1 Kings 4

Ilokano (Ti Biblia (1973))

← Chapter 3 Jump to: Chapter 5 →

1Ket ni ari Salomon isu ti ari ti amin nga Israel.

2Ket dagitoy isuda dagiti pangpangoloen nga adda kencuana idi: ni Azarias nga anac ni Sadoc a padi;

3Ni Elioref ken ni Ahia nga annac ni Sisa nga escriba; ni Josafat nga anac ni Ahilud a registrador;

4Ken ni Banaya nga anac ni Joiada nga agpangolo idi ti buyot; ken ni Sadoc ken ni Abiatar isuda dagiti papadi;

5Ken ni Azarias nga anac ni Natan isu ti agpangolo cadagiti agturturay; ken ni Zabud nga anac ni Natan isu ti cangronaan a ministro, ken pagayam ti ari;

6Ken ni Ahisar isu idi ti mayordomo; ken ni Adoniram nga anac ni Abda isu idi ti pangolo dagiti tattao nga agtrabajo iti nadagsen.

7Ket ni Salomon adda sangapulo ket dua a pagaywanenna iti amin nga Israel, nga isuda ti mangtaraon iti ari ken iti sangacabbalayanna: ti tunggal lalaki rebbengna ti mangtaraon a macabulan iti macatawen.

8Ket dagitoy dagiti nagnaganda: Ni Benhur, iti caturodan ti Efraim;

9Ni Ben-decar, idiay Maccas, ken idiay Saalbim, ken idiay Bet-semes, ken idiay Elon-bet-hanan;

10Ni Ben-hesed, idiay Arubot; (kencuana maibiang ti Soco, ken amin a daga ti Efet);

11Ni Ben-abinadab, iti amin a tapaw ti Dor (adda kencuana ni Thafat nga asawana nga anac a babai ni Salomon);

12Ni Baana nga anac ni Ahilud, idiay Taanac ken Megiddo, ken iti amin a Betsan isu nga adda iti denna ti Zaretan, iti baba ti Jezreel, manipud Bet-san agingga iti Abelmehola, agingga iti labes ti Jocmeam;

13Ni Ben-geber, idiay Ramot-galaad (kencuana maibiang dagiti ili ni Jair nga anac a lalaki ni Manases, isu nga addada sadi Galaad; kencuana met maibiang ti sacup ti Argob, isu nga adda idiay Basan, innem a pulo a dadackel nga il-ili nga adda bacbacudda ken balbalunetda a gambang);

14Ni Abinadab nga anac ni Addo, idiay Mahanaim;

15Ni Ahimaas iti Neftali (isu innalana met ni Basemat nga asawana nga anac a babai ni Salomon);

16Ni Baana nga anac ni Husai iti Aser ken idiay Alot;

17Ni Josafat nga anac ni Farua iti Isacar;

18Ni Semei nga anac ni Ela, iti Benjamin;

19Ni Geber nga anac ni Uri iti daga ti Galaad, a daga da Sehon nga ari dagiti Amorreo ken Og nga ari ti Basan ken isu idi ti maymaysa nga agturay nga adda idiay a daga.

20Ket ti Juda ken ti Israel aduda a cas cadagiti darat nga adda iti igid ti baybay iti kinaruay, a mangmanganda, ken agiinumda ken agragragsacda.

21Ket ni Salomon nagturayanna amin dagiti pagpagarian manipud iti carayan agingga iti daga dagiti Filisteos, ken agingga iti beddeng ti Egipto: isuda agipanda ti buis, ken nagservida ken Salomon cadagiti amin nga aldaw ti panagbiagda.

22Ket ti taraon ni Salomon iti maysa nga aldaw tallopulo a casucat a namayecmec nga harina, ken innem a pulo a casucat a bel-laay,

23Sangapulo a nalucmeg a vacvaca, ken duapulo a vacvaca, nga aggapu iti pagaraban, ken sangagasut a carcarnero, sabali laeng dagiti ug-ugsa, ken gasgacela, ken corcorzo, ken dagiti pinalucmeg a tumatayab.

24Ta isu adda turayna iti amin a sacup iti daytoy a bangir ti carayan, manipud Tafsa agingga iti Gaza met laeng, cadagiti amin nga ari iti daytoy a bangir ti carayan: ket isu adda idi talnana iti amin a sikigan nga agliclicmut kencuana.

25Ket ti Juda ken ti Israel agnaedda a sitatalged, ti tunggal maysa iti siroc ti uvasna ken iti siroc ti higosna manipud Dan agingga iti Beerseba, cadagiti amin nga aldaw ni Salomon.

26Ket ni Salomon adda uppat a pulo a ribu a cabcabayona cadagiti caballeriza a maipaay cadagiti lugluganna, ken sangapulo ket dua a ribu a lallaki nga agcabayo.

27Ket dagidiay nga agtuturay a mangtaraon ken ari Salomon, ken cadagiti amin a mapan iti lamesaan ni ari Salomon, tunggal lalaki iti bulanna; saanda a binaybay-an nga agcurang ti aniaman.

28Cebada pay ken garami a maipaay cadagiti cabcabayo ken cadagiti cabcabayo a nasiglat ipanda iti disso a yan dagiti agtuturay tunggal lalaki a mayannurot iti pannacacumitna.

29Ket ti Dios iniccanna ni Salomon iti kinasirib ken pannacaawat a casta unay, ken kinalawa ti puso, a cas iti darat met laeng nga adda iti igid ti baybay.

30Ket ti kinasirib ni Salomon gundawayanna ti kinasirib ti amin nga annac a taga daya, ken ti amin a kinasirib ti Egipto.

31Ta isu nasirsirib ngem dagiti amin a tattao: a nangnangrona ngem ni Etan nga Ezrahita, ken ni Eman, ken ni Calcol, ken ni Darda, nga annac ni Mahol: ket ti dayawna adda a naisacnap cadagiti amin a nasnacion nga agliclicmut.

32Ket isu nangisao cadagiti tallo ribu a proverbios, ket dagiti cancancionna sangaribuda ket lima.

33Nagsao met ti maipanggep cadagiti caycayo, manipud iti cantingen nga adda iti Libano agingga iti hisopo nga agtubtubo iti bacud: nagsao met ti maipanggep cadagiti animal ken cadagiti tumatayab, ken cadagiti agay-ayam, ken cadagiti ican.

34Ket dagiti naggapu cadagiti amin nga ili immayda nga agdengngeg iti kinasirib ni Salomon nanipud cadagiti amin nga ar-ari ti daga, isuda a nacangngeg ti maipapan ti kinasiribna.

← Chapter 3 Jump to: Chapter 5 →