1 Kings 15

Ilokano (Ti Biblia (1973))

← Chapter 14 Jump to: Chapter 16 →

1Ket iti maicasangapulo ket walo a tawen ni ari Jeroboam nga anac ni Nabat nangrugi ni Abiam a nagari iti Juda.

2Tallo a tawen ti panagarina sadi Jerusalem: ket ti nagan ni inana Maaca nga anac ni Abisalom.

3Ket isu nagna cadagiti amin a basbasol ni amana, nga inaramidna idi casacbayanna; ket ti pusona saan a naimbag ken Jehova a Diosna, a cas ti puso ni David nga amana.

4Nupay casta gapu ken David ni Jehova a Diosna isu ti iniccanna ti maysa a pagsilawan sadi Jerusalem, tapno maitanoc ti anacna iti calpasanna, ken tapno mapatibker ti Jerusalem;

5Ta ni David inaramidna daydi a nalinteg cadagiti mata ni Jehova, ket saan a simmiasi iti aniaman a banag nga imbilinna kencuana cadagiti amin nga aldaw ti panagbiagna, malacsid laeng ti maipanggep ken Uria a Heteo.

6Ket adda idi gubat ken ni Roboam ken ni Jeroboam cadagiti amin nga al-aldaw ti panagbiagda.

7Ket ti matda cadagiti aramid ni Abiam, ken amin nga inaramidna, saanda aya a naisurat iti libro dagiti cronicas dagiti ar-ari ti Juda? Ket adda idi gubat cada Abiam ken ni Jeroboam.

8Ket ni Abiam nakiturog cadagiti ammana; ket isu intabonda iti ili ni David: ket ni Asa nga anacna nagari iti saadna.

9Ket iti maicaduapulo a tawen ni Jeroboam nga ari ti Israel nangrugi ni Asa a nagari iti Juda.

10Ket uppat a pulo ket maysa a tawen a nagari sadi Jerusalem: ket ti nagan ni inana Maaca nga anac ni Abisalom.

11Ket ni Asa inaramidna daydi a naimbag cadagiti mata ni Jehova, a cas iti inaramid ni David nga amana.

12Ket isu pinagtalawna dagiti sodomitas iti daga, ket iniccatna amin dagiti ladladawan nga inaramid dagiti ammana.

13Ken castamet ni Maaca nga inana isu iniccatna iti kinareina, ta isu nagaramid ti maysa a nacarimrimon a ladawan a maipaay iti maysa nga Asherab; ket ni Asa pinucanna ti ladawanna, ket pinuuranna idiay waig a Cedron.

14Ngem dagiti nangato a disdisso saanda a naiccat: nupay casta ti puso ni Asa naimbag unay ken Jehova cadagiti amin nga al-aldawna.

15Ket isu inserrecna iti balay ni Jehova dagiti banbanag nga impaay ni amana, ken dagiti banbanag nga isu met laeng impaayna, pirac, ken balitoc, ken al-alicamen.

16Ket adda idi gubat cada Asa ken ni Baasa nga ari ti Israel cadagiti amin nga al-aldawda.

17Ket ni Baasa nga ari ti Israel simmang-at a bumusor iti Juda, ket binangonna ti Rama, tapno dina palubosan ti uray maysa a rumuar wenno mapan ken Asa nga ari ti Juda.

18Idi a casta ni Asa innalana amin ti pirac ken ti balitoc a natidda cadagiti gamgameng ti balay ni Jehova, ken cadagiti gamgameng ti balay ti ari, ket inyawatna ida iti ima dagiti ad-adipenna; ket ni ari Asa imbaonna ida ken Ben-adad, nga anac ni Tabrimon, nga anac ni Hezion, nga ari ti Siria, nga agnaed sadi Damasco, a kinunana,

19Adda maysa a pagnomoanan caniac ken sica, ken ni amac ken ni amam: adtoy, ibaonco kenca ti maysa nga sagut a pirac ken balitoc; inca, dadaelem ti tulagmo ken Baasa nga ari ti Israel, tapno isu pumanaw caniac.

20Ket ni Ben-adad impangagna ni ari Asa, ket imbaonna dagiti cacapitan dagiti buyotna a bumusor cadagiti il-ili ti Israel, ket kinabilna ti Ahion, ken ti Dan, ken ti Abelbeth-maaca, ken ti amin a Cinnerot, agraman iti amin a daga ti Neftali.

21Ket naaramid, idi a ni Baasa nangngeganna, binay-anna a bangonen ti Rama, ket nagnaed sadi Tirsa.

22Idi a casta ni ari Asa nangaramid ti maysa a panangiwarragawag iti amin a Juda: awan nalacsid: ket isuda binunagda dagiti batbato ti Rama, ken ti taricayona, a pinangbangon ni Baasa; ket ni ari Asa binangonna cadagitoy ti Gabaa ti Benjamin, ken ti Mizpa.

23Ket ti matda cadagiti amin nga ar-aramid ni Asa, ken amin a pannacabalinna, ken amin nga inaramidna, ken dagiti il-ili a binangonna, saanda aya a naisurat iti libro dagiti cronicas dagiti ar-ari ti Juda? Ngem iti tiempo ti kinalacayna isu nagsakit cadagiti sacana.

24Ket ni Asa nakiturog cadagiti ammana, ket naitabon a nainayon cadagiti ammana iti ili ni David nga amana; ket ni Josafat nga anacna nagari iti saadna.

25Ket ni Nadab nga anac ni Jeroboam nangrugi a nagari iti Israel iti maicadua a tawen ni Asa nga ari ti Juda; ket isu nagari iti Israel iti dua a tawen.

26Ket isu inaramidna daydi a dakes iti imatang ni Jehova, ket nagna iti dalan ni amana, ken iti basolna isu a pinamagbasolna iti Israel.

27Ket ni Baasa nga anac ni Ahias, iti balay ni Issacar, immalsa a bumusor kencuana; ket isu kinabil ni Baasa sadi Gibbeton, isu a biang idi dagiti Filisteos; ta ni Nadab ken amin nga Israel linacubda ti Gibbeton.

28Ket iti maicatlo a tawen ni Asa nga ari ti Juda isu ti panangpatay ni Baasa kencuana, ket nagari iti saadna.

29Ket naaramid nga, apaman nga isu ti ari, isu kinabilna ti amin a balay ni Jeroboam; awan ti tiniddana ken Jeroboam nga aniaman nga aganges, inggana iti panangracracna kencuana: a mayannurot iti sao ni Jehova, isu a sinaona iti pannacaaramat ni adipenna nga Ahias a Silonita;

30A gapu cadagiti basbasol ni Jeroboam isu a nacabasolanna, ken isu a pinamagbasolna iti Israel, gapu iti panggargarina isu a pananggargarina nga agpungtot ni Jehova, ti Dios ti Israel.

31Ket ti matda cadagiti aramid ni Nadab, ken amin nga inaramidna, saanda aya a naisurat iti libro dagiti cronicas dagiti ar-ari ti Israel?

32Ket adda idi gubat cada Asa ken ni Baasa nga ari ti Israel cadagiti amin nga al-aldawda.

33Iti maicatlo a tawen ni Asa nga ari ti Juda nangrugi ni Baasa nga anac ni Ahias a nagari iti amin nga Israel sadi Tirsa, ket nagari iti duapulo ket uppat a tawen.

34Ket isu inaramidna daydi a dakes iti imatang ni Jehova, ket nagna ti dalan ni Jeroboam, ken iti basolna isu a pinamagbasolna iti Israel.

← Chapter 14 Jump to: Chapter 16 →