Luke 6 — Ilonggo (Ang Biblia (1982))

1Sa isa ka adlaw nga inugpahuway, sang nagalakat sia sa mga katamnan sang uyas, ang iya mga gintoton-an nagpangutul sing mga uhay kag nagkaon, nga nagakisikisi sini sa ila mga kamut.

2Apang ang pila sang mga Fariseo nagsiling, “Ngaa bala nagahimo kamo sang indi tugut nga pagbuhaton sa adlaw nga inugpahuway?”

3Kag si Jesus nagsabat sa ila, “Wala gid bala ninyo mabasahi ang ginhimo ni David sang sia gingutum, sia kag ang mga kaupud niya:

4paano nga nagsulud sia sa balay sang Dios, kag nagkuha kag nagkaon sang mga tinapay nga pahayag sa Dios, nga indi tugut nga kaonon luwas sa mga sacerdote lamang, kag naghatag man sini sa mga kaupud niya?”

5Kag nagsiling sia sa ila, “Ang Anak sang tawo ginoo sa adlaw nga inugpahuway.”

6Sa isa na man ka adlaw nga inugpahuway, sang nagsulud sia sa sinagoga kag nagpanudlo, may tawo didto nga ang iya too nga kamut itus.

7Kag ang mga escriba kag ang mga Fariseo nagpanilag sa iya, kon magapang-ayo sia sa adlaw nga inugpahuway, agud nga makakita sila sing ikasumbung batok sa iya.

8Apang nakahibalo sia sang ila mga hunahuna, kag nagsiling sia sa tawo nga itus ang iya kamut, “Tindug kag patunga ka.” Kag nagtindug sia kag nagpatunga.

9Kag si Jesus nagsiling sa ila, “Nagapamangkot ako sa inyo, tugut bala sa adlaw nga inugpahuway ang paghimo sing maayo ukon paghimo sing malain, ang pagluwas sing kabuhi ukon ang paglaglag sini?”

10Kag nagtolok sia sa palibut sa ila nga tanan, kag nagsiling sa iya, “Untaya ang imo kamut.” Kag sia naghimo sing subong, kag ang iya kamut nahaulian.

11Apang napuno sila sing kasingkal kag nagsinapul sila kon ano ang mahimo nila kay Jesus.

12Sa sining mga adlaw nagkadto sia sa mga bakolod sa pagpangamuyo; kag nagpadayon sia sa bug-os nga gab-i sa pagpangamuyo sa Dios.

13Kag sang adlaw na, gintawag niya ang iya mga gintoton-an, kag nagpili sia sa ila sing napulog duha, nga ginhingalanan niya nga mga pinadala;

14si Simon, nga ginhingalanan niya si Pedro, kag si Andres nga utud niya, kag si Santiago kag si Juan, kag si Felipe, kag si Bartolome,

15kag si Mateo, kag si Tomas, kag si Santiago nga anak ni Alfeo, kag si Simon nga ginhingalanan ang Zelotes,

16kag si Judas nga anak ni Santiago, kag si Judas Iscariote, nga nanginmaluib.

17Kag nagdolhog sia kaupud nila kag nagtindug sa duug nga matapan, kaupud ang daku nga punsok sang iya mga gintoton-an kag ang daku nga kadam-an sang katawohan gikan sa bug-os nga Judea kag Jerusalem kag sa baybayon sang Tiro kag Sidon, nga nag-abut sa pagpamati sa iya kag sa pagpaayo sang ila mga balatian;

18kag ang mga ginasakit sang mga espiritu nga dimatinlo nag-ayo.

19Kag ang bug-os nga kadam-an nagtinguha sa pagtandug sa iya, kay ang gahum naggowa sa iya kag nag-ayo sa ila tanan.

20Kag nagtolok sia sa iya mga gintoton-an, kag nagsiling: “Bulahan kamo nga mga imol, kay inyo ang ginharian sang Dios.

21“Bulahan kamo nga mga ginagutum karon, kay busgon kamo. Bulahan kamo nga mga nagahibi karon, kay magakadlaw kamo.

22“Bulahan kamo kon dumtan kamo sang mga tawo, kag kon sobolon kamo sa ila kag kon pasipalahan kamo, kag isikway ang inyo ngalan subong nga malaut, bangud sa Anak sang tawo!

23Hinugyaw kamo sa sadtong adlaw, kag tumbo sa kalipay; kay yari karon, ang inyo balus daku sa langit; kay sa amo nga bagay naghimo ang ila mga ginikanan sa mga manalagna.

24“Apang kailo kamo nga mga manggaranon, kay nabaton na ninyo ang paglipay sa inyo.

25“Kailo kamo nga mga busug karon, kay gutumon kamo. “Kailo kamo nga nagakadlaw karon, kay magakasakit kamo kag magahibi.

