Ecclesiastes 11

Ilonggo (Ang Biblia (1982))

← Chapter 10 Jump to: Chapter 12 →

1Ihaboy ang imo tinapay sa mga tubig, kay makita mo ini sa tapus ang madamu nga adlaw.

2Hatag sing bahin sa pito, ukon bisan sa walo, kay wala ka makahibalo kon ano nga malaut ang mahanabu sa duta.

3Kon ang mga gal-um mapuno sang ulan, nagaula sila sa duta; kag kon ang kahoy mapukan nayon sa bagatnan ukon nayon sa aminhan, sa duug diin mapukan ang kahoy, didto magapabilin ini.

4Ang nagapanilag sang hangin indi magsab-ug; kag ang nagatolok sa mga gal-um indi mag-ani.

5Subong nga wala ka makahibalo sang dalanon sang hangin, ukon paano ang pagtubo sang mga tul-an sa tiyan sang nagabusung nga babayi, subong man wala ka makahibalo sang binuhatan sang Dios nga nagahimo sang tanan.

6Sa kaagahon isab-ug ang imo binhi, kag sa kahaponon dili pagpunggi ang imo kamut; kay wala ka makahibalo kon diin ang magauswag, kon ini ukon ina, ukon kon sila nga duha mangin-alangay nga maayo.

7Sa pagkamatuud matam-is ang kapawa, kag matahum nga butang nga tolokon sang mga mata ang adlaw.

8Kay kon ang tawo magkabuhi sing madamu nga mga tuig, magkalipay sia sa ila tanan; apang magdumdum sia sang mga adlaw sang kadudulman kay manginmadamu sila. Ang tanan nga nagaabut kadayawan.

9Magkalipay, O pamatan-on nga lalaki, sa imo pagkapamatan-on, kag maglipay sa imo ang imo tagiposoon sa mga adlaw sang imo pagkapamatan-on; maglakat sa mga dalanon sang imo tagiposoon kag sa itololok sang imo mga mata. Apang kilalahon mo nga tungud sini tanan nga butang ang Dios magadala sa imo sa hukmanan.

10Busa kuhaa ang kasubu sa imo tagiposoon, kag isikway ang malaut gikan sa imo unud; kay ang pagkapamatan-on kag ang pamanagbanag sang kabuhi kadayawan sila.

← Chapter 10 Jump to: Chapter 12 →