1 Kings 22 — Ilokano (Ti Biblia (1973))

1Ket isuda pinalabasda ti tallo a tawen nga awan gubat iti Siria ken iti Israel.

2Ket naaramid iti maicatlo a tawen, a ni Josafat nga ari ti Juda simmalog iti ari ti Israel.

3Ket ti ari ti Israel kinunana cadagiti ad-adipenna, Dicayo ammo aya a ti Ramot-galaad isu ti cucuatayo, ket datayo sitatalnatayo, ket isu ditayo iccaten iti ima ti ari ti Siria?

4Ket isu kinunana ken Josafat, Cayatmo ti cumuyog caniac a gumubat iti Ramoth-galaad? Ket ni Josafat kinunana iti ari ti Israel, Siac caslaac la kenca, ti ilic cas la iti ilim, dagiti cacabayoc casda la cadagiti cacabayom.

5Ket ni Josafat kinunana iti ari ti Israel, Agdawatac kenca umumanca nga umuna iti sao ni Jehova.

6Idin ti ari ti Israel tiniponna dagiti mammadto, nga aguppat a gasut a lallaki, ket kinunana cadacuada, Siac innacto a maibusor iti Ramot-galaad a gumubat, wenno idiac? Ket isuda kinunada, Sumang-atca; ta ti Apo isu ti yawatnanto iti ima ti ari.

7Ngem ni Josafat kinunana, Awan ti sabali aya ditoy a maysa a mammadto ni Jehova, tapno umumantayo kencuana?

8Ket ti ari ti Israel kinunana ken Josafat, Adda pay maysa a lalaki isu a pakiumanantayo ken Jehova, ni Miceas nga anac ni Imla; ngem isu ti cagurgurac; ta isu saan a mangipadto ti naimbag a maipaay caniac, no di laeng dakes. Ket ni Josafat kinunana, Di coma saoen ti ari ti casta.

9Iti casta ti ari ti Israel nangayab ti maysa nga agturay, ket kinunana, Yegmo ditoy a madardaras ni Miceas nga anac ni Imla.

10Ket ti ari ti Israel ken ni Josafat nga ari ti Juda agtutugawda a tunggal maysa iti tronona, a sicacawesda cadagiti lambonda, iti maysa a nalayang a disso iti sesercan ti ruangan ti Samaria; ket amin dagiti mammadto addada nga agpadpadto iti sangoda.

11Ket ni Sedequias nga anac a lalaki ni Canaana nangaramid cadagiti sinan-sara a landoc, ket kinunana, Castoy ti kinuna ni Jehova, Iti pannacaaramat dagitoy sica sunsunemto dagiti Sirios, agingga iti maibusda.

12Ket amin dagiti mammadto impadtoda ti casta, a kinunada, Sumang-atca sadi Ramot-galaad, ket agrang-ayca; ta ni Jehova isu ti yawatnanto iti ima ti ari.

13Ket ti babaonen a napan nangayab ken Miquias nagsao kencuana, a kinunana, Adtoy ita, dagiti sao dagiti mammadto ipalawagda ti naimbag iti ari iti maymaysa a ngiwat: agdawatac kenca, ti saom, isu coma ti cas la iti sao ti maysa cadacuada, ket agsaoca ti naimbag.

14Ket ni Miquias kinunana, Cas ni Jehova sibibiag, ti ibaga ni Jehova caniac, isunto ti saoec.

15Ket idi isu nacagteng iti ari, ti ari kinunana kencuana, Miquias, Mapancaminto sadi Ramot-galaad a gumubat, wenno idianminto? Ket isu simmungbat kencuana, Sumang-atca ket agrang-ayca; ket ni Jehova isu ti yawatnanto iti ima ti ari.

16Ket ti ari kinunana kencuana, Maminano daras a siac sapataacto kenca tapno awan ibagam caniac no saan laeng a ti pudno iti nagan ni Jehova?

17Ket isu kinunana, Siac nakitac amin nga Israel a nawarawara iti rabaw dagiti banbantay, a cas carnero nga awananda ti pastor: ket ni Jehova kinunana, Dagitoy awan apoda; agsubli coma ti tumunggal lalaki iti balayna a sitatalna.

18Ket ti ari ti Israel kinunana ken Josafat, Diac aya kinuna kenca nga isu saan a mangipadto ti naimbag a maipaay caniac, no di laeng dakes?

19Ket ni Miquias kinunana, Gapuna a denggem ti sao ni Jehova: siac nakitac ni Jehova a situtugaw iti tronona, ket amin ti buyot ti langit sitatacder iti asideg kencuana iti macanawan ken macatigidna.

20Ket ni Jehova kinunana, Siasino ti mangallilawto ken Acab, tapno isu sumang-at ket mapasag sadi Ramot-galaad? Ket ti maysa kinunana iti castoy; ket ti sabali kinunana iti casdiay.

21Ket rimmuar ti maysa nga espiritu, ket nagtacder iti sango ni Jehova, ket kinunana, Siac isu allilawecto.

