1 Kings 16

Ilokano (Ti Biblia (1973))

← Chapter 15 Jump to: Chapter 17 →

1Ket ti sao ni Jehova immay ken Jehu nga anac a lalaki ni Hanani a maibusor ken Baasa, a cunana,

2Agsipud ta siac intan-occa nanipud iti tapoc, ken inaramidca a pangulo iti ilic nga Israel, ket sica nagnaca iti dalan ni Jeroboam, ken pinagbasolmo ti ilic nga Israel, tapno gargariennac nga agpungtot cadagiti basbasolmo;

3Adtoy, siac talipupusecto a caycayen ni Baasa ken ti balayna; ket aramidecto ti balaymo a cas iti balay ni Jeroboam nga anac ni Nabat.

4Ti matay ken Baasa iti ili lamutento dagiti aso; ket ti matay kencuana iti let-ang lamutento dagiti tumatayab ti tangatang.

5Ket ti matda cadagiti aramid ni Baasa, ken aniaman nga inaramidna, ken ti pannacabalinna, saanda aya a naisurat iti libro dagiti cronicas dagiti ar-ari ti Israel?

6Ket ni Baasa nakiturog cadagiti ammana, ket naitabon sadi Tirsa; ket ni Ela nga anacna nagari iti saadna.

7Ken castamet iti pannacaaramat ni mammadto a Jehu nga anac ni Hanani immay ti sao ni Jehova a maibusor ken Baasa, ken maibusor iti balayna, agpadpada gapu iti amin a dakes nga isu inaramidna iti imatang ni Jehova, tapno panggargarina kencuana nga agpungtot iti aramid dagiti imana iti casasaad a cas iti balay ni Jeroboam ken gapu iti panangcabilna kencuana.

8Iti maicaduapulo ket innem a tawen ni Asa nga ari ti Juda nangrugi ni Ela nga anac ni Baasa a nagari iti Israel sadi Tirsa, ket nagari iti dua a tawen.

9Ket ni adipenna a Zimri, a capitan ti cagudua dagiti lugluganna, immalsa a bumusor kencuana. Ket isu adda sadi Tirsa, nga agin-inum nga agbartec idiay balay ni Arsa, isu a mayordomo idi ti balayna sadi Tirsa:

10Ket ni Zimri simrec ket isu kinabilna, ken pinatayna, iti maicaduapulo ket pito a tawen ni Asa nga ari ti Juda, ket nagari iti saadna.

11Ket naaramid idi nga isu nangrugi a nagari, apaman nga isu nagtugaw iti tronona, nga isu kinabilna ti amin a balay ni Baasa: saan a nangitidda ti uray maysa nga ubing a lalaki, uray cacabagianna, uray dagiti gagayyemna.

12Iti casta ni Zimri dinadaelna ti amin a balay ni Baasa, a mayannurot iti sao ni Jehova, isu a sinaona a maibusor ken Baasa iti pannacaaramat ni Jehu a mammadto,

13Gapu cadagiti amin a basbasol ni Baasa, ken cadagiti basbasol ni Ela nga anacna a lalaki, isu a nacabasolanda, ken isu a pinamagbasolda iti Israel, a panggargarida ken Jehova, ti Dios ti Israel, nga agpungtot cadagiti kinaubbawda.

14Ket ti matda cadagiti aramid ni Ela, ken amin nga inaramidna, saanda aya a naisurat iti libro dagiti cronicas dagiti ar-ari ti Israel?

15Iti maicaduapulo ket pito a tawen ni Asa nga ari ti Juda ni Zimri nagari iti pito nga aldaw sadi Tirsa. Ket dagiti tattao nagpacarsoda a bumusor iti Gebbeton, isu a biang dagiti Filisteos.

16Ket dagiti tattao a nagpacarso nangngeganda a nacuna, Ni Zimri immalsa, ket kinabilna met ti ari: gapuna nga amin nga Israel inaramidna ni Omri, a capitan ti buyot, nga ari iti Israel iti daydi nga aldaw idi pacarso.

17Ket ni Omri simmang-at a naggapu ti Gebbeton, ket ti amin nga Israel caduana, ket isuda linacubda ti Tirsa.

