Judges 17

Guarani 2015 (Ñanderuete Ñe’ẽ Porã 2015)

← Chapter 16 Jump to: Chapter 18 →

1Oikomiva’ekue peteĩ kuimba’e Efrain cérro rehe, hérava Mica,

2ha péva he’i isýpe: Che ahendu nde remaldeci ramoguare pe omondava’ekuépe nde 12,28 kílo pláta (óro morotĩ), che voi amondava’ekue, ha oĩmba gueteri che pópe. Upéramo isy he’i: Ñanderuete tanderovasa che memby.

3Ha ome’ẽ jevy umi 12,28 kílo pláta (óro morotĩ) isýpe; ha isy he’i: Añetehápe ame’ẽma ko pirapire Ñanderuetépe, che memby rehehápe, ajapouka hag̃ua peteĩ ta’ãnga yvyraguigua ha peteĩ pláta mbohykupyreguiguáva.

4Ha ha’e ome’ẽ rire pe pláta isýpe, isy ogueraha 2,23 kílo pláta ome’ẽ hag̃ua pe ombohykukuaávape, ha péva ojapo ichupe g̃uarã peteĩ ta’ãnga yvyraguigua ha peteĩ pláta mbohykupyreguiguáva, ha omohenda Mica rógape.

5Ko kuimba’e Mica oguereko voi ijára gua’u róga ha ojapouka avei peteĩ póncho mbyky (pa’ípe g̃uarã) ha ojapouka ambue jára ra’ãngakuéra ha omona (oiporavo) peteĩ ita’ýrape oiko hag̃ua pa’i ramo.

6Umi árape ndaipóri gueteri tetã ruvicha Israélpe; peteĩteĩva ojapo iporãve háicha ijupe g̃uarã.

7Ha oiko Mica rógape peteĩ mitãrusu Belengua Juda departaméntope; ha’e Levigua ha oiko upépe mbohupa ramo.

8Ko kuimba’e kóva osẽ Belen, Juda pegua távagui, oheka hag̃ua hendag̃ua, upéicha og̃uahẽ Efrain cérrope, Mica rógape.

9Ha Mica he’i ichupe: Mamóguipa reju. Ha pe Levigua he’i ichupe: Che peteĩ Levigua ha aju Belen, Juda peguágui, aiko hag̃ua mamo ajohuhápe che rendag̃ua.

10Upéramo Mica he’i ichupe: Epyta che rógape, ha reikóta chéve g̃uarã túva ha pa’i ramo; ha che ame’ẽta ndéve 111,7 grámo pláta akói áñope, ao ha tembi’u, ha péicha pe Levigua opyta hógape.

11Pe Levigua ovy’a Mica ndive, ha oiko ichupe g̃uarã peteĩ ita’ýra ramoguáicha.

12Ha Mica omona acéitepe pe Leviguáre, ha ha’e oiko pa’i ramo Mica rógape.

13Ha Mica he’i: Ko’ág̃a aikuaa Ñanderuete chemoakãrapu’ãtaha, aguerekógui peteĩ Levigua pa’i ramo (che rógape).

← Chapter 16 Jump to: Chapter 18 →