1 Kings 20 — Ilokano (Ti Biblia (1973))

1Ket ni Ben-adad nga ari ti Siria inurnongna amin ti buyotna; ket adda tallopulo ket dua nga ar-ari kencuana, ken cabcabayo ken luglugan: ket isu simmang-at, ket linacubna ti Samaria, ket nakigubat a maibusor kencuana.

5Ket dagiti babaonen immayda manen, ket kinunada, Castoy ti sao ni Ben-adad, a cunana, Siac nagbaonac a pudno kenca, a kinunac, Sica yawatmonto caniac ti piracmo, ken ti balitocmo, ken dagiti assawam, ken dagiti annacmo;

6Ngem siac ibaonconto dagiti ad-adipenco kenca inton agsapa iti daytoy a tiempo, ket isuda sukimatendanto ti balaymo, ken dagiti balbalay dagiti ad-adipenmo; ket castoyto, nga uray ania a nasayaat cadagiti matam isu ti icabildanto iti imada, ket isu ti alaendanto.

7Idi a casta ti ari ti Israel inayabanna amin dagiti lallacay iti daga, ket kinunana, Agdawatac cadacayo, Usigenyo ket kitaenyo no casano a daytoy a lalaki sapulenna ti kinadakes: ta isu nagbaon caniac a gapu cadagiti assawac, ken gapu cadagiti annacco, ken gapu iti piracco, ken gapu iti balitocco; ket siac awan ti impaidamco kencuana.

8Ket amin dagiti lallacay ken ti amin dagiti tattao kinunada kencuana, Dica ipangag ken dica anamongan.

9Gapuna nga isu kinunana cadagiti babaonen ni Ben-adad, Ibagayo iti apoc nga ari, Amin a pinaibagam iti adipenmo iti immuna siac aramidecto; ngem daytoy a banag diac maaramid. Ket dagiti babaonen pimmanawda, ket impanda manen kencuana ti sao.

10Ket ni Ben-adad nagbaon kencuana, ket kinunana, Dagiti didios aramidenda ti casta caniac, ken adadda pay met, no ti tapoc ti Samaria umdasto a rakemen ti amin dagiti tattao a sumurot caniac.

11Ket ti ari ti Israel simmungbat ket kinunana, Ibagam kencuana, Di agpalangguad coma ti mangibarikes iti igamna a cas ti mangucsob.

12Ket naaramid, idi a ni Ben-adad nangngegna daytoy a damag, idinto nga umininum, isu ken dagiti ar-ari, cadagiti toltolda, nga isu kinunana cadagiti ad-adipenna, Agurnongcayo a siuornos. Ket isuda nagurnongda a siuornos a maibusor iti ili.

13Ket, adtoy, maysa a mammadto immasideg ken Acab nga ari ti Israel, ket kinunana, Castoy ti cuna ni Jehova, Nakitam amin daytoy umariwecwec? adtoy, siac yawatconto ida ita imam ita nga aldaw; ket sica maammoamto a siac ni Jehova.

14Ket ni Acab kinunana, Iti pannacaaramat ti siasino? Ket isu kinunana, Castoy ti cuna ni Jehova, Iti pannacaaramat dagiti agtutubo a lallaki dagiti pangpangulo dagiti provincia. Idi casta isu kinunana, Siasino ti mangiruginto iti gubat? Ket isu simmungbat, Sica.

15Idi a casta isu inurnongna dagiti agtutubo a lallaki dagiti pangpangulo dagiti provincia, ket isuda duagasut ket tallopulo ket dua: ket iti calpasanda isu tiniponna amin dagiti tattao, amin met laeng dagiti annac ti Israel, a pito ribuda.

16Ket isuda rimmuarda iti matoon. Ngem ni Ben-adad agininum nga agbartec cadagiti toltolda, isu ken dagiti ar-ari, dagiti tallopulo ket dua nga ar-ari a timmulong kencuana.

17Ket dagiti agtutubo a lallaki dagiti pangpangulo dagiti provincia rimmuarda nga immun-una; ket ni Ben-adad nagbaon, ket isuda imbagada kencuana, a kinuna, Adda lallaki a rimmuar a naggapuda sadiay Samaria.

18Ket isu kinunana, No isuda rimmuarda a maipanggep iti cappia, tiliwenyo ida a sibibiag; wenno no isuda rimmuarda a maipanggep iti gubat, tiliwenyo ida a sibibiag.

19Iti casta dagitoy rimmuarda iti ili, dagiti agtutubo a lallaki dagiti pangpangulo dagiti provincia, ken ti buyot a simmurot cadacuada.

20Ket isuda pinatayda tunggal maysa ti lalakina; ket dagiti Sirios nagtarayda, ket kinamat ida ti Israel: ket ni Ben-adad nga ari ti Siria nagtalaw a nagsacay iti maysa a cabayo a cadua dagiti agcacabayo.

21Ket ti ari ti Israel rimmuar, ket kinabilna dagiti cabcabayo ken luglugan, ket pinatayna dagiti Sirios iti naindaclan a panagpapatay.

22Ket ti mammadto immasideg iti ari ti Israel, ket kinunana kencuana, Inca, cumiredca, ket usigem, ket kitaem ti aramidem; ta iti panagsucat ti tawen ti ari ti Siria sumang-atto a bumusor kenca.

23Ket dagiti ad-adipen ti ari ti Siria kinunada kencuana, Ti diosda isu ti maysa a dios dagiti turturod; gapuna nga isuda napigpigsada ngem datayo: ngem gubatentayo coma ida iti tanap, ket di bumurong a datayo napigpigsatayonto ngem isuda.

