Judges 7

Guarani 2015 (Ñanderuete Ñe’ẽ Porã 2015)

← Chapter 6 Jump to: Chapter 8 →

1Ha Jerobaal, péva hína Gedeon, opu’ã pyhareve ha mayma hetãygua oĩva guive hendive, oñembyaty hag̃ua hikuái Harod yvu ypýpe; ha umi Madiaygua aty oñembyaty yvate gotyove ichuguikuéra, More cérro ykére, peteĩ yvypépe.

2Ha Ñanderuete he’i Gedeónpe: Umi tetãygua nendive oĩva hetaitereíma, Che amoĩ hag̃ua Madiayguakuéra pende pópe, ani hag̃ua Israelguakuéra oñemomba’eguasuve chehegui, he’ívo: Ore pu’aka rupi rombopoguy ichupekuéra.

3Ko’ág̃a eguerosapukái tetãyguakuéra apysápe, erévo: Oime ramo okyhyjéva ha ipy’a ryrýiva, toñemboyke ha tojevy Galaad cérro guive. Ha 22.000 kuimba’e ojevy tetã apytégui, ha hemby 10.000-nte.

4Ha Ñanderuete he’i Gedeónpe: Ne retãyguakuéra hetaiterei gueteri; egueraha y oĩháme, ha upépe Che aiporavóta ha ahechaukáta ndéve mávapa ohóta nendive ha mávapa opytáta.

5Upéramo Gedeon ogueraha hetãyguakuérape y oĩháme ha Ñanderuete he’i ichupe: Oimeraẽ oheréiva pe y ikũme ku jagua oheréi háicha, umívape emboyke; ha upéicha avei upe oñesũva hoy’u hag̃ua.

6Ha oĩkuri 300 kuimba’e ohupíva pe y ipópe ijurúpe oheréi hag̃ua, ha ambue kuimba’ekuérape oñesũhápe hoy’u.

7Upéramo Ñanderuete he’i Gedeónpe: Ko’ã 300 kuimba’e ndive oheréiva’ekue pe y ipópe, Che posalváta, ha katuete amoĩta umi Madiayguápe nde pópe; ha ambuekuéra tohopa jevy hóga hymba pirekueguiguápe.

8Ha umi 300 kuimba’e ojapyhy hembi’urã ha iturukuéra, ambue Israelguakuéra katu oñemondopa jevy hóga hymba pirekueguiguápe, Gedeon ndive katu opytante umi 300 kuimba’e, ha umi Madiaygua oñembyaty yvypépe; ha Gedeon ha umi 300 kuimba’e opyta pe cérro pévape.

9Ha ojehu pe pyharépe, Ñanderuete he’i Gedeónpe: Epu’ã ha eguejy Madiayguakuéra rekohápe; Che amoĩma ichupekuéra nde pópe.

10Ha rekyhyje ramo nde reguejy hag̃ua ne añónte eraha Fura, ne remimongakuaa nendive hendapekuéra,

11ha ejapysaka pe rehendútava rehe; ha upéi nde po oñemombaretéta, ha kyre’ỹme pejeitýta hi’arikuéra. Ha Gedeon oguejy Fura, hemimongakuaa ndive, Madiaygua soldádo aty rembe’y peve iguárdia oĩháme.

12Ha umi Madiaygua, Amalecgua ha umi kuarahyresẽ gotyogua ñemoñarenguéra ojepyso joa pe yvypépe tukúicha, hetaitereígui, ha ikamellokuéra ndaikatúi ojepapa, hetaitereígui ku yvyku’i yguasu rembe’y peguáicha.

13Ha Gedeon og̃uahẽvo, ohendu peteĩ kuimba’e omombe’uhína iñirũme peteĩ ike peguare, he’ívo: Péina ápe che ahecha peteĩ che ke pegua: Ahecha peteĩ pan cebáda (ojogua trígope) ojapajeréi oúva Madian atyha rendápe, ha og̃uahẽvo hóga hymba pirekueguigua peteĩha rendápe oñembota hese, ha oity pe óga hymba pirekueguiguáva, omongu’epávo.

14Ha iñirũ he’i ichupe: Péva hína Gedeon, Joas ra’y, Israelgua kyse puku, Ijára omoĩta opaite Madiayguakuéra hekoha reheve Gedeon pópe.

15Gedeon ohendu vove ike peguare oñemombe’úva ha mba’épa he’ise, omomba’eguasu Ñanderuetépe; ha oho jevývo Israel atyha rendápe he’i: Pepu’ãmba, Ñanderuete omoĩmagui Madian rekoha ñande pópe.

16Ha omboja’o umi 300 kuimba’e mbohapy atýpe, ha peteĩteĩvape ome’ẽ peteĩ turu ipópe ha peteĩ kambuchi nandíva tata’y hendýva reheve hyepýpe.

17Ha he’i ichupekuéra: Pema’ẽ cherehe, ha pejapopa che ajapótava; ha ág̃a che ag̃uahẽvo ijatyha renda akãme, pejapopa che ajapo háicha.

18Che ambopu ramo pe turu, ha chendive oĩva avei; peẽ pembopúta avei pende turukuéra ijatyha renda jerekuévo ha pesapukáita: Ñanderuete ha Gedeon rehehápe.

19Ha og̃uahẽmbotávo hekoha rembe’ýpe Gedeon ha umi 100 kuimba’e hendive oĩva pyhare pytépema, ha oñemoambue jave iguárdia pyahu, ha’ekuéra ombopu ituru, ha ojoka ikambuchikuéra ogueraháva ipópe.

20Ha umi ambue mokõi aty ombopu avei iturukuéra, ha ojoka avei ikambuchikuéra, ojapyhy hikuái ijasúpe tata’y hendýva ha ijakatúape pe turu ombopu hag̃ua, ha osapukái joa hikuái he’ívo: Ñanderuete ha Gedeon kyse puku rehehápe.

21Ha peteĩteĩva Israel soldadokuéra opyta ñembo’yhápe Madian pe atyha renda jerekue rehe; ha upévo mayma Madian soldadokuéra oñani ha osapukái vaipa ha okañy hikuái.

22Ha umi 300 kuimba’e ombopu joa iturukuéra; ha Ñanderuete omopu’ãuka peteĩteĩva kyse puku iñirũ rehe pe atyha renda tuichakuépe. Ha umi soldádo okañy Betsita peve, Zeréra gotýo; ha ambuekuéra Abelmehola, Tabat gotýo, oĩva Jordan rembe’ýpe.

23Upémaramo Gedeon ohenoiuka umi ambue Israelgua ohejava’ekue icampaméntope, Neftali, Aser ha Manases kuimba’ekuéra, omuña pya’e hag̃ua avei Madiayguakuérape.

24Gedeon omondo avei ñe’ẽrerahahára umi Efrain cérro rehe, he’ívo: Pejepoi Madiayguakuéra rug̃uaitĩvo, ha peñemoĩ Betbara ha Jordan ojehasahápe Madiayguakuéra og̃uahẽ mboyve. Ha oñondivepa mayma Efraingua, oñemohenda Betbara peve, ani hag̃ua hese ija’e’ỹva ohasa Jordan páso rupi.

25Ha oapresa hikuái mokõi Madiaygua ruvichápe, Oreb (he’iséva yryvu) ha Zeeb (aguaraguasu); Ha ojuka hikuái Orébpe, pe itaguasu ári, oñembohéra Oreb, ha Zeébpe ojuka hikuái pe parral’a ojehykue’ohápe, oñembohéra aguaraguasu; ha omuñave rire Madiayguakuérape ogueru hikuái Oreb ha Zeeb akãngue Gedeónpe, ha’e opytákuri pe Jordan mboypýri.

← Chapter 6 Jump to: Chapter 8 →