Exodus 34

hadiyya

← Chapter 33 Jump to: Chapter 35 →

1Waa'i Muse'ena «Luxxaanni'nno'i lam ki'n ba'lluwwa cabbattaa gudise; anim at iiqqitti ba'lluwwanne hee'u sagara kitaaboommo.

2Sooxxi dara baqitem guddaa Siina'i duunanne fittaa i illagenne uulle.

3Kiinninne maqire ayyim firoone; te'im duu'nnaannonne hinki beyyonnem ayyi manchim moo'amoone; gereebbii fella'ii hinki fooraam diinatim duu'n lugumonne allaa'lloone» yukko.

4Ee bikkina Muse'e lam ki'n ba'lluwwa illagee'nnaannisam gudisaa Waa'i ixxo ijaajukkisannem la'm balla daram ee lamem ki'n ba'lluwwa amadaa Siina'i duunanne firukko.

5Waa'im duubinne dillaa ixxenne uullaa «An Moollanni Waa'a!» yaa ixxi keesammi summa la'isukko.

6Waa'im Muse'e illaginne higukkuuyyi «An Waa'i qishixxoommanee haafoommanee; an quunqina gaaggaaboombee'ane; iikki heer heerina hee'oo iittii amma'nnamaammoohaannoomii lobakata.

7Iikka heer heerina hee'oo iittom lobakat kum qaranchi afeebe'e egeroommo; boqqoomaa baaxiiloo hundam haafoommo; ihukkaarem saxxi qaranchiinsi soo'l qaranchi afeebe'e anno'i baaxii'l bikkina ooso guzumo'oo'n cawwaa uroommoyyo» yaa alallaatukko.

8Muse'e ee ammanenne heeshaa otossaa

9«I Moollanni Waa'a! An ki illagenne nuura siidaammoolas at niinninne maqire edantaa fittona uunxoommo; ka minaadabik wodan duudaakkoohane; ihukkaarem at ni baaxiiloo ni jollee hundam haafihe; ki gaqqi minaadab issitaahim neese moo'e» yukko.

10Waa'i Muse'ena «Oono'o, an Isra'eelinne hidi'l sagara aagoommo; kanniinsi illageen uullanne ihaa la'amoobee'i maalalsiisoo mare'e ki minaadabina moo'isoommo; ee baddisoo maalalsiisoo aganna ki kululleetanne hee'oo minaadab hundim moo'ookko.

11An kaballa ki'nnuwwina uwwoommi ijaajo hundam egellehe; an Amoore'ika, Kana'aa'nneka, Hiite'ika, Faarze'ika, Hiiwe'ikaa Iyyaabuusikaa minaadaba ki'nnuwwi illagiinsi holloommo.

12Ki'nnuwwina qaash ihoo bikkina mattakkam uullanne hee'oo minaadabinne matem hidi'l sagaram aaggakkotte.

13Ihukkaarem ixxuwwika kitima hincaa'llam beyyuwwaa otossitam beyyuwwaa gindansehe; Asheera yakkam qophpha'n waa'i misilam iiqansitakka'a ubbuussehe.

14«An Waa'i to'achchoomman ihummi bikkina iinniinsi bagaan mulli waa'ina otossitakkotte.

15Qophpha'n waa'uwwina otossitam ammanee kitima hincaa'llam ammanee ki'nnuwwim ee'isa issitakkona ki'nnuwwa xa'mmimminne ee waa'uwwina hincaa'llam hurbaata ittakkona ki'nnuwwa keentam bikkina ee uullanne hee'llam minaadabinne hore'em hidi'l sagara aaggakkotte.

16Ki'nnuwwi goo'n oosinam ixxuwwi landa eebbakkotte; mashka'oomim oo landi ixxuwwi anno'i waa'uwwina otossitam ammane ki'nnuwwi oosim otossitamisa issitam bikkinatte.

17«Bukkamaa baxamoo waa'uwwa baxxakkotte.

