Ecclesiastes 2

Ilonggo (Ang Biblia (1982))

← Chapter 1 Jump to: Chapter 3 →

1Nagsiling ako sa akon tagiposoon, “Kari karon, tilawan ko ikaw sang kasadya; busa magpangalipay ka.” Apang yari karon, ini man kadayawan.

2Nagsiling ako nahanungud sang kinadlaw, “Buang ini,” kag nahanungud sang kasadya, “Ano bala ang ginahimo sini?”

3Nag-usisa ako sa akon tagiposoon kon paano ang paglipay sang akon unud sing alak—ang akon tagiposoon nagatuytuy pa sa akon nga may kaalam—kag kon paano ang pagkapyot sa kabuangan, tubtub nga makita ko kon ano ang kaayohan sini nga sa mga anak sang mga tawo nga himoon nila sa idalum sang langit sa tanan nga adlaw sang ila kabuhi.

4Naghimo ako nga sa akon sing dalagku nga mga buluhaton; nagpatindug ako nga sa akon sing mga balay kag nagtanum ako nga sa akon sing mga ulubasan;

5naghimo ako nga sa akon sing mga katamnan kag mga parke, kag sa ila nagtanum ako sing kahoy sang tanan nga sari sang bunga.

6Naghimo ako nga sa akon sing mga ponong sang tubig sa pagbunyag gikan sini sang talon nga ginpatuboan sing mga kahoy.

7Nagbakal ako sing mga alagad nga lalaki kag mga alagad nga babayi, kag may mga alagad nga natawo sa akon balay; may daku man ako nga mga pagkabutang sang kabakahan kag mga panong, labaw sa tanan nga una sa akon sa Jerusalem.

8Nagtipon man ako nga sa akon sing pilak kag bulawan kag sang bahandi sang mga hari kag sang mga puud; nagkuha ako sing mga manug-amba nga lalaki kag babayi, kag sang mga kalipayan sang mga anak sang mga tawo, sing mga tulunggon, kag sang tanan nga sari.

9Gani nangindaku ako kag nagdugang labi sa tanan nga una sa akon sa Jerusalem; ang akon kaalam man nagpabilin sa akon.

10Kag bisan ano nga naluyagan sang akon mga mata wala ko gindumili sa ila; wala ko pagpunggi ang akon tagiposoon sa bisan ano nga kalipay, kay ang akon tagiposoon nagkalipay bangud sang tanan ko nga pagpangabudlay, kag ini amo ang bahin ko sa bug-os ko nga pagpangabudlay.

11Niyan nagtolok ako sa tanan nga binuhatan nga ginhimo sang akon mga kamut kag kinabudlayan nga ginpangabudlayan ko sa paghimo, kag yari karon, ang tanan kadayawan kag pagpanikasug sa hangin, kag wala sing kapuslanan sa idalum sang adlaw.

12Gani nagliso ako sa pagtan-aw sang kaalam kag sang pagkabuang kag sang kabuangan; kay ano bala ang mahimo sang tawo nga nagasonod sa hari? Bisan ang nahimo sing dugay na.

13Niyan nakita ko nga ang kaalam nagalabaw sa kabuangan subong nga ang kapawa nagalabaw sa kadudulman.

14Ang mga mata sang maalam yara sa iya olo, kag ang buangbuang nagalakat sa kadudulman; kag bisan pa nahangup ko nga ang isa ka hitabu nagakahanabu sa ila tanan.

15Niyan nagsiling ako sa akon tagiposoon, “Subong sang sa nahanabu sa buangbuang amo ini ang mahanabu sa akon; kag ngaa bala nga labi pa ako kaalam?” Niyan nagsiling ako sa akon tagiposoon nga ini man kadayawan.

16Kay nahanungud sa maalam nga tawo bisan sa buangbuang wala sing pagdumdum nga dayon, sa ginatan-aw nga sa mga adlaw nga palaabuton ang tanan malipatan na sing madugay. Daw ano nga ang maalam nagakapatay subong sang buangbuang!

17Gani gindumtan ko ang kabuhi, bangud nga ang buluhaton nga ginahimo sa idalum sang adlaw mabug-at sa akon; kay ang tanan kadayawan kag pagpanikasug sa hangin.

18Gindumtan ko ang bug-os ko nga kinabudlayan nga ginpangabudlayan ko sa idalum sang adlaw, sa ginatan-aw nga kinahanglan nga bayaan ko ini sa tawo nga magasonod sa akon;

19kag sin-o bala ang makahibalo kon manginmaalam sia nga tawo ukon manginbuangbuang? Apang sia magagahum sa bug-os ko nga kinabudlayan nga akon ginpangabudlayan kag diin nagpakita ako sang akon kaugalingon nga maalam sa idalum sang adlaw. Ini man kadayawan.

20Busa nagtalikod ako sa pagkuha sing paglaum sa akon tagiposoon nahanungud sa bug-os nga kinabudlayan nga akon ginpangabudlayan sa idalum sang adlaw,

21kay may tawo nga ang iya pagpangabudlay naupdan sing kaalam kag ihibalo kag pagkasampaton apang sa tawo nga wala magpangabudlay sini igabilin niya ini nga iya bahin. Ini man kadayawan kag daku nga malaut.

22Kay ano bala ang iya sang tawo sa bug-os niya nga kinabudlayan kag sang pagpaninguha sang iya tagiposoon nga ginapangabudlayan niya sa idalum sang adlaw?

23Kay ang tanan niya nga adlaw mga kasubo lamang, kag ang iya kasakit kalisud; bisan sa kagab-ihon ang iya tagiposoon wala nagapahuway. Ini man kadayawan.

24Wala na sing maayo pa sa tawo sang sa magkaon sia kag mag-inum, kag magkalipay ang iya kalag sing kaayohan sa iya kinabudlayan. Ini man, nakita ko, nga ini nagagikan sa kamut sang Dios;

25kay sin-o bala ang makakaon ukon sin-o bala ang makaagum sing kalipayan labi pa sa akon?

26Kay sa tawo nga nagapahamuut sa iya ang Dios nagahatag sing kaalam kag ihibalo kag kalipay; apang sa makasasala nagahatag sia sing kasakit sa pagtipon kag sa pagtumpok, agud nga makahatag sia sa iya nga nagapahamuut sa Dios. Ini man kadayawan kag pagpanikasug sa hangin.

← Chapter 1 Jump to: Chapter 3 →