1 Kings 17

Ilokano (Ti Biblia (1973))

← Chapter 16 Jump to: Chapter 18 →

1Ket ni Elias a Tisbita, isu a maysa cadagiti agyan sadi Galaad, kinunana ken Acab, Cas ni Jehova, a Dios ti Israel sibibiag, nga ti sangona agtatacderac, awanto ti linnaaw uray tudo cadagitoy a tawtawen, no saan laeng a mayannurot iti saoc.

2Ket ti sao ni Jehova immay kencuana, a kinunana,

3Pumanawca ditoy, ket agsublica nga agpadaya, ket aglemmengca iti waig a Cerit, isu nga adda iti sango ti Jordan.

4Ket castoyto, nga uminumcanto iti waig; ket siac imbilinco cadagiti wac a taraonandaca sadiay.

5Iti casta isu napan ket inaramidna ti mayannurot iti sao ni Jehova; ta isu napan ket nagnaed iti denna ti waig a Cerit, isu nga adda iti sango ti Jordan.

6Ket dagiti wac impanda kencuana ti tinapay ken lasag iti agsapa, ken tinapay ken lasag iti malem; ket isu imminum iti waig.

7Ket naaramid iti calpasan ti maysa a tiempo, a ti waig naatianan, ta awan idi ti tudo iti daga.

8Ket ti sao ni Jehova immay kencuana, a kinunana,

9Tumacderca, inca sadi Sarepta, isu a biang ti Sidon, ket agnaedca sadiay: adtoy, imbilinco iti maysa a babai a balo sadiay a taraonannaca.

10Iti casta isu timmacder ket napan sadi Sarepta; ket idi a dimteng iti ruangan ti ili, adtoy, maysa a babai a balo adda idiay nga agpidpidot cadagiti ruting: ket isu inayabanna, ket kinunana kencuana, Agdawatac kenca, yegannac iti bassit a danum iti maysa a vaso, tapno inumec.

11Ket idinto a mapmapan tapno isu iyalaanna, isu pimmuccaw ket kinunana kencuana, Agdawatac kenca, yegannac ti sangcasacmol a tinapay iti imam.

12Ket isu kinunana, Cas ni Jehova a Diosmo sibibiag, siac awan maysa a bibingcac, no saan laeng a sangcarakem a bel-laay iti putic, ken sangcabassit a lana iti porong-go ket, adtoy, siac mangpidotac cadagiti dua a ruting, tapno innac ket isu ti isaganac coma a maipaay caniac ken ti anacco, tapno isu ti canenmi ket mataycamin.

13Ket ni Elias kinunana kencuana, Dica agbuteng; inca ket aramidem ti cas ti kinunam; ngem yaramidannac nga umuna ti sangcabassit a bibingca, ket isu ti iruarmo caniac, ket intono malpas mangaramidca iti maipaay kenca ken maipaay iti anacmo.

14Ta castoy ti cuna ni Jehova, ti Dios ti Israel, Ti putic ti bel-laay saanto a maibusan, uray ti porong-go ti lana saanto a macurangan inggana iti aldaw a panagbaon ni Jehova ti tudo iti rabaw ti daga.

15Ket isu napan ket inaramidna ti mayannurot iti sao ni Elias: ket nanganda di balo a babai, ken ni Elias, ken ti balay ti balo, iti adu nga aldaw.

16Ti putic ti bel-laay saan a naibusan, uray ti porong-go ti lana saan a nacurangan a mayannurot iti sao ni Jehova, isu a sinaona iti pannacaaramat ni Elias.

17Ket naaramid iti calpasan dagitoy a banag, a ti anac ti babai, nga akinbalay, nagsakit; ket ti sakitna nadagsen, nga awan anges a natidda kencuana.

18Ket isu kinunana ken Elias, Ania ti pakibiangac kenca, O sica lalaki ti Dios? sica immayca caniac tapno ipalagipmo ti basolco, ken tapno patayem ti anacco!

19Ket isu kinunana kencuana, Itedmo caniac ti anacmo. Ket isu innalana iti saclotna, ket impanna iti siled, isu a pagyananna, ken isu ti incabilna iti rabaw ti pagiddaanna met laeng.

20Ket isu immasug ken Jehova, ket kinunana, O Jehova a Diosco, inyegam met ti dakes ti balo isu a nagdagusac, iti pannacatay ti anacna?

21Ket isu immunnat iti rabaw ti ubing iti namitlo a daras, ket immasug ken Jehova, ket kinunana, O Jehova a Diosco, agdawatac kenca, nga ipalubosmo a ti cararua daytoy nga ubing umay coma manen kencuana.

22Ket ni Jehova impangagna ti timec ni Elias; ket ti cararua ti ubing simrec manen kencuana, ket isu nagungar.

23Ket ni Elias innalana ti ubing, ket inyulogna a naggapu ti siledna agingga iti uneg ti balay, ket isu ti inyawatna ken inana; ket ni Elias kinunana, Kitaem, ti anacmo nabiag.

24Ket ti babai kinunana ken Elias, Ita siac ammoc a sica ti maysa a lalaki ti Dios, ket ti sao ni Jehova ita ngiwatmo isu ti pudno.

← Chapter 16 Jump to: Chapter 18 →