Esther 2

Hausa Arabic 2020 (أَتَّوْرَتْ دَ أَنَّبَاوَا)

← Chapter 1 Jump to: Chapter 3 →

1بَايَنْ وَطَنَّنْ أَبُبُوَنْ سَعَدَّ سَرْكِے أَهَسُرُسْ يَهُوثٜىٰ دَغَ ڢُشِنْسَ، سَيْ يَيِ تُنَانِ غَمٜىٰدَ بَشْتِ دَ إِرِنْ أَبِنْدَ تَيِ دَ كُمَ إِرِنْ دُواْكَرْ دَ عَكَيِ عَكَنْتَ؞

2سَيْ وَطَنْسُ مَاسُيِ وَسَرْكِے حِدِمَ نَكُسَدَشِ سُكَثٜىٰ «بَرِ أَ نٜىٰمِ وَ سَرْكِے ݣَوَوَنْ یَنْ مَاتَا، بُدُرْوَيْ؞

3بَرِ سَرْكِے يَذَاٻِ وَكِلَيْ عَكُواْوَنٜىٰ يَنْكِ نَڧَسَرْ دُواْمِنْ سُكَٰوُاْ دُكَنْ وَطَنَّنْ ݣَوَوَنْ یَنْ مَاتَا، بُدُرْوَيْ أَغِدَنْ دَ عَكٜىٰ أَجِيٜىٰ مَتَنْ سَرْكِے أَوُرِے مَيْ كَتَنْ‌غَ عَبِرْنِنْ شُوشَنْ؞ عَبَرْسُ أَ حَنُّنْ هٜىٰغَيْ، وَنْدَ يَكٜىٰ بَابَا نَسَرْكِے مَيْ كُلَ دَ مَتَنْ سَرْكِے، يَسَا سُسَامِ كَايَنْ ڠَرَنْ جِكِے؞

4سَعَنً بَرِ سَرْكِے يَذَاٻِ يَارِنْيَرْ دَ تَغَمْشٜىٰشِ تَذَمَ سَرَوْنِيَ أَمَيْمَكُوانْ بَشْتِ؞» سَرْكِے يَغَ شَوَرَرْ نَنْ تَيِمَسَ ݣَوْ، سَيْ يَبِتَ؞

5أَ نَنْ غِدَنْ سَرْكِے أَ شُوشَنْ أَݣَويْ وَنِ مُتُمِنْ يَهُودَ مَيْ سُونَ مُوارْدٜىٰكَيْ طَنْ يَايِرْ، جِيكَنْ شِمٜىٰيِ دَغَ غِدَنْ كِشْ، مُتُمِنْ ذُرِيَرْ بِلِيَامِنُ؞

6عِيَلِنْ مُوارْدٜىٰكَيْ سُنَ ثِكِنْ مُتَنٜىٰنْ دَ عَكَ ݣُوشٜىٰ دَغَ عُرُوشَلِيمَ سَعَدَّ سَرْكِے نٜىٰبُكَدْنٜىٰزَّرْ نَڧَسَرْ بَابِيلَ يَݣُوشٜىٰ سَرْكِے يٜىٰهُواْيَكِنْ نَڧَسَرْ يَهُودَ، ذُوَا بَوْتَا؞

7مُوارْدٜىٰكَيْ كُوَ يَنَدَ وَتَ ݣَكْݣَوَنْ یَرْ طَنْعُوَنْ بَابَنْسَ مَيْ ݣَنْ غَنِ، سُونَنْتَ هَدَسَّ، وَتُواْ عٜىٰسْتَا؞ سَعَدَّ إِيَايٜىٰنْتَ سُكَ مُتُ، سَيْ مُوارْدٜىٰكَيْ يَطَوْكٜىٰتَ كَمَرْ یَرْسَ؞

8سَعَدَّ عَكَيِ شٜىٰلَرْ عُمَرْنِ دَ دُواْكَرْ سَرْكِے، سَيْ عَكَ تَتَّارَ یَنْ مَاتَادَيَوَ أَ شُوشَنْ أَغِدَنْ سَرْكِے أَ حَنُّنْ هٜىٰغَيْ؞ عٜىٰسْتَا تَنَ ثِكِنْسُ، عِتَمَا عَكَ أَجِيٜىٰتَ أَغِدَنْ سَرْكِے، أَ حَنُّنْ هٜىٰغَيْ مَيْ لُورَ دَ غِدَنْ دَ عَكٜىٰ أَجِيٜىٰ مَتَنْ سَرْكِے؞

9عٜىٰسْتَا كُوَ تَا غَمْشِ هٜىٰغَيْ سُواْسَيْ، تَكُمَ سَامِ أَلْحٜىٰرِ دَغَ غَرٜىٰشِ؞ بَيْ ٻَاتَ لُواْكَثِ بَ، يَابَاتَ كَايَنْ ڠَرَنْ جِكِے دَ كُمَ عَبِنْثِنْ دَ عَكَ شِرْيَ مُسَمَّنْ دُواْمِنْتَ؞ هٜىٰغَيْ كُوَ يَبَاتَ وُرِے مَڢِے ݣَوْ عَثِكِنْ غِدَنْ دَ عَكٜىٰ أَجِيٜىٰ مَتَنْ سَرْكِے؞ يَكُوَسَا یَنْ مَاتَا بَݣَويْ وَطَنْدَ عَكَ ذَاٻَا دَغَ غِدَنْ سَرْكِے دُواْمِنْ سُيِ مَتَ حِدِمَ؞

10عٜىٰسْتَا بَتَ بَيَّنَ أَصَلِنْ مُتَنٜىٰنْتَ كُواْ دَنْ‌غِنْتَبَ، غَمَا مُوارْدٜىٰكَيْ يَا رِغَا يَا غَرْغَطٜىٰتَ كَدَ تَغَيَ وَ كُواْوَ؞

11كُواْوَثٜىٰ رَانَ مُوارْدٜىٰكَيْ يَكَنْ ذَاغَيَ أَ ڢِيلِنْ دَيَكٜىٰ أَغَبَنْ غِدَنْ دَ عَكٜىٰ أَجِيٜىٰ مَتَنْ سَرْكِے دُواْمِنْ يَسَنْ لَاڢِيَرْ عٜىٰسْتَا يَكُمَجِ أَبِنْدَ يَكٜىٰ ڢَرُوَ دَ عِتَ؞

12كَاڢِنْ عَكَيْ كُواْوَثٜىٰ يَارِنْيَ وُرِنْ سَرْكِے أَهَسُرُسْ، بِسَغَ ڧَٰعِدَ عَكَنْ طَوْكِ شٜىٰكَرَا غُدَا ثِڢْ أَنَڠَرَنْ جِكِنْتَ؞ عَكَنْ طَوْكِ وَتَا شِدَ أَنَ شَاڢَ مَتَ مَنْ مُرْ، أَطَوْكِ وَتَا شِدَ كُمَ أَنَ شَڢَامَتَ مَنْ ڧَنْشِ؞

13سَعَدَّ يَارِنْيَ ذَاتَ شِغَ وُرِنْ سَرْكِے، عَكَنْ بَاتَ دُكَنْ أَبِنْدَ تَكٜىٰسُواْ دَغَ ثِكِنْ غِدَنْ دَ عَكٜىٰ أَجِيٜىٰ مَتَنْ سَرْكِے تَرِڧٜىٰ ذُوَا ثِكِنْ غِدَنْ سَرْكِے؞

14ذَاتَتَڢِے غِدَنْ سَرْكِے دَ يَمَّ تَكُواْمَ دَ سَڢٜىٰ ذُوَا وَنِ غِدَنْ دَ عَكٜىٰ أَجِيٜىٰ مَتَنْ سَرْكِے، وَنْدَ يَكٜىٰ أَ حَنُّنْ شَعَشْغَظْ، بَابَا نَسَرْكِے، مَيْ لُورَ دَ یَنْ مَاتَانْدَ سَرْكِے يَكٜىٰ ݣُونَ دَسُو؞ بَذَاتَ سَاكٜىٰ ذُوَا وُرِنْ سَرْكِے بَ كُمَ، سَيْدَيْ كُواْ تَغَمْشٜىٰشِ سُواْسَيْ، شِے كُمَ يَكِرَتَ دَ سُونَنْتَ؞

15لُواْكَثِ يَيِ دَ عٜىٰسْتَا ذَاتَ شِغَ وُرِنْ سَرْكِے؞ وَنَّنْ عٜىٰسْتَا عِتَثٜىٰ یَرْ أَبِهَيِلْ طَنْعُوَنْ بَابَنْ مُوارْدٜىٰكَيْ، وَدَّ مُوارْدٜىٰكَيْ يَطَوْكٜىٰتَ تَذَمَ یَرْسَ؞ أَ لُواْكَثِنْ كُوَ عٜىٰسْتَا بَتَاضُواْڧِ كُواْمٜىٰبَ، سَيْدَيْ تَابِے شَوَرَرْ هٜىٰغَيْ بَابَا نَسَرْكِے مَيْ لُورَ دَ غِدَنْ دَ عَكٜىٰ أَجِيٜىٰ مَتَنْ سَرْكِے؞ عٜىٰسْتَا كُوَ تَنَدَ ڢَضٍ جِنِ أَعِدُوانْ كُواْوَ؞