18Ket naaramid, idi a ni Zimri nakitana a ti ili naalan, nga isu simrec iti cangatoan a disso ti balay ti ari, ket pinuuranna ti balay ti ari iti rabawna iti apuy, ket natay.

19Ta gapu cadagiti basbasolna isu a nacabasolanna iti panangaramid iti daydi a dakes iti imatang ni Jehova, iti pannagnana iti dalan ni Jeroboam, ken iti basolna nga inaramidna, a pinamagbasolna iti Israel.

20Ket ti matda cadagiti aramid ni Zimri, ken ti yaalsana nga inaramidna, saanda aya a naisurat iti libro dagiti cronicas dagiti ar-ari ti Israel?

21Idi a casta dagiti tattao ti Israel nabingayda iti dua a capaset: ti cagudua dagiti tattao simmurotda ken Tibni nga anac a lalaki ni Ginet, tapno isu ti aramidenda nga ari; ket ti cagudua simmurot ken Omri.

22Ngem dagiti tattao a simmurot ken Omri inaladaganda dagiti tattao a simmurot ken Tibni nga anac ni Ginet: iti casta ni Tibni natay, ket ni Omri nagari.

23Iti maicatlopulo ket maysa a tawen ni Asa nga ari ti Juda nangrugi ni Omri a nagari iti Israel, ket nagari iti sangapulo ket dua a tawen: innem a tawen a nagari sadi Tirsa.

24Ket isu ginatangna ken Semer ti turod a Samaria iti dua a talento a pirac; ket isu nangbangon iti rabaw ti turod, ket ginaladanna ti nagan ti ili isu a binangonna, iti mayannurot iti nagan ni Semer, nga akincua iti turod a Samaria.

25Ket ni Omri inaramidna daydi a dakes iti imatang ni Jehova, ket nagaramid a dacdakes pay ngem iti amin nga immun-una ngem isu.

26Ta isu nagna iti amin a dalan ni Jeroboam nga anac ni Nabat, ken cadagiti basbasolna isu a pinamagbasolna iti Israel, a panggargarina ken Jehova, ti Dios ti Israel, nga agpungtot cadagiti kinaubbawda.

27Ket ti matda cadagiti aramid ni Omri isu nga inaramidna, ken ti pannacabalinna isu nga impakitana, saanda aya a naisurat iti libro dagiti cronicas dagiti ar-ari ti Israel?

28Iti casta ni Omri nakiturog cadagiti ammana, ket naitabon sadi Samaria; ket ni Acab nga anacna nagari iti saadna.

29Ket iti maicatlopulo ket walo a tawen ni Asa nga ari ti Juda nangrugi ni Acab nga anac ni Omri a nagari iti Israel: ket ni Acab nga anac ni Omri nagari iti Israel sadi Samaria iti duapulo ket dua a tawen.

30Ket ni Acab nga anac ni Omri inaramidna daydi a dakes iti imatang ni Jehova a nacarcaro ngem amin nga immun-una ngem isu.

31Ket naaramid, a cas la maysa a nalag-an a banag kencuana no magna cadagiti basbasol ni Jeroboam nga anac ni Nabat, nga isu innalana nga asawa ni Jezabel nga anac ni Etnobaal nga ari dagiti Sidonio, ket napan ket nagservi ken Baal, ken nagrucbab kencuana.

32Ket isu namatacder iti maysa nga altar a maipaay ken Baal iti balay ni Baal, isu a pinutarna sadi Samaria.

33Ket ni Acab nagaramid iti Asherah; ken ni Acab nangaramid pay iti adadda a panggargarina nga agpungtot ni Jehova, ti Dios ti Israel, ngem iti amin dagiti ari ti Israel nga immununa ngem isu.

34Cadagiti al-aldawna binangon ni Hiel a taga Beth-el ti Jerico: isu incabilna ti pammuonna iti pannacatay ni Abiram nga inauna nga anacna, ket binangonna dagiti ruruanganna iti pannacatay ti inaudian nga anacna a Segub, a mayannurot iti sao ni Jehova, isu a sinaona iti pannacaaramat ni Josue nga anac ni Nun.

← Chapter 15 Jump to: Chapter 17 →