Ecclesiastes 3

Ilonggo (Ang Biblia (1982))

← Chapter 2 Jump to: Chapter 4 →

1Sa tagsa ka butang may panag-on, kag tion sa tagsa ka katuyoan sa idalum sang langit:

2tion sa pagkatawo, kag tion sa pagkapatay; tion sa pagtanum, kag tion sa paggabut sang ginatanum;

3tion sa pagpatay, kag tion sa pagbolong; tion sa pagguba, kag tion sa pagpatindug;

4tion sa paghibi, kag tion sa pagkadlaw; tion sa paglalaw, kag tion sa pagsaut;

5tion sa pagpilak sing mga bato, kag tion sa pagtipon sing mga bato; tion sa paghakus, kag tion sa pagdumili sa paghakus;

6tion sa pagpangita, kag tion sa pagdula; tion sa pagtago, kag tion sa pagpilak;

7tion sa paggisi, kag tion sa pagtahi; tion sa paghipus, kag tion sa pagpamolong;

8tion sa paghigugma, kag tion sa pagdumut; tion sa inaway, kag tion sa paghidait.

9Ano bala ang kapuslanan sang nagapangabudlay sa ginapangabudlayan niya?

10Nakita ko ang kasakit nga ginhatag sang Dios sa mga anak sang mga tawo nga hanason sa sini.

11Ang tagsa ka butang ginhimo niya nga matahum sa iya tion; ginbutang man niya ang wala sing katubtuban sa ila tagiposoon, apang agud nga ang tawo indi makatungkad sang binuhatan nga ginhimo sang Dios kutub sa ginsuguran bisan tubtub sa katapusan.

12Nahibaloan ko nga wala na sing maayo pa sa ila sang sa magkalipay kag maghimo sing maayo tubtub nga nagakabuhi sila;

13kag nga ang tagsa ka tawo man magkaon kag mag-inum, kag magpangalipay sing kaayohan sa bug-os niya nga kinabudlayan nga amo ang hatag sang Dios.

14Nakilala ko nga ang bisan ano nga ginahimo sang Dios mangindayon ini; wala sing madugang sini, ukon bisan ano nga butang nga mabuhin sa sini; kag ang Dios naghimo sini, agud nga ang mga tawo magkahadluk sa atubangan niya.

15Ang yari, nakaligad sing dugay na; kag ang magaabut, nakaligad sing dugay na; kag ang Dios nagapangita liwat sang nagtaliwan.

16Labut pa nakita ko sa idalum sang adlaw sa duug sang katarungan, nga didto ang pagkamalaut, kag sa duug sang pagkamatarung, nga didto ang pagkamalaut.

17Nagsiling ako sa akon tagiposoon, ang Dios magahukom sang matarung kag sang malauton, kay may tion didto sa tagsa ka katuyoan kag sa tagsa ka buluhaton.

18Nagsiling ako sa akon tagiposoon nahanungud sang mga anak sang mga tawo nga ginatilawan sila sang Dios sa pagpakita sa ila nga sila mga sapat lamang.

19Kay ang nagakahanabu sa mga anak sang mga tawo nagakahanabu sa mga sapat; bisan isa ka butang ang nagakahanabu sa ila subong nga ang isa nagakapatay, sa amo nagakapatay ang isa. Sila tanan may isa ka ginhawa, kag wala sing kinalabaw ang tawo sa mga sapat; kay ang tanan kadayawan.

20Ang tanan nagakadto sa isa ka duug; ang tanan gikan sa yab-ok, kag ang tanan nagabalik sa yab-ok.

21Sin-o bala ang nakahibalo sang espiritu sang tawo kon ini nagapaibabaw kag sang espiritu sang mga sapat kon ini nagapaidalum sa duta?

22Busa nakita ko nga wala na sing maayo pa sang sa magpangalipay ang tawo sa iya mga binuhatan, kay amo ina ang iya bahin; kay sin-o bala ang magapabalik sa iya sa pagtan-aw sang ano sa olihi niya?

← Chapter 2 Jump to: Chapter 4 →