Judges 13

Guarani 2015 (Ñanderuete Ñe’ẽ Porã 2015)

← Chapter 12 Jump to: Chapter 14 →

1Israel ñemoñarenguéra hembiapo vai jevy Ñanderuete resa renondépe. Ha Ñanderuete omoĩ ichupekuéra Filisteayguakuéra pópe 40 áño pukukue.

2Ha umi ára umívape oiko peteĩ kuimba’e Zoraygua, Dan tríbu reheguáva, herava’ekue Manóa; ha hembireko ndaikatúi imemby.

3Ñanderuete yvága rembiguái ojehechauka ko kuñakaraípe ha he’i ichupe: Péina nde, ndaikatúiva nememby, nderyeguasúta ha nemembýta peteĩ mitãkuimba’e.

4Ág̃a, ani re’útei víno térã ambue mba’e nemonga’ukuaáva, ha ani re’útei umi mba’e ojererekóva mba’e ipotĩ’ỹva ramo.

5Eikuaa porãke, nde nderyeguasúta ha nemembýta peteĩ mitãkuimba’e, ani reikytĩ iñakãrague, pe mitãkuimba’e péva ningo Nazareorã, ha’e oñemboykéta Ñanderuetépe g̃uarã ha ha’e oñepyrũta osalva Israélpe Filisteayguakuéra poguýgui.

6Ha pe kuña omombe’upa iménape, he’ívo: Peteĩ kuimba’e ou che rendápe, ojoguaiterei peteĩ yvága rembiguáipe, ñanemongyhyje reheguáva; ha naporandúi ichupe mamoguápa ni mávapa ha’e, ha nde’íri chéve héra.

7Ha’e he’i chéve: Péina ápe nde nderyeguasúta ha nemembýta peteĩ mitãkuimba’e; upévare ko’ág̃a anive re’u víno térã ambue mba’e nemonga’ukuaáva, ha ani re’u mba’e ojererekóva mba’e ipotĩ’ỹva ramo, ko mitãkuimba’e kóva ningo Nazareorã, oñemboykétava Ñanderuetépe g̃uarã onace guive omanoha ára peve.

8Upéramo Manóa oñembo’e Ñanderuetépe, ha he’i: Che Jára, ajerure ndéve pe kuimba’e rembouva’ekue rehe, tou jevy ko’ág̃a ore rendápe, ha taorembo’e mba’épa rojapova’erã pe mitãre, oútava ko yvy apére.

9Ha Ñanderuete ohendu Manóa ñe’ẽ, ha ijyvága rembiguái ou jevy pe kuñakarai rendápe, ha’e oĩ jave ñúme; ha upépe iména Manóa noĩri hendive.

10Ha pe kuña pya’e oho ohenóivo iménape, ha he’i ichupe: Oime ojehechauka jevýma chéve pe kuimba’e ouva’ekue ko kuehe ára che rendápe.

11Ha opu’ã Manóa ha oho hembireko rapykuéri, ha ou pe kuimba’e rendápe ha he’i ichupe: Nde piko pe kuimba’e oñe’ẽva’ekue ko kuñakaraípe. Ha ha’e he’i: Che ha’e.

12Upéramo Manóa he’i: Ág̃a oiko vove pe nde eréva, mba’éichapa pe mitãkuimba’e oikova’erã, ha mba’épa ore rojapova’erã hese.

13Ha pe yvága rembiguái he’i jevy Manóape: Ne rembireko oñangarekova’erã ijehe ojapopa hag̃ua che ha’emava’ekue guive ichupe.

14Ndo’uiva’erã mba’eve ojejapóva guive parral’águi, ndo’uiva’erã víno térã ambue mba’e oporomonga’úva ha ndo’uiva’erã mba’e ojererekóva ipotĩ’ỹva ramo, ha opaite mba’e che ha’éva guive katuete ojapova’erã.

15Upérõ Manóa he’i yvága rembiguáipe: Ajerure ndéve orera’ãrõmi hag̃ua ambosako’i peve ndéve peteĩ kavarara’y.

16Ha Ñanderuete yvága rembiguái he’i jevy Manóape: Apyta ramojepe nda’umo’ãi ne pan; ha rejapose ramo kuave’ẽmby eikuave’ẽ katu péva Ñanderuetépe. Ha Manóa ndoikuaái gueteri péva Ñanderuete yvága rembiguaiha.

17Upérõ Manóa he’i pe yvága rembiguáipe: Mba’éicha piko nde réra, ikatu hag̃uáicha romomba’e ág̃a ojehúvo ne ñe’ẽ.

18Ha pe yvága rembiguái he’i jevy: Mba’upépa reporandu che réra rehe, che réra ningo mba’eguasu ha oñemíva.

19Ha Manóa ogueru peteĩ kavarara’y ha pe kuave’ẽmby tembi’u reheguáva oikuave’ẽ hag̃ua peteĩ ita ári Ñanderuetépe g̃uarã; ha pe yvága rembiguái ojapo peteĩ milágro Manóa ha hembireko resa renondépe.

20Péicha ojehu: Pe kuave’ẽmby rendágui opu’ã sapy’a tata rendy yvága gotýo, ha pe yvága rembiguái ojupi pe kuave’ẽmby rata rendy apyte rupi Manóa ha hembireko resa renondépe, ha’ekuéra ohechávo péva ojeity yvýpe.

21Ha pe yvága rembiguái ndojehechaukavéi Manóape ni hembirekópe; upévo Manóa oikuaáma ohecha hague Ñanderuete yvága rembiguaietépe.

22Ha he’i hembirekópe: Katuete ñamanóta, jahechágui Ñanderuetépe.

23Ha hembireko he’i jevy ichupe: Ñanderuete ñandejukase rire ndohechakuaava’erãmo’ãi ko kuave’ẽmby ojehapypapyréva ñande pógui ha ndohechaukava’erãmo’ãi ñandéve opaite ko’ã mba’e, ha nde’iva’erãmo’ãi ñandéve ko’ã mba’e.

24Ha pe kuña imemby peteĩ mitãkuimba’e, ha ombohéra ichupe Sanson. Ha pe mitã okakuaa, ha Ñanderuete ohovasa ichupe.

25Ha Ñanderuete Pytu Porãitéva oñepyrũ oiko hag̃ua ipype Dan atyguasúpe, oĩva Zora ha Estaol pa’ũme.

← Chapter 12 Jump to: Chapter 14 →