Luke 1 — Ilonggo (Ang Biblia (1982))

1Sanglit kay madamu ang nagpangamut sa pagsulat sing sugilanon nahanungud sadtong mga butang nga nagkalatuman sa tunga namon,

2subong sang gintugyan nila sa amon nga kutub sa ginsuguran mga saksi sila nga nakakita kag mga manug-alagad sang polong,

3ginpakamaayo ko man, sang nausisa ko sing sibo ang lakat sang tanan nga butang kutub sa ginsuguran, ang pagsulat sa imo sing pasonod, labing halangdon nga Teofilo,

4agud nga makahibalo ka sang kamatooran nahanungud sa mga butang diin ginton-an ka.

5Sa mga adlaw ni Herodes, nga hari sang Judea, may sacerdote nga ginhingalanan si Zacarias, sa kabon ni Abias; kag may asawa sia sa mga anak ni Aaron, kag ang iya ngalan si Elisabet.

6Kag sila nga duha matarung sa atubangan sang Dios, nga nagagawi sa tanan nga sogo kag pagsolondan sang Ginoo sa walay kasawayan.

7Apang wala sila sing anak, kay si Elisabet baw-as, kag sila nga duha tigulang na.

8Karon sang sia nagpanghikot sang pagkasacerdote sa atubangan sang Dios sa torno sang iya kabon,

9sono sa kinabatasan sang pagkasacerdote, naigo sa iya kapalaran ang pagsulud sa templo sang Ginoo kag pagsonog sang incienso.

10Kag ang bug-os nga kadam-an sang katawohan nagapangamuyo sa gowa sa takna sang incienso.

11Kag may nagpakita sa iya nga manugtunda sang Ginoo nga nagatindug sa too nayon sang halaran sang incienso.

12Kag si Zacarias nalisang sang nakita niya sia, kag hinadlukan sia.

13Apang ang manugtunda nagsiling sa iya, “Dili ka mahadluk, Zacarias, kay ang imo pag-ampo ginpamatian, kag ang imo asawa nga si Elisabet magaanak sing lalaki sa imo, kag tawgon mo ang iya ngalan Juan.

14Kag magaagum ka sing kalipay kag kasadya, kag madamu ang magakalipay sa iya pagkatawo;

15kay mangindaku sia sa atubangan sang Ginoo, kag indi sia mag-inum sing alak ukon ilimnon nga masingkal, kag mapun-an sia sang Espiritu Santo, kutub pa sa tiyan sang iya iloy.

16Kag madamu sang anak sang Israel ang palisoon niya sa Ginoo nga ila Dios,

17kag magauna sia sa iya sa espiritu kag sa gahum ni Elias, sa pagpaliso sang mga tagiposoon sang mga ginikanan sa mga anak, kag sang mga malalison sa kaalam sang mga matarung, sa paghanda sa Ginoo sing katawohan nga naaman.”

18Kag si Zacarias nagpamangkot sa manugtunda, “Paano bala ang pagkahibalo ko sini? Kay ako tigulang nga tawo, kag ang akon asawa tigulang na.”

19Kag ang manugtunda nagsabat sa iya, “Ako si Gabriel, nga nagatindug sa atubangan sang Dios; kag ginpadala ako sa paghambal sa imo, kag sa pagtunda sining maayong balita.

20Kag yari karon, magaapa ka kag indi makahambal tubtub sa adlaw nga mahanabu ining mga butang, bangud nga wala ka magtoo sa akon mga polong, nga tumanon sa ila panag-on.”

21Kag ang katawohan nagahulat kay Zacarias, kag natingala sila sang naglantang sia sa templo.

22Kag sang paggowa niya, indi sia makahambal sa ila; kag ginhantup nila nga nakakita sia sing palanan-awon sa templo; kag nagpadayon sia sa pagsinyas sa ila kag nadayonan sa pagkaapa.

23Kag sang natapus ang mga adlaw sang iya pagpanghikot, nagpauli sia.

