Ecclesiastes 12

Ilonggo (Ang Biblia (1982))

← Chapter 11 Jump to:

1Dumduma man ang imo Manunuga sa mga adlaw sang imo pagkapamatan-on, sa wala pa mag-abut ang malaut nga mga adlaw, kag magpalapit ang mga tuig, nga magsiling ka, “Wala ako sing kalipay sa ila”;

2sa wala pa magdulum ang adlaw kag ang kapawa, kag ang bulan, kag ang mga bitoon kag magbalik ang mga gal-um sa tapus ang ulan;

3sa adlaw nga ang mga manugbantay sang balay magakurug, kag ang makusug nga mga tawo magadunguk sila, kag ang mga manuggaling magadolog bangud nga pila lamang sila, kag ang mga nagagawa sa mga talambuan pagadulman,

4kag ang mga ganhaan takpan sa dalan; kon ang kagahud sang paggaling maghinay, kag ang isa magatindug sa huni sang pispis, kag ang tanan nga anak nga babayi sang lanton paubson;

5hoo, magakahadluk sila sang mataas, kag ang mga kakugmat manginyara sa dalanon; ang almendro nga kahoy magapamulak, ang tibakla manginlulan kag ang handum mawala; bangud nga ang tawo nagakadto sa iya puluy-an nga dayon, kag ang mga manuglalaw nagalagaw sa mga dalan;

6sa wala pa mabugto ang lubid nga pilak, ukon mabuka ang yahong nga bulawan, ukon maboong ang pitsil sa tuburan, ukon maboong ang aliling sa suluptan sing tubig,

7kag ang yab-ok nagabalik sa duta subong nga amo sia anay, kag ang espiritu nagabalik sa Dios nga naghatag sa iya.

8Kadayawan sang mga kadayawan, nagasiling ang Manugwali; ang tanan kadayawan.

9Dugang pa bangud nga ang Manugwali maalam, ginatudloan man niya sing ihibalo ang katawohan, nga nagapamalandong kag nagapangita kag nagapahamtang sing nagakaigo sang madamu nga hulubaton.

10Ang Manugwali nagtinguha sa pagpangita sing mga polong nga kalahamut-an, kag yadto nga napanulat sing matadlong nga mga polong sang kamatooran.

11Ang mga polong sang maalam subong sang mga suntok, kag subong sang mga lansang nga nalansang sing maayo amo ang mga polong sang mga pangolo sang mga katilingban nga ginahatag gikan sa isa ka Manugpahalab.

12Dugang pa, anak ko, palaygay ka. Wala sing katapusan ang paghimo sing madamu nga tolon-an, kag ang tama nga pagtoon kalapyo sang unud.

13Ini amo ang katapusan sang butang; ang tanan nabatian na. Magkahadluk sa Dios, kag magbantay sa iya mga sogo; kay amo ini ang bug-os nga katungdanan sang tawo.

14Kay ang Dios magadala sang tagsa ka binuhatan sa hukmanan, pati sang tagsa ka butang nga natago, kon ini maayo ukon ini malaut.

← Chapter 11 Jump to: