Judges 18

Guarani 2015 (Ñanderuete Ñe’ẽ Porã 2015)

← Chapter 17 Jump to: Chapter 19 →

1Umi ára umívape ndaipóri gueteri tetã ruvicha Israélpe. Ha Dan tríbu oheka ijyvyrã oiko hag̃ua ipype, umi ára umívape ne’ĩra gueteri oguereko hendag̃ua teéva Israel ñemoñarenguéra apytépe.

2Ha Dan ñemoñarenguéra omondo itríbu apytégui 5 kuimba’e ipy’aguasúva. Táva Zora ha Estaólgui osẽ ohecha ha oikuaa porã hag̃ua ijyvyrã; ha oje’e ichupekuéra: Tapeho ha pehecha porã upe yvy. Ha ou hikuái Efrain cérrope, Mica rógape, ha upépe opyta hikuái.

3Ha og̃uahẽmbotávo hikuái Mica rógape, oikuaa pe mitãrusu iñe’ẽ rupi Leviguaha; ha og̃uahẽvo upépe, he’i ichupe hikuái: Máva piko ndeguerúra’e ko’ápe. Ha mba’épa rejapo ko’ápe. Ha mba’éiko nde reguereko ko’árupi.

4Ha ha’e he’i ichupekuéra: Péicha ha péicha ojapo Mica cherehe, ha ha’e cheporavo aiko hag̃ua ichupe pa’i ramo.

5Ha he’i hikuái ichupe: Eporandu ko’ág̃a Ñanderuetépe roikuaa hag̃ua rosẽ porãtapahína mamo rohosehápe.

6Ha pe pa’i he’i jevy ichupekuéra: Tapeho py’aguasu reheve Ñanderuete ohóta pene renonderãme.

7Upéramo umi 5 kuimba’e ou Laíspe; ha ohecha hikuái umi tavayguápe, oikoha py’aguapýpe ha kyhyje’ỹre, umi Sidongua oiko háicha, avave nomyangekõiri ichupekuéra mba’evépe, oguerekopa oikotevẽva rehe ha ndaipóri avave oñemomba’éva hetã rehe. Ha mombyry opyta Sidóngui, ha ndoikóiva mba’e ñemúme avave ndive.

8Ha’ekuéra ojevývo ipehẽnguekuéra rendápe, Zora ha Estaólpe oporandu ichupekuéra: Mba’épa pehecha, ha he’i hikuái ichupekuéra:

9Pepu’ãke, jaha pe yvy rohechava’ekuépe iporãitereiha; ha peẽ peiko reipára’e gueteri ko’ápe. Ani peneate’ỹtei peho ha peñemomba’e hag̃ua pe yvy rohecháva rehe.

10Ág̃a peho ramo peg̃uahẽta peteĩ táva, itavayguakuéra oiko kyhyje’ỹme, avave ndoipy’apýi ichupekuéra ha ijyvy ituicha ha iporã, ha Ñanderuete voi omoĩma pende pópe; pe yvy oñekotevẽ’ỹháme mba’eve, upépe oĩgui opaite mba’e oñekotevẽva guive.

11Upéramo osẽ Zora ha Estaólgui, 600 kuimba’e Dangua iñorãirõ rembiporu reheve ipópe.

12Ha’ekuéra oho Quiriatjearim, Juda pegua yvýpe, opytu’u hag̃ua, upévagui oñembohéra pe yvy péva ko ára peve Dan rekoha, ha opyta Quiriatjearímgui kuarahyreike gotýo.

13Ha upégui ohasa hikuái Efrain cérrope, ha og̃uahẽ Mica rógape.

14Upéramo umi 5 kuimba’e ohova’ekue Lais yvy rechávo he’i ipehẽnguekuérape: Ndapeikuaái piko ko ógape oĩha peteĩ póncho mbyky pa’ikuéra oiporúva (efod), jára gua’u ra’ãngakuéra, peteĩ ta’ãnga yvyraguigua ha peteĩ ta’ãnga mbohykupyreguiguáva. Pejepy’amongeta porãke, peikuaa hag̃ua mba’épa jajapóta.

15Ha og̃uahẽvo pe ógape, pe Levigua oĩháme, omomaitei ichupe.