24Sa tapus sining mga adlaw si Elisabet nga iya asawa nagpanamkon, kag nagpanago sia sing lima ka bulan, nga nagasiling,

25“Ini ginhimo sang Ginoo sa akon sa mga adlaw nga nagtamud sia sa akon, sa pagkuha sang akon kahuluy-an sa tunga sang mga tawo.”

26Sa ikan-um nga bulan ang manugtunda nga si Gabriel ginpadala gikan sa Dios sa isa ka banwa sang Galilea nga ginhingalanan Nazaret,

27sa ulay nga kalaslon sa lalaki nga ang iya ngalan si Jose, sa kaliwatan ni David; kag ang ngalan sang ulay si Maria.

28Kag nagpalapit sia sa iya kag nagsiling, “Maghimaya ka, O nahamut-an, ang Ginoo kaupud nimo! [Bulahan ka sa tunga sang mga babayi!]”

29Apang nalisang sia sing daku sa pinamolong, kag nagpainoino kon ano ayhan ining pag-abiabi.

30Kag ang manugtunda nagsiling sa iya, “Dili ka mahadluk, Maria, kay nakaagum ikaw sing bugay sa Dios.

31Kag yari karon, magapanamkon ka sa imo tiyan kag magaanak sing lalaki, kag tawgon mo ang iya ngalan Jesus.

32Mangindaku sia, kag tawgon nga Anak sang Labing Mataas; kag ang Ginoong Dios magahatag sa iya sang trono sang iya amay nga si David,

33kag magahari sia sa panimalay ni Jacob sa gihapon; kag ang iya ginharian walay katapusan. ”

34Kag si Maria nagsabat sa manugtunda, “Paano bala ang pagkahimo sini, kay wala pa ako bana?”

35Kag ang manugtunda nagsabat sa iya, “Ang Espiritu Santo magakara sa imo, kag ang gahum sang Labing Mataas magalandong sa imo; gani ang bata nga matawo [sa imo] tawgon nga balaan, ang Anak sang Dios.

36Kag yari karon, si Elisabet nga imo himata nagpanamkon man sing anak nga lalaki sa iya katigulangon; kag ini ikan-um nga bulan sa iya nga gintawag nga baw-as.

37Kay sa Dios walay bisan ano nga indi mahimo. ”

38Kag si Maria nagsiling, “Yari karon ako ulipon sang Ginoo; himoon ini sa akon sono sa imo polong.” Kag ang manugtunda nagtaliwan sa iya.

39Si Maria nagtindug sa sining mga adlaw kag nagkadto sing dalidali sa kabakoloran, sa isa ka banwa sang Juda,

40kag nagsulud sia sa balay ni Zacarias kag nag-abiabi kay Elisabet.

41Kag sang pagkabati ni Elisabet sang pag-abiabi ni Maria, ang bata nagkibo sa iya tiyan; kag si Elisabet napun-an sang Espiritu Santo

42kag nagsinggit sia sing mabaskug, “Bulahan ka sa tunga sang mga babayi, kag bulahan ang bunga sang imo tiyan!

43Kag ngaa bala gintugut sa akon, nga ang iloy sang akon Ginoo magkari sa akon?

44Kay yari karon, sang nag-abut ang tingug sang imo pag-abiabi sa akon mga idulungug, ang bata sa akon tiyan nagkibo sa kalipay.

45Kag bulahan sia nga nagtoo nga may katumanan ang ginpamolong sa iya gikan sa Ginoo.”

46Kag si Maria nagsiling, “Ang akon kalag nagapakadaku sang Ginoo,

47kag ang akon espiritu nagakalipay sa Dios nga akon Manluluwas,

48kay nagtamud sia sang kubus nga kahimtangan sang iya ulipon. Kay yari karon, kutub karon ang tanan nga kaliwatan magatawag sa akon nga bulahan;

49kay sia nga gamhanan naghimo sa akon sing dalagkung mga butang, kag balaan ang iya ngalan.

50Kag ang iya kalooy yara sa mga nahadluk sa iya sa mga kaliwatan kag mga kaliwatan.

