1 Kings 18 — Ilokano (Ti Biblia (1973))

1Ket naaramid iti calpasan ti adu nga al-aldaw, a ti sao ni Jehova immay ken Elias, iti maicatlo a tawen, a kinunana, Inca, agparangca ken Acab; ket siac ibaonconto ti tudo iti daga.

2Ket ni Elias napan nagparang ken Acab. Ket ti bisin nacaro sadi Samaria.

3Ket ni Acab inayabanna ni Abdias, nga isu ti mayordomo iti balay. (Ket ni Abdias sibubuteng unay iti Dios:

4Ta casta idi, idi a ni Jezabel iniccatna dagiti mammadto ni Jehova, a ni Abdias nangala cadagiti sangagasut a mammadto, ket inlemmengna a saglilimapulo iti maysa nga rukib, ket tinaraonanna ida iti tinapay ken danum.)

5Ket ni Acab kinunana ken Abdias, Pagnaem ti daga, cadagiti amin nga ub-ubbog ti danum, ken cadagiti amin nga wawaig, bareng no datayo macasaractayo ti roroot ket maispaltayo ti biag dagiti cabayo ken mulo, tapno saantayo a mapucaw amin dagiti animal.

6Iti casta isuda biningayda ti daga cadacuada tapno isu ti pagnaenda: ni Acab napan a maymaysa iti maysa a dalan, ket ni Abdias napan iti sabali a dalan nga is-isu.

7Ket idi a ni Abdias adda iti dalan, adtoy, ni Elias simmabet kencuana: ket isu ti nabigbigna, ket inrucnoyna ti rupana, ket kinunana, Sica, ni apoc nga Elias?

8Ket isu simmungbat kencuana, Siac: inca, ibagam ken apom, Adtoy, ni Elias adda ditoy.

9Ket isu kinunana, Ania ti nacabasolac, tapno sica cayatmo a yawat ti adipenmo iti ima ni Acab, tapno patayennac?

10Cas ni Jehova a Diosmo sibibiag, awan nacion wenno pagarian, a saan a nagpasapulan kenca ti apoc: ket idi isuda kinunada, Isu awan ditoy, isu pinagsapatana ti pagarian ken nacion, nga isuda saandaca a nasaracan.

11Ket ita cunam, Inca, ibagam iti apom, Adtoy, ni Elias adda ditoy.

12Ket maaramidto, apaman a pinanawanca, a ti Espiritu ni Jehova ipannacanto iti diac ammo; ket iti casta no mapanac ket ibagac ken Acab, ket isu dinacanto masaracan, isu patayennacto: ngem siac nga adipenmo agbutengac ken Jehova nanipud kinaubingco.

13Saan aya a naibaga iti apoc ti inaramidco idi ni Jezabel pinatayna dagiti mammadto ni Jehova, no casano ti panangilemmengco iti sangagasut a lalaki a mammadto ni Jehova a sinaglilimapulo iti maysa a rukib, ket tinaraonac ida iti tinapay ken danum?

14Ket ita sica cunam, Inca, ibagam ken apom, Adtoy, ni Elias adda ditoy; ket isu patayennacto.

15Ket ni Elias kinunana, Cas sibibiag ni Jehova dagiti buybuyot, a iti sangona agtatacderac, siac kinapudnona nga agparangacto kencuana ita nga aldaw.

16Iti casta ni Abdias napan tapno sabatenna ni Acab, ken imbagana kencuana: ket ni Acab napan tapno sabatenna ni Elias.

17Ket naaramid, idi a ni Acab nakitana ni Elias, a ni Acab kinunana kencuana, Sica aya, sica a manangriribuc iti Israel?

18Ket isu simmungbat, Siac saanco a riniribuc ti Israel; no di ket sica, ken ti balay ni amam, iti panangbaybay-ayo cadagiti bilbilin ni Jehova, ket sica simmurotca cadagiti Baales.

19Ita ngarud agbaonca, ket urnongem caniac ti amin nga Israel idiay bantay Carmelo, ken dagiti mammadles ni Baal nga uppat a gasut ket limapulo, ken dagiti mammadles dagiti Asherah nga uppat a gasut, isuda a mangmangan iti lamesaan ni Jezabel.

20Iti casta ni Acab nagbaon cadagiti amin nga annac ti Israel, ken inurnongna dagiti mammadles idiay bantay Carmelo.

21Ket ni Elias immasideg iti amin nga umili, ket kinunana, Agpapan caano ti panagallaallayo iti dua a panunot? no ni Jehova isu ti Dios, sumurotcayo kencuana; ngem no ni Baal, sumurotcayo ngarud kencuana. Ket ti umili saan a simmungbat kencuana iti uray maysa a sao.

22Idi a casta kinuna ni Elias iti umili, Siac, sisiac laeng, ti natda a maymaysa a mammadto ni Jehova; ngem dagiti mammadles ni Baal uppat a gasut ket limapuloda a lallaki.

23Iccandacami iti dua a vaca; ket agpilida a maipaay cadacuada ti maysa a vaca, ket isu ti rangrangcayenda, ket isu ti icabilda iti rabaw ti cayo, ket saanda nga iccan ti apuy iti babana; ket siac isaganacto ti sabali a vaca, ket isu ti icabilco iti rabaw ti cayo, ket diac iccan ti apuy iti babana.

24Ket awaganyo ti nagan ti diosyo, ket siac awagacto ti nagan ni Jehova: ket ti Dios a sumungbat babaen ti apuy, dayta isu coma ti Dios. Ket ti amin nga umili simmungbat ket kinunana, Nasayaat a pannacasao.

