Ecclesiastes 5

Ilonggo (Ang Biblia (1982))

← Chapter 4 Jump to: Chapter 6 →

1Bantayi ang imo tiil kon magkadto ka sa balay sang Dios; kay ang pagpalapit sa pagpamati maayo pa sa paghatag sang halad sang mga buangbuang; kay wala sila makahibalo nga sila nagahimo sing malaut.

2Dili ka magdasodaso sang imo baba, kag ang imo tagiposoon indi magmadagmit sa pagmitlang sing bisan ano nga butang sa atubangan sang Dios, kay ang Dios yara sa langit, kag ikaw sa duta; busa magdiotay ang imo mga polong.

3Kay ang damgo nagaabut sa kadam-an sang pangitan-an, kag ang tingug sang buangbuang sa kadam-an sang mga polong.

4Kon nagasaad ka sa Dios, indi ka magpalantang sa pagbayad sini; kay wala sia sing kahamuut sa mga buangbuang. Bayari ang imo ginasaad.

5Maayo pa nga indi ka magsaad, sang sa magsaad ka kag indi magbayad.

6Dili pagtuguti ang imo baba sa pagpapakasala sang imo unud, kag indi ka magsiling sa atubangan sang manugtunda nga sayup ini; ngaa bala nga magkaakig ang Dios sa imo tingug, kag maglaglag sang binuhatan sang imo mga kamut?

7Kay sa kadam-an sang mga damgo may mga kadayawan, kag sa madamu nga mga polong: apang magkahadluk ka sa Dios.

8Kon makita mo ang pagpigus sang mga imol kag ang malugus nga nagakuha sang katarungan kag pagkamatarung sa puud, dili ka magkatingala sa butang; kay ang isa nga mataas pa sa mataas nagatamud, kag may mataas pa sa ila.

9Labut pa ang kapuslanan sang duta tungud sa tanan, ang hari gid ginasagud sang uma.

10Ang nagahigugma sang pilak indi mabusug sing pilak; bisan ang nagahigugma sang kabuganaan, sing patubas: ini man kadayawan.

11Kon magdugang ang mga pagkabutang, nagadugang ang nagakaon sa ila; kag ano bala ang kapuslanan sang iya tag-iya luwas ang pagtan-aw sa ila sa iya mga mata?

12Matam-is ang katologon sang tawo nga nagapangabudlay, bisan nagakaon sia sing diotay ukon madamu; apang ang pagkabusug sang manggaranon indi magtugut sa iya sa pagtolog.

13May matama nga kalaut nga nakita ko sa idalum sang adlaw: ang manggad nga gintago sang iya tag-iya nga sa iya kasamaran,

14kag yadto nga manggad nagakawala sa malaut nga pasimpalad; kag kon may anak sia nga lalaki, wala gid sa iya kamut.

15Subong sang iya paggowa sa tiyan sang iya iloy magataliwan sia nga hublas subong sang iya pag-abut, kag wala sing madala tungud sang iya pagpangabudlay, nga madala niya sa iya kamut.

16Ini man matama nga kalaut: sa tanan nga bagay subong sang iya pag-abut, sa amo magataliwan sia; kag ano bala ang kapuslanan nga nagapangabudlay sia tungud sa hangin,

17kag sa tanan niyang adlaw man nagakaon sia sa kadudulman kag nagapalibog sia sing tama, kag may balatian kag kasingkal?

18Yari karon, ang nakita ko nga maayo kag matahum amo nga ang isa magkaon kag mag-inum kag magpangalipay sing kaayohan sa bug-os niyang kinabudlayan nga ginapangabudlayan niya sa idalum sang adlaw sa tanan nga adlaw sang iya kabuhi nga ginhatag sang Dios sa iya, kay amo ini ang iya bahin.

19Ang tagsa ka tawo man nga ginhatagan sang Dios sing manggad kag pagkabutang kag ginhatagan sia sing gahum sa pagkaon sini, kag pagkuha sang iya bahin kag sa pagpangalipay sa iya kinabudlayan—ini amo ang hatag sang Dios.

20Kay indi sia makadumdum sing maayo sang mga adlaw sang iya kabuhi bangud nga ang Dios nagasabat sa iya sa kalipay sang iya tagiposoon.

← Chapter 4 Jump to: Chapter 6 →