16عَكَ كَيْ عٜىٰسْتَا وُرِنْ سَرْكِے أَهَسُرُسْ أَغِدَنْسَ أَوَتَنْ غُواْمَ، وَتُواْ وَتَنْ تٜىٰبٜىٰتْ، عَثِكِنْ شٜىٰكَرَا تَبَݣَويْ تَمُلْكِنْسَ؞

17سَرْكِے كُوَ يَسُواْ عٜىٰسْتَا ڢِيٜىٰدَ سَوْرَنْ مَاتَا، تَا كُوَ سَامِ أَلْحٜىٰرِ دَ ڢَضٍ جِنِ دَغَ غَرٜىٰشِ ڢِيٜىٰدَ دُكَنْ سَوْرَنْ بُدُرْوَيْ؞ سَبُواْدَ حَكَ يَسَا مَتَ هُولَرْ مُلْكِ، يَمَيْدَ عِتَ سَرَوْنِيَ أَمَيْمَكُوانْ بَشْتِ؞

18سَيْ سَرْكِے كُوَ يَيِ بَبَّنْ بِكِ دُواْمِنْ يَغِرْمَمَ عٜىٰسْتَا؞ يَغَيَّثِ مَنْيَنْ مُتَنٜىٰنْسَ دَ دَتَّاوَنْسَ؞ يَكُمَ بَادَ هُوتُ غَ دُكَنْ يَنْكُنَنْ مُلْكِنْسَ؞ يَبَادَ ݣَوْتَيْ عَيَلْوَثٜىٰ بِسَغَ أَرْزِڧِنْ مُلْكِنْسَ؞

19سَعَدَّ عَكَ تَتَّارَ بُدُرْوَيْ سَوْ نَبِيُ، مُوارْدٜىٰكَيْ يَنَ ظَوْنٜىٰ عَڧُواْڢَرْ غِدَنْ سَرْكِے، وَتُواْ يَذَمَ طَيَ دَغَ ثِكِنْ دَتَّاوَنْ سَرْكِے كٜىٰنَنْ؞

20حَرْ يَنْذُ عٜىٰسْتَا كُوَ بَتَ بَيَّنَ دَنْ‌غِنْتَ كُواْ أَصَلِنْ مُتَنٜىٰنْتَبَ كَمَرْ يَدَّ مُوارْدٜىٰكَيْ يَعُمَرْثٜىٰتَ، غَمَا تَايِ بِيَيَّ دَ أَبِنْدَ مُوارْدٜىٰكَيْ يَڢَطَا مَتَ، كَمَرْ يَدَّ تَيِ تُنْ تَنَ ڧَرَمَ أَغِدَنْسَ؞

21عَݣُونَكِنْنَنْ، سَعَدَّ مُوارْدٜىٰكَيْ يَكٜىٰ ظَوْنٜىٰ عَڧُواْڢَرْ غِدَنْ سَرْكِے، سَيْ وَطَنْسُ بَابَانِّنْسَ بِيُ، مَاسُ غَادِنْ ڧُواْڢَرْ غِدَنْ سَرْكِے، وَتُواْ بِغْتَنَ دَ تٜىٰرٜىٰشْ، سُنْيِ ڢُشِے دَ سَرْكِے أَهَسُرُسْ حَرْ سُنْ شِرْيَ سُكَشٜىٰشِ؞

22مُوارْدٜىٰكَيْ كُوَ يَسَامِ لَابَرِنْ شِرِنْسُ، سَيْ يَڢَطَا وَ سَرَوْنِيَ عٜىٰسْتَا لَابَرِنْ؞ سَيْ عٜىٰسْتَا تَڢَطَا وَسَرْكِے، تَكُمَ نُونَ مَسَ ثٜىٰوَ مُوارْدٜىٰكَيْ نٜىٰ يَجِ؞

23سَعَدَّ عَكَيِ بِنْثِكٜىٰ، عَكَ غَانٜىٰ ثٜىٰوَ لَابَرِنْ مُوارْدٜىٰكَيْ غَسْكِيَ نٜىٰ؞ سَيْ عَكَ رَاتَيٜىٰ وَطَنَّنْ مُتُمْ بِيُ عَكَنْ دُواْغُوانْ كَتَكُوانْ رَاتَيَ مُتَنٜىٰ؞ سَرْكِے كُوَ يَا بَادَ عُمَرْنِ عَكَ رُبُوتَ وَنَّنْ لَابَرِ عَثِكِنْ لِتَّڢِنْ تَارِيحِ نَمُلْكٍ أَغَبَنْسَ؞

← Chapter 1 Jump to: Chapter 3 →