25Ket ni Elias kinunana cadagiti mammadles ni Baal, Pumilicayo ti maysa a vaca a maipaay cadacayo, ket isu ti isaganayo nga umuna; ta dacayo aducayo; ket awaganyo ti nagan ti diosyo, ngem dicayo mangicabil ti apuy iti babana.

26Ket isuda innalada ti vaca a naited cadacuada, ket isu ti insaganada, ket inawaganda ti nagan ni Baal nanipud agsapa inggana iti matoon, a kinunada, O Baal, denggennacami. Ngem awan idi ti timec, wenno asinoman a simmungbat. Ket isuda naglaglagtoda iti denna ti altar a naaramid.

27Ket naaramid iti matoon, a ni Elias rinabrabacna ida, ket kinunana, Umkiscayo iti natbag; ta isu maysa a dios: isu agpanpanunot, wenno isu nagpaing, wenno isu adda iti maysa a pannagna, wenno nalabit isu matmaturog ket masapul a riingen.

28Ket isuda nagickisda iti natbag, ket sinugsugatda dagiti bagbagida met laeng iti immoco ken durus, cas iti cadawyanda inggana a ti dara nagarubus cadacuada.

29Ket casta idi, idi a napalabes ti matoon, nga isuda nagpadlesda inggana iti tiempo ti panangisaclang iti daton iti malem; ngem awan idi ti timec, wenno siasinoman a simmungbat, wenno siasinoman a nangicancano.

30Ket ni Elias kinunana iti amin nga umili, Umasidegcayo caniac; ket amin nga umili immasideg kencuana. Ket isu tinarimaanna ti altar ni Jehova a narba idi.

31Ket ni Elias nangala iti sangapulo ket dua a bato, a mayannurot iti bilang dagiti caputotan dagiti annac ni Jacob, a kencuana immay ti sao ni Jehova, a kinunana, Israel isunto ti naganmo.

32Ket cadagiti bato isu namatacder ti maysa nga altar iti nagan ni Jehova, ket isu nangaramid ti maysa a canal iti aglicmut ti altar, a ti cadackelna launenna ti dua casucat a bucbukel.

33Ket isu incabilna ti cayo a naurnos, ket rinangrangcayna ti vaca, ket isu ti incabilna iti rabaw ti cayo. Ket isu kinunana, Punnoenyo dagiti uppat a caramba iti danum, ket isu ti ibuyatyo iti daton a mapuuran, ken iti cayo.

34Ket isu kinunana, Aramidenyo iti maicadua a daras; ket isu ti inaramidda iti maicadua a daras. Ket isu kinunana, Isu ti aramidenyo iti maicatlo a daras; ket isu ti inaramidda iti maicatlo a daras.

35Ket ti danum nagayus iti aglicmut iti altar; ket pinunnona met ti canal iti danum.

36Ket naaramid iti tiempo ti panangidatag ti daton iti malem, a ni Elias a mammadto immasideg, ket kinunana, O Jehova, a Dios ni Abraham, ni Isaac, ken ni Israel, pabigbigca iti daytoy nga aldaw a sica ti Dios iti Israel, a siac ti adipenmo, ket siac inaramidco amin dagitoy a banbanag gapu iti saom.

37Ipangagnac, O Jehova, ipangagnac, tapno daytoy nga umili maammoanna a sica, Jehova, Diosca, ket sica pinagsublim ti pusoda.

38Idin ti apuy ni Jehova nagtinnag, ket rinunawna ti daton a mapuuran, ken ti cayo, ken dagiti bato, ken ti tapoc, ket dinilpatanna ti danum nga adda iti canal.

39Ket idi a ti amin nga umili nakitada, isuda nagpaclebda: ket kinunada, Ni Jehova isu ti Dios; ni Jehova isu ti Dios.

40Ket ni Elias kinunana cadacuada, Alaenyo dagiti mammadles ni Baal; awan coma ti uray maysa cadacuada a macatalaw. Ket isuda innalada ida; ket ni Elias insalogna ida iti waig a Cison, ket pinatayna ida sadiay.

41Ket ni Elias kinunana ken Acab, Sumang-atca, manganca ken uminumca; ta adda carasacas ti adu unay a tudo.

42Iti casta ni Acab simmang-at a mangan ken uminum. Ket ni Elias simmang-at agingga iti toctoc ti Carmelo; ket isu nagrucob iti daga ken incabilna ti rupana iti baet dagiti tumengna.

43Ket isu kinunana idi adipenna, Sumang-atca ita, cumitaca a sumango iti taaw. Ket isu simmang-at, ket kimmita, ket kinunana, Awan ti uray ania. Ket isu kinunana, Incamanen a maminpito daras.

44Ket naaramid iti maicapito a daras, nga isu kinunana, Adtoy, ngumato ti maysa nga ulep iti taaw, a cas iti cabassit ti maysa nga ima ti lalaki. Ket isu kinunana, Sumang-atca, ibagam ken Acab, Isaganam ti luganmo, ket sumalogca, tapno ti tudo saannaca a pasardengen.

45Ket naaramid iti apagbiit, a dagiti langit nagsipngetda cadagiti ulep ken angin, ket adda dackel a tudo. Ket ni Acab limmugan, ket napan sadi Jezreel:

46Ket ti ima ni Jehova adda ken Elias; ket isu binaricsanna dagiti lomona, ket nagtaray iti una ni Acab inggana iti ruangan ti Jezreel.