24Ket aramidem daytoy a banag: iccatem dagiti ar-ari, tumunggal maysa iti saadna, ket mangicabilca cadagiti capcapitan iti saadda;

25Ket mangibilangca ti maysa a buyot, a cas iti buyot a napucawmo, cabayo no cabayo, ket lugan no lugan; ket datayo gumubattayo a bumusor cadacuada iti tanap, ket di bumurong a datayo napigpigsatayonto ngem isuda. Ket isu impangagna ti timecda, ket inaramidna ti casta.

26Ket naaramid iti panagsucat ti tawen, a ni Ben-adad tiniponna dagiti Sirios, ket simmang-at sadi Afec a gumubat a maibusor iti Israel.

27Ket dagiti annac ti Israel natiptiponda, ken naibalonanda, ket napanda a bumusor cadacuada: ket dagiti annac ti Israel nagpacarsoda iti sangoda a cas la dua a bassit a pangen dagiti ur-urbon dagiti calcalding; ngem dagiti Sirios pinunnoda ti daga.

28Ket maysa a lalaki ti Dios immasideg ket nagsao iti ari ti Israel, ket kinunana, Castoy ti cuna ni Jehova, Agsipud ta dagiti Sirios kinunada, Ni Jehova isu ti maysa a dios dagiti turturod, ngem saan a maysa a dios dagiti tanap; gapuna a siac yawatconto amin daytoy umariwecwec iti imam, ket dacayo maammoanyonto a siac ni Jehova.

29Ket isuda nagpacarsoda ti maysa iti sango ti sabali iti pito nga aldaw. Ket casta idi, nga iti maicapito nga aldaw ti gubat narugian; ket dagiti annac ti Israel nangpatayda cadagiti Sirios iti sangagasut a ribu a magmagna iti maysa nga aldaw.

30Ngem ti natda nagtarayda sadi Afec, iti uneg ti ili; ket ti bacud natuang iti rabaw dagiti duapulo ket pito ribu a lallaki cadagiti natda. Ket ni Ben-adad nagtaray, ket napan iti uneg ti ili, iti uneg ti maysa a nauneg a siled.

31Ket dagiti ad-adipenna kinunada kencuana, Adtoy ita, nangngeganmi a dagiti ar-ari ti balay ti Israel isuda manangngaasida nga ar-ari: Agdawatcami kenca, ipalubosmo a mangicabilcami ti nakersang a lupot cadagiti lomomi, ken taltali cadagiti olomi, ket incami iti ari ti Israel: bareng no isu ispalennanto ti biagmo.

32Iti casta isuda nagbarikesda iti nakersang a lupot cadagiti lomoda, ken nangicabilda cadagiti taltali cadagiti oloda, ket napanda iti ari ti Israel, ket kinunada, Ti adipenmo a ni Ben-adad cunana, Siac agdawatac kenca, a palubosannac nga agbiag. Ket isu kinunana, Isu sibibiag pay? isu ti cabsatco.

33Ket dagiti lallaki pinaliiwda a sigaganetget, ket nadarasda a tiniliw no ania ti panunotna; ket isuda kinunada, Ni cabsatmo a Ben-adad. Iti casta isu kinunana, Incayo, isu yegyo. Idi a casta ni Ben-adad rimmuar a napan kencuana: ket isu ti pinaulina iti uneg ti luganna.

34Ket ni Ben-adad kinunana kencuana, Dagiti il-ili nga innala ni amac ken amam isublicto; ket mangaramidcanto iti daldalan a maipaay kenca sadi Damasco, a cas inaramid ni amac sadi Samaria. Ket siac, kinuna ni Acab, palubosancanto a mapan babaen iti daytoy a tulag. Iti casta isu nangaramid ti maysa a tulag kencuana, ket isu pinalubosanna a napan.

35Ket maysa a lalaki cadagiti annac dagiti mammadto kinunana iti caduana gapu iti sao ni Jehova, Agdawatac kenca a cabilennac. Ket ti lalaki nagmadi a mangcabil kencuana.

36Iti casta kinunana kencuana, Agsipud ta dica tinuloc ti timec ni Jehova, adtoy, apaman a macapanawca caniac, maysa a leon patayennacanto. Ket apaman nga isu nacapanaw kencuana, maysa a leon simmabat ken nangpatay kencuana.

37Idi a casta nacasarac iti sabali a lalaki, ket kinunana, Agdawatac kenca, cabilennac. Ket isu kinabil ti lalaki, a kinabil ken sinugatna.

38Iti casta ti mammadto pimmanaw, ket inurayna ti ari iti dalan, ket nanglimlimo a nabedbedan ti olona iti rabaw ti matana.

39Ket idi a limmabas ti ari, isu nagpuccaw iti ari; ket kinunana, Ti adipenmo rimmuar iti tengnga ti paggugubatan; ket, adtoy, maysa a lalaki simmina, ket nangyeg ti maysa a lalaki caniac, ket kinunana, Aywanam daytoy a lalaki: no ti aniaman a pamuspusan isu macatalaw, ti biagmo ti maipaayto iti biagna, wenno agbayadcanto ti maysa a talento a pirac.

40Ket idinto a ti adipenmo naringgoran ditoy ken sadiay, isu nacapanaw. Ket ti ari ti Israel kinunana kencuana, Casta ti maipatayto kenca; sica met laeng ti nangikeddeng.

41Ket isu nagtaray, ket iniccatna ti bedbed cadagiti matana; ket ti ari ti Israel nabigbigna nga isu maysa cadagiti mammadto.

42Ket isu kinunana kencuana, Castoy ti kinuna ni Jehova, Agsipud ta binay-am a macapanaw iti imam ti lalaki a kinedngac a matay, gapuna a ti biagmo maipaayto iti biagna, ken ti ilim iti ilina.

43Ket ti ari ti Israel napan iti balayna a sibabantut ken sitataramnay, ket immay sadi Samaria.