1 Kings 19

Ilokano (Ti Biblia (1973))

← Chapter 18 Jump to: Chapter 20 →

1Ket ni Acab imbagana ken Jezabel ti amin nga inaramid ni Elias, ken no casano ti panamatayna cadagiti amin a mammadles babaen iti campilan.

2Idi casta ni Jezabel nagbaon ti maysa a babaonen ken Elias, a kinunana, Casta ti aramiden dagiti didios caniac, ken adadda pay, no diac aramiden ti biagmo a cas iti biag ti maysa cadacuada agingga iti bigat iti daytoy a tiempo.

3Ket idi a nakitana daydiay, isu timmacder, ket napan gapu iti biagna, ket dimteng sadi Beer-seba, isu a biang ti Juda, ket imbatina ti adipenna sadiay.

4Ngem isu met laeng napan a nagnagna iti maysa nga aldaw cadagiti let-ang, ket immay ket nagtugaw iti siroc ti maysa a cayo nga enebro: ket isu dinawatna a maipaay kencuana nga isu matay coma, ket kinunana, Umdasen; ita, O Jehova, alaemon ti biagco; ta siac saanac a naimimbag ngem cadagiti ammac.

5Ket isu nagidda ket naturog iti siroc ti maysa a cayo nga enebro; ket, adtoy, maysa nga angel ti kimmalbit kencuana, ket kinunana kencuana, Tumacderca ket manganca.

6Ket isu kimmita, ket, adtoy, adda iti oloananna ti maysa a bibingca a naluto iti rabaw dagiti beggang, ken sangagorgorita a danum. Ket isu nangan ken imminum, ket nagidda manen.

7Ket ti angel ni Jehova immay manen iti maicadua a daras, ket kinalbitna, ket kinunana, Tumacderca ket manganca, ta ti pannagna dackel unay a maipaay kenca.

8Ket isu timmacder, ket nangan ken imminum, ket napan iti pigsa dayta a taraon iti uppat a pulo nga aldaw ken uppat a pulo a rabii sadi Horeb a bantay ti Dios.

9Ket isu dimteng sadiay iti maysa a rukib ket nagdagus sadiay; ket, adtoy, ti sao ni Jehova immay kencuana, ket kinunana kencuana, Ania ti aramidem ditoy, Elias?

10Ket isu kinunana, Siac naimonac unay idi a maipaay ken Jehova, ti Dios dagiti buybuyot; ta dagiti annac ti Israel inidianda ti tulagmo, rinebbada dagiti altarmo, ket pinatayda dagiti mammadtom iti campilan: ket siac, sisiac laeng, ti natda; ket isuda sapsapulenda ti biagco, tapno iccatenda.

11Ket isu kinunana, Rumuarca, ket agtacderca iti rabaw ti bantay iti sango ni Jehova. Ket, adtoy, ni Jehova limmabas, ket maysa a dackel ken napigsa nga angin binessangna dagiti banbantay, ket binuracna dagiti batbato iti sango ni Jehova; ngem ni Jehova awan idi iti angin: ket iti calpasan ti angin maysa a gingined; ngem ni Jehova awan idi iti gingined:

12Ket iti calpasan ti gingined maysa nga apuy; ngem ni Jehova awan idi iti apuy: ket iti calpasan ti apuy maysa a bassit a naalumamay a timec.

13Ket casta idi, idi a ni Elias nangngegna, nga isu inabbonganna ti rupana idi cagayna, ket napan ket nagtacder iti pagsercan iti rukib. Ket, adtoy, immay ti maysa a timec kencuana, ket kinunana, Ania ti aramidem ditoy, Elias?

14Ket isu kinunana, Siac naimonac unay a maipaay ken Jehova, ti Dios dagiti buybuyot; ta dagiti annac ti Israel inidianda ti tulagmo, rinebbada dagiti altarmo, ken pinatayda dagiti mammadtom iti campilan: ket siac, sisiac laeng, ti natda; ket isuda sapsapulenda ti biagco, tapno iccatenda.

15Ket ni Jehova kinunana kencuana, Inca, agsublica iti dalanmo iti let-ang ti Damasco: ket intono sumangpetca, sica pulotamto ni Hazael nga agari iti Siria;

16Ket ni Jehu nga anac ni Nimsi pulotamto nga agari iti Israel; ket ni Eliseo nga anac ni Safat a taga Abelmehula pulotamto a mammadto iti saadmo.

17Ket maaramidto, a ti macatalaw iti campilan ni Hazael papatayento ni Jehu; ket ti macatalaw iti campilan ni Jehu papatayento ni Eliseo.

18Nupay casta siac mangitiddaacto ti maipaay caniac iti pito ribu iti Israel, amin dagiti tumtumeng a saan a nagparintumeng ken Baal, ken amin ti ngiwat a saan nga immagec kencuana.

19Iti casta isu pimmanaw sadiay, ket nasaracanna ni Eliseo nga anac ni Safat, nga adda nga agararado, nga adda sangapulo ket dua a casangol dagiti vacana iti sangona, ket isu kimmuyog iti maicasangapulo ket dua: Ket ni Elias limmabas kencuana, ket imbacalna ti cagayna kencuana.

20Ket isu binay-anna dagiti vacvaca, ket nagtaray a simmurot ken Elias, ket kinunana, Dawatec kenca, Ipalubosmo, nga agcac ni amac ken ni inac, ket saacto sumurot kenca. Ket isu kinunana kencuana, Agsublica manen; ta ania ti inaramidco kenca?

21Ket isu nagsubli a naggapu iti isusurotna kencuana, ket innalana dagiti vacvaca, ket pinartina, ket inangerna dagiti lasagda cadagiti ar-aruaten dagiti vacvaca, ket intedna cadagiti tattao, ket nanganda. Idin isu timmacder, ket simmurot ken Elias, ket nagannong kencuana.

← Chapter 18 Jump to: Chapter 20 →