26“Kailo kamo, kon ang tanan nga tawo magahambal sing maayo nahanungud sa inyo, kay sa amo nga bagay naghimo ang ila mga ginikanan sa dimatuud nga mga manalagna.

27“Apang nagasiling ako sa inyo nga nagapamati, Higugmaa ang inyo mga kaaway, buhata ang maayo sa mga nagadumut sa inyo,

28pakamaayoha ang mga nagapakamalaut sa inyo, pangamuyo kamo tungud sa mga nagapasipala sa inyo.

29Sa nagatampa sa imo sa pisngi, itaya man ang isa; kag sa nagakuha sang imo kunup dili pagdumilii sang imo bayo man.

30Hatagi ang tagsatagsa nga nagapangayo sa imo; kag sa nagakuha sang imo mga pagkabutang, dili pagbawi-a sila.

31Kag ang buut ninyo nga himoon sa inyo sang mga tawo, himoa man ninyo sa ila ang subong.

32“Kon kamo maghigugma sa mga nagahigugma sa inyo, ano bala ang pasalamatan sa inyo? Kay bisan pa ang mga makasasala nagahigugma sa mga nagahigugma sa ila.

33Kag kon maghimo kamo sing maayo sa mga nagahimo sing maayo sa inyo, ano bala ang pasalamatan sa inyo? Kay bisan pa ang mga makasasala nagahimo sing subong.

34Kag kon kamo magpahulam sa mga may ginapa-abut kamo nga batonon, ano bala ang pasalamatan sa inyo? Bisan pa ang mga makasasala nagapahulam sa mga makasasala, sa pagbaton liwat sing amo man nga kadamuon.

35Apang higugmaa ang inyo mga kaaway, kag himoi sila sing maayo, kag magpahulam kamo, nga wala nagapaabut nga ulian; kag ang inyo balus mangindaku, kag mangin-anak kamo sang Labing Mataas; kay sia mainayohon sa mga dimapasalamaton kag mga malaut.

36Magmaloloy-on kamo, subong nga ang inyo Amay maloloy-on.

37“Dili kamo maghukom, kag dili kamo paghukman; dili kamo magtagudili, kag dili kamo pagtagudilian; magpatawad kamo, kag kamo patawaron;

38hatag kamo, kag kamo hatagan; sukub nga maayo, dinasok, naligoligo, nga nagaawas, ihatag nila sa imo sabak. Kay sa talaksan nga ginataksan ninyo takson kamo liwat.”

39Nagpamolong man sia sa ila sing paanggid: “Makatuytuy bala ang bulag sa bulag? Indi bala maholog sila nga duha sa boho?

40Ang gintoton-an indi labi sa iya manunudlo, apang ang tagsatagsa sang mahimpit sia manginsubong sang iya manunudlo.

41Ngaa bala ginamulalong mo ang puling nga yara sa mata sang imo utud, apang wala nagasapak sang balayanon nga yara sa imo kaugalingon nga mata?

42Ukon paano bala ang pagkasiling mo sa imo utud, ‘Utud, ipakuha sa akon ang puling nga yara sa imo mata,’ sang ikaw gid wala nagamulalong sang balayanon nga yara sa imo kaugalingon nga mata? Ikaw nga salimpapaw, kuhaa anay ang balayanon sa imo kaugalingon nga mata, kag ugaling makakita ka sing maayo sa pagkuha sang puling sa mata sang imo utud.

43“Kay walay maayo nga kahoy nga nagapatubas sing malain nga bunga, ukon malain nga kahoy nga nagapatubas sing maayo nga bunga;

44kay ang tagsa ka kahoy makilala sa iya kaugalingon nga bunga. Kay gikan sa mga talongon wala nagatipon ang mga tawo sing mga higos, ukon sa sapinit nagapopo sing uvas.

45Ang maayong tawo sa maayong bahandi sang iya tagiposoon nagapagowa sang maayo, kag ang malaut nga tawo sa malaut nga bahandi nagapagowa sang malaut; kay sa kabuganaan sang tagiposoon nagapamolong ang iya baba.

46“Ngaa bala ginatawag ako ninyo ‘Ginoo, Ginoo,’ kag wala kamo nagahimo sang mga butang nga akon ginasiling?

47Ang tagsatagsa nga nagakari sa akon kag nagapamati sang akon mga polong kag nagatuman sa ila, ipakita ko sa inyo kon kay sin-o kaangay sia;

48kaangay sia sa tawo nga nagatukud sing balay, nga nagkutkut kag ginpadalum niya, kag nagbutang sang sadsaran sa igang; kag sang nagbaha, ang sulog nagsampi batok sadtong balay, kag wala makauyog sini, bangud nga natukud ini sing maayo.

49Apang ang nagapamati kag wala nagatuman kaangay sa tawo nga nagtukud sa duta sing balay nga walay sadsaran; ang sulog nagsampi batok sa sini, kag sa gilayon napukan ini, kag daku ang kalaglagan sadtong balay.”