Ecclesiastes 4

Ilonggo (Ang Biblia (1982))

← Chapter 3 Jump to: Chapter 5 →

1Niyan nagbalik ako kag nakita ang tanan nga pagpigus nga ginahimo sa idalum sang adlaw. Kag yari karon, ang mga luha sang mga ginpigus, kag wala sila sing manuglipay! Sa bahin sang ila mga manugpigus may gahum, apang wala sila sing manuglipay.

2Busa gindayaw ko ang mga patay nga napatay sing dugay na labi pa sa mga buhi nga nagakabuhi pa;

3apang maayo pa sa ila nga duha ang pagkabig ko sa iya nga wala pa, nga wala makakita sang mga malaut nga buhat nga ginahimo sa idalum sang adlaw.

4Niyan nakita ko ang bug-os nga kinabudlayan kag ang tagsa ka sampaton nga buhat nga tungud sini ang tawo ginakahisaan sang iya isigkatawo. Ini man kadayawan kag pagpanikasug sa hangin.

5Ang buangbuang nagapanimuko, kag nagakaon sang iya kaugalingon nga unud.

6Maayo pa ang isa ka tapnay nga may kalinong sang sa duha ka tapnay nga may kabudlayan kag pagpanikasug sa hangin.

7Niyan nagbalik ako kag nakita ang kadayawan sa idalum sang adlaw:

8may isa nga isa lamang kag wala sia sing ikaduha, wala sia sing anak ukon utud, apang wala sing katapusan ang iya bug-os nga pagpangabudlay, kag ang iya mga mata wala nagakabusug sa manggad, sa bagay nga wala gid sia nagapamangkot, “Tungud kay sin-o bala nagapangabudlay ako kag nagadumili sang akon kalag sang kaayohan?” Ini man kadayawan kag tama nga kasakit.

9Ang duha maayo pa sa isa, bangud nga may maayo sila nga balus tungud sang ila pagpangabudlay.

10Kay kon mapukan sila, ang isa nagabayaw sang iya kaupud; apang kailo sa iya nga isa lamang kon mapukan sia kag wala sing isa nga magbayaw sa iya.

11Liwat, kon ang duha nagahulid, niyan may kainit sila; apang paano nga ang isa lamang mag-init?

12Kag kon ang isa ka tawo maglandas sa iya nga isa lamang, ang duha magatindug sa iya. Ang lubid nga tatlo ka dupli indi mabugto sing madali.

13Maayo pa ang imol kag maalam nga pamatan-on sang sa tigulang kag buangbuang nga hari, nga indi na makahibalo magbaton sing laygay,

14bisan gikan sa bilanggoan naggowa sia nga manginhari ukon sa iya kaugalingon nga ginharian natawo sia nga imol.

15Nakita ko ang tanan nga buhi nga nagalakat sa idalum sang adlaw, nga upud sila sa pamatan-on, ang ikaduha nga nagtindug sa tal-us niya;

16wala sing katapusan sang tanan nga katawohan; tanan gingamhan niya. Apang ang mga nagasonod sa iya indi magkalipay sa iya. Sa pagkamatuud ini man kadayawan kag pagpanikasug sa hangin.

← Chapter 3 Jump to: Chapter 5 →