16Umi 600 kuimba’e Dan pegua, oha’ãrõ jave iñorãirõ rembiporu reheve ikorapy rokẽme.

17Ha umi 5 kuimba’e raẽ ohova’ekue yvy rechávo, oike pe ógape ojapyhy hag̃ua pe ta’ãnga yvyraguiguáva, pe póncho pa’ikuéra oiporúva, umi jára gua’u ra’ãnga ha pe ta’ãnga mbohykupyreguiguáva, pe pa’i oĩ aja hína umi kuimba’e ndive, oguerekóva iñorãirõ rembiporu ipópe.

18Ha umi 5 kuimba’e, ojapyhy jave Mica rógape pe ta’ãnga yvyraguiguáva, pe poncho mbyky, umi jára gua’u ra’ãnga ha pe ta’ãnga mbohykupyreguiguáva, pe pa’i he’i ichupekuéra: Mba’éiko pejapo.

19Ha he’i hikuái ichupe: Ekirirĩ, emoĩ nde po nde jurúpe, ha eju orendive, reiko hag̃ua ore ru ha ore pa’i ramo. Mba’épa iporãve ndéve, reikóvo peteĩ kuimba’e añoite rógape, térãpa reikóvo pa’i ramo peteĩ Israel tríbupe g̃uarã.

20Ha pe Levigua ovy’aite ha ojapyhy pe póncho mbyky pa’ikuéra oiporúva, umi jára gua’u ra’ãnga ha pe ta’ãnga mbohykupyreguiguáva ha oho Danguakuéra ndive.

21Ha ojerévo oho hag̃uáicha, ogueraha gueteri hikuái imitãkuéra, hymbakuéra ha imba’eita ha omoĩmba ijatýra renondépe.

22Ha oñemomombyrýma ramo hikuái Mica rógagui, Mica ha hogayguakuéra oñembyaty ha oho hikuái Dan ñemoñarenguéra rapykuéri.

23Ha osapukáivo Danguakuérape, ojere oma’ẽ, ha he’i hikuái Micápe: Mba’éiko ojehu ndéve rembyaty hag̃ua nde rogayguakuérape.

24Ha ha’e he’i jevy: Peguerahágui che jarakuéra ajapoukava’ekue ha pe pa’ípe, ha mba’éiko hembyve ko’ág̃a chéve, ha mba’érehe piko peje gueteri chéve: Mba’éiko ojehu ndéve.

25Ha umi Dan ñemoñare he’i ichupe: Ani resapukái ore rapykuéri, ani ág̃a ore apytégui umi ipochyvéva oho peẽme ha pendejukapa hag̃ua mba’e hikuái.

26Ha umi Dan ñemoñare oho joa hapekuéra rehe, ha Mica ohechávo imbareteveha ichugui, ojere ha ou jevy hógape.

27Ha Danguakuéra ogueraha umi mba’e Mica ojapoukava’ekue, ha avei pe pa’i oikova’ekue hógape ha og̃uahẽ hikuái Laíspe, pe táva pévape opytu’u porãva ha py’aguapýpe oikóva; ha ojuka Laisguakuéra kyse puku hãimbépe ha ohapy hikuái itáva.

28Ha ndaipóri avave ikatúva oipytyvõ ichupekuéra oiko mombyrýgui hikuái Sidóngui, ha noñemúigui avave ndive. Ha pe táva opyta cerrokuéra pa’ũme, Betrehob ypýpe. Upéi Danguakuéra omyatyrõ jevy hikuái pe táva oiko hag̃ua ipype.

29Ha’ekuéra ombohéra pe táva Dan, itríbu ha Israel ra’y réraicha, kueheve ára herava’ekue Lais.

30Ha umi Dan ñemoñare omopu’ã pe jára ra’ãnga yvyraguiguáva; ha Jonatan (Mica pa’ikue), Gerson ra’y, Moises ra’yre, ha’e ha iñemoñarenguéra opyta pa’i ramo Dan tríbu apytépe, ojegueraha peve Danguakuéra jepokuapýpe ambue tetãme.

31Péicha oñemopu’ã ijapytepekuéra pe ta’ãnga yvyraguiguáva Mica ojapoukava’ekue, opaite ára Ñanderuete róga oĩ aja pukukue Sílope.

← Chapter 17 Jump to: Chapter 19 →