaite Amorgua yvy rehe.

22Oñemomba’e Amorgua yvy rehe Arnon guive Jaboc peve, ha pe desiérto guive Jordan ysyry peve.

23Ha Ñanderuete, Israel Jára, oipe’a rire Amorgua yvy ome’ẽ hag̃ua hetã Israélpe, nde piko ko’ág̃a reñemomba’e jevyse hese.

24Opaite yvy Quemos, nde jára, ome’ẽva ndéve nde reñemomba’ekuaapa hese; ha opaite yvy Ñanderuete, ore Jára, oipe’ava’ekue ambuekuéragui ome’ẽ hag̃ua oréve, péva ore mba’etee.

25Ndépa ndekatupyryve Balac, Zipor ra’y, Moab retã ruvichágui, ha’e omaldeciukasénte Israelguakuérape, noñorãirõséi katu ijyvy rehe.

26Israelguakuéra oikóma ko’ág̃a 300 áño pukukue Hesbon ha itava’ikuérape, Aroérpe ha itava’ikuérape, ha opaite táva oĩva Arnon yvýpe, mba’éguipa napeñemomba’éi jevyraka’e hese umi áño pukukue rupi,

27upévagui che nañemoangaipái nendive, nde katu rejapo vai reñorãirõségui chendive. Ñande Ruete, toiko mbojovakehára ramo Israel ha Amon ñemoñarenguéra pa’ũme.

28Ha Amon ñemoñare retã ruvicha ndojapysakái iñe’ẽ añetegua rehe, Jefte he’iukava’ekue ichupe.

29Ha Ñanderuete Pytu Porãitéva ou Jefte ári; ha’e ohasa Galaad ha Manases yvy rupi, ha og̃uahẽ Mizpa, Galaad peguápe, ha upégui ohasa Amon ñemoñarenguéra rendápe.

30Ha Jefte ome’ẽ iñe’ẽ Ñanderuetépe, ha he’i: Remoĩ ramo Amonguakuéra che poguýpe,

31oimeraẽva osẽva tenondéve che róga rokẽgui chejohu hag̃ua, ambopoguy rire orerehe ija’e’ỹvape, péva Ñanderuete mba’erã, ha aikuave’ẽta ichupe kuave’ẽmby renda ári.

32Ha Jefte oho umi Amon ñemoñare oĩha gotýo ojeity hag̃ua hi’arikuéra; ha Ñanderuete omoĩ ichupekuéra Jefte pópe.

33Jefte ombopoguy ichupekuéra Aroer guive Minit og̃uahẽmbota peve, 20 táva, pe tape parralty pegua peve. Péicha umi Amongua opyta Israel ñemoñarenguéra poguýpe.

34Upéi Jefte ou jevývo hógape oĩva Mizpápe; péina ápe itajýra osẽ omaitei hag̃ua ichupe, mba’e pararã reheve ha jerokypópe, ha’e itajýra ha’eñomínte, Jefte ndaita’ýrai ambue.

35Ha Jefte ohechávo ichupe omondoro ijaokuéra, ha he’i ichupe: Ái, ái, nde che rajymi, añetehápe nde chembopy’atarova, ha nde reju reiko chéve che py’a remimbyasyrã; ame’ẽgui che ñe’ẽ Ñanderuetépe, ha ndaikatumo’ãigui apyrũ che ñe’ẽngue rehe.

36Upémaramo ha’e ombohovái itúvape: Nde, che ru, reme’ẽgui ne ñe’ẽ Ñanderuetépe, ejapo chehegui reñe’ẽme’ẽ haguéicha, Ñanderuete ombopoguy haguére nderehe ija’e’ỹvape, Amon ñemoñarenguérape.

37Ha he’i jevy itúvape, kóa ajerurénte ndéve: Chereja taha umi cérro rehe, ha tarojahe’o che irũnguéra (kuñataĩkuéra ndive), mokõi jasy pukukue, ndaikatumo’ãigui che chememby.

38Jefte upémaramo he’i: Tereho. Ha oheja ichupe mokõi jasy pukukue, ha itajýra oho iñirũnguéra ndive, ha oguerojahe’o umi cérro rehe, ndaikatumo’ãigui imemby.

39Ohasa rire mokõi jasy ou jevy itúva rendápe, ha ha’e oikuave’ẽ ichupe ome’ẽ haguéicha iñe’ẽ. Ha pe kuñataĩ araka’eve ndoikoiva’ekue kuimba’e ndive.

40Upévare meme áño Israel kuñataĩkuéra, pe ára péva guive, ojepokuaa irundy ára pukukue oho hasẽ ha oguerombyasy hag̃ua Jefte rajýre.

← Chapter 10 Jump to: Chapter 12 →