51Nagpakita sia sing kusug sa iya butkon, ginpaaplaag niya ang mga palabilabihon sa hunahuna sang ila mga tagiposoon,

52ginholog niya ang mga gamhanan gikan sa ila mga trono, kag ginbayaw ang mga kubus;

53ang mga gutum ginbusug niya sing maayo nga mga butang, kag ang mga manggaranon ginpahalin niya nga walay dala.

54Naghatag sia sing bulig sa Israel nga iya alagad, agud nga makadumdum sia sing kalooy,

55sono sa ginpamolong niya sa aton mga ginikanan, kay Abraham kag sa iya kaliwat sa gihapon.”

56Kag si Maria nagpabilin kaupud niya sing mga tatlo ka bulan, kag nagpauli.

57Karon ang tion ni Elisabet natuman nga mag-anak sia, kag nag-anak sia sing lalaki.

58Kag ang iya mga kasilingan kag mga himata nakabati nga ang Ginoo nagpakadaku sang iya kalooy sa iya, kag nagkalipay sila kaupud niya.

59Kag sa ikawalong adlaw nag-abut sila sa pagcircuncidar sang bata; kag kuntani tawgon nila sia Zacarias sono sa ngalan sang iya amay,

60apang ang iloy nagsabat, “Indi amo; kondi tawgon sia Juan.”

61Kag nagsiling sila sa iya, “Walay bisan sin-o sa imo kahimataan nga ginatawag sa sining ngalan.”

62Kag nagsinyas sila sa iya amay, kon ano ang iya buut nga itawag sa iya.

63Kag nagpangayo sia sing sululatan nga tapitapi, kag nagsulat, “Ang iya ngalan si Juan.” Kag sila tanan natingala.

64Kag ang iya baba nagtikab sa gilayon kag ang iya dila nagtugak, kag nakahambal sia, nga nagadayaw sa Dios.

65Kag ang kahadluk nag-abut sa tanan nga nagpuyo sa palibut nila. Kag ini tanan nga polong ginhambal sa bug-os nga kabakoloran sang Judea;

66kag ang tanan nga nakabati sini nagtipig sini sa ila mga tagiposoon, nga nagasiling, “Ano bala niyan ang madangatan sining bata?” Kay ang kamut sang Ginoo kaupud niya.

67Kag ang iya amay nga si Zacarias napun-an sang Espiritu Santo, kag nagtagna, nga nagasiling,

68“Pagdayawon ang Ginoong Dios sang Israel kay nagduaw sia kag nagtubus sang iya katawohan,

69kag nagbangon sing sungay sang kaluwasan nga sa aton sa kaliwatan ni David nga iya alagad,

70sono sa iya ginpamolong sa baba sang iya balaan nga mga manalagna nga kutub pa sa dumaan,

71agud nga maluwas kita sa aton mga kaaway, kag sa kamut sang tanan nga nagadumut sa aton;

72sa pagpakita sing kalooy nga ginsaad sa aton mga ginikanan, kag sa pagpanumdum sang iya balaan nga katipan,

73ang sumpa nga ginsumpa niya kay Abraham nga aton amay,

74sa pagtugut sa aton nga kita, sang naluwas sa kamut sang aton mga kaaway, mag-alagad sa iya sa walay kahadluk,

75sa pagkabalaan kag sa pagkamatarung sa atubangan niya sa tanan naton nga adlaw.

76Kag ikaw, anak, tawgon nga manalagna sang Labing Mataas; kay magauna ka sa Ginoo sa pag-aman sang iya mga dalanon,

77sa paghatag sing ihibalo sang kaluwasan sa iya katawohan sa kapatawaran sang ila mga sala,

78bangud sa malolo nga kalooy sang aton Dios, kon ang adlaw magpamanagbanag sa aton gikan sa kahitaasan

79sa pag-iwag sa mga nagalingkod sa kadudulman kag sa landong sang kamatayon, sa pagtuytuy sang aton mga tiil sa dalanon sang paghidait.”

80Kag nagtubo ang bata kag nagbakud sa espiritu, kag nagpuyo sa kamingawan tubtub sa adlaw sang iya pagpahayag sa Israel.