18Gibxi uulliinsi fittakko'ok shaashshiqqi aganannetti ihu bikkina maarag hundam Qorosho'i Uguda lonsehe; an ijaajummisannem lamar balla ursho'i bee'i qorosho'o ittehe.

19«Mannikii fooraam diinaxxekii won ihaa qaramoo goon hundim iihane.

20Ihukkaarem hallichchi wona gereechchi ambulinne dabassitakkeena xantakkamo; dabassitakkeena xantakkambee'an ihulas axo booqaaqqehe; won ihaa qaramu goo'n oosina hundinam tisso miqqehe. «Ayyi manchim i illagenne kora'i anga hincoone.

21«Loh balla ki'nnuwwi baxo baxxehe; abuulli aganannettem ihukko te'im hurbaata wixxaa'akkam agananne lama'l ballanne usheexxehe.

22«Arasa murimma asheettakkam ammane Hurbaata wixxaa'immi Uguda lonsehe; ee'isam hiinchi lasaanchonne haqqi misha wixxaa'llakkam ammane Daas Uguda lonsehe.

23«Hiinchonne sas ammane ki'nnuwwik goon hundim iina Isra'ee'l Moollanni Waa'ina otosseena waarona.

24Mulli minaadaba hundam hollaa ki'nnuwwi hee'llakkam uulla haraassoommo; ee sasem ugudduwwam lonsitakkeena i kolli hincitakkam ammanenne ki'nnuwwika uulla qaseena ayyim mixooyyo.

25«Iina diinaxxi kitima hincaa'llakkam ammane xiiga ursho'i yoo qorosho'inne maqire hincaa'llakkotte; Shaashshiqqi Ugudina duramu diinaxxi maa'lleka mat luwwam darina dissitakkotte.

26«Hiinchina hiinchina ki'nnuwwi hurbaaxxi atooxxeka ludo ki'nnuwwi Moollanni Waa'i Mine eebbehe. «Gereechchanem ihukko te'im fellakkichchi wotara ixxi am adinne maqire eddakka'a sattakkotte.

27«Kiinninnettem ihukko Isra'ee'l minaadabinne maqire hidi'l sagara aagoommok ka saga'llisinnette ihu bikkina ka sagara kitaabanne kitaabe» yukko.

28Muse'em maham itoo'nnii agoo'nnii Waa'inne maqire sor ballaa sor hiimoo higisukko; Waa'im lamem ki'n ba'lluwwannem hidi'l sagalluwwi ihu tommem ijaajom kitaabukko.

29Muse'e lamem ki'n ba'lluwwam ixxi anganne amadaa Siina'i duuniinsi dillu ammane Waa'inne maqire atooraraa hee'u bikkina ixxek illi kolli lobakata belecce'am hee'ukko; ihukkaarem ixxi eekka la'ukkoyyi hee'ukko.

30Aaroonii Isra'ee'l minaadabii hundim Muse'e moo'lla'a ixxek illi kolli lobakata belecce'am hee'u bikkina ixxi kollonne hincimma baddito'o.

31Ihukkaarem Muse'e ixxuwwa weeshukko. Aaroonii minaadaphphi awwonsaanii ixxi kolli hincito'aare atoorassukko.

32Ee lasage Isra'ee'l minaadab hundim Muse'e kolli hincito'o; Muse'em Waa'i ixxena Siina'i duunanne uwwu Seera hundam ixxuwwina uwwukko.

33Muse'em ixxuwwinne wocimma guullaa lasage ixxi ille shaashshinne gunguu'llukko.

34Ixxim Waa'inne atoorareena Keesammi Dukkaa'n woro aagoo amman hundam ee shaashsha illiinsi hooram hee'ukko; ee beyyiinsi firoo ammane Waa'i ixxo ijaaju luwwi hundam Isra'ee'l oosina kuram hee'ukko.

35Isra'ee'l minaadabim Muse'ek illi kolli caakkaa moo'llam hee'llo'o; ee bikkina Muse'e Waa'inne atoorareena daba'llaa mareebe'i afeebe'e ixxi illenne shaashsha gunguu'llam hee'ukko.

← Chapter 33 Jump to: Chapter 35 →