22Ket ni Jehova kinunana kencuana, Iti ania? Ket isu simmungbat, siac rumuaracto, ket agbalinacto a maysa a naulbod nga espiritu iti ngiwat ti amin dagiti mammadtona. Ket isu kinunana, Sica isu allilawem, ket isu aladagam met: rumuarca, ket aramidem ti casta.

23Ita ngarud, adtoy, ni Jehova nangicabil ti maysa a naulbod nga espiritu iti ngiwat ti amin dagitoy mammadtom; ket ni Jehova impalawagna ti dakes a maipanggep kenca.

24Idin ni Sedequias nga anac ni Canaana immasideg, ket kinabilna ni Miquias iti pingpingna, ket kinunana, Sadino ti nagnaan ti Espiritu ni Jehova a naggapu caniac tapno agsao kenca?

25Ket ni Miquias kinunana, Adtoy, makitamto iti daydiay nga aldaw, intono sica mapancanto iti uneg ti maysa a nauneg a siled tapno aglemmengca.

26Ket ti ari ti Israel kinunana, Alaem ni Miquias, ket isu isublim ken Amon a gobernador ti ili, ken ni Joas nga anac ti ari;

27Ket cunam, Castoy ti cuna ti ari, Icabilmo daytoy a tao iti pagbaludan, ket isu pacanem iti tinapay ti pammarigat ken danum iti pammarigat, agpapan yaayco a sitatalna.

28Ket ni Miquias kinunana, No sica agsublicanto a naananay iti talna, ni Jehova saan a nagsao iti pannacaaramatco. Ket isu kinunana, Denggenyo, dacayo nga umili, dacayo amin.

29Iti casta ti ari ti Israel ken ni Josafat nga ari ti Juda simmang-atda sadi Ramot-galaad.

30Ket ti ari ti Israel kinunana ken Josafat, Manglimlimoacto, ket innac iti paggugubatan; ngem sica icabilmo dagiti lambonmo. Ket ti ari ti Israel nanglimlimo, ket napan iti paggubatan.

31Ket ti ari ti Siria nagbilin cadagiti tallopulo ket dua a capitan dagiti luganna, a kinunana, Dicayo gubaten ti uray bassit uray dackel, malacsid laeng ti ari ti Israel.

32Ket naaramid, idi a dagiti capitan dagiti lugan nakitada ni Josafat, nga isuda kinunada, Awan duadua isu daytoy ti ari ti Israel; ket isuda nagsublida a gumubat a maibusor kencuana: ket ni Josafat nagickis.

33Ket naaramid, idi a dagiti capitan dagiti lugan nakitada a saan nga isu ti ari ti Israel, nga isuda nagsublida iti panagcamatda kencuana.

34Ket maysa a lalaki imbiatna ti panana nga impasacsac, ket nasugatna ti ari ti Israel iti baet ti nagsaipan ti cabal: gapuna a kinunana iti agpaguyod ti luganna, Isublim ta imam, ket ipannac iti ruar ti buyot; ta nasugatanac iti nasaem.

35Ket ti panaggubat bimmara iti daydi nga aldaw: ket ti ari nagsadag iti luganna a bumusor cadagiti Sirios, ket natay iti rumabii; ket ti dara nagarubus iti sugat iti uneg ti lugan.

36Ket rimmuar ti maysa a puccaw iti amin a buyot idinto a lumlumnec ti init, a cunana, Tumunggal lalaki iti ilina, ken tumunggal lalaki iti dagana.

37Iti casta ti ari natay, ket isu naipan sadi Samaria; ket intabonda ti ari idiay Samaria.

38Ket isuda binuggoanda ti luganna iti denna ti tanke ti Samaria; ket dagiti aso dinilpatanda ti darana (ket dagiti balangcantis nagdigusda sadiay); a mayannurot iti sao ni Jehova isu a sinaona.

39Ket dagiti matda cadagiti ar-aramid ni Acab, ken amin nga inaramidna, ken ti marfil a balay a pinutarna, ken amin dagiti il-ili a binangonna, saanda aya a naisurat iti libro dagiti cronicas dagiti ar-ari ti Israel?

40Iti casta ni Acab nakiturog cadagiti ammana; ket ni Ocozias nga anacna nagari iti saadna.

41Ket ni Josafat nga anac ni Asa nangrugi nga agari iti Juda iti maicapat a tawen ni Acab nga ari ti Israel.

42Ni Josafat tallopulo ket lima dagiti tawenna idi nangrugi nga agari; ket isu nagari iti duapulo ket lima a tawen sadi Jerusalem. Ket ti nagan ni inana Azuba nga anac ni Silai.

43Ket isu nagna iti amin a dalan ni Asa nga amana; isu saan a simmina iti daydiay, nga inaramidna daydi a nalinteg cadagiti mata ni Jehova: nupay casta dagiti nangato a disso saanda a naiccat; ti umili nagtaginayon a nagdaton ken nagpuur ti incienso cadagiti nangato a disso.

44Ket ni Josafat nakicappia iti ari ti Israel.

45Ket ti matda cadagiti ar-aramid ni Josafat, ken ti pannacabalinna nga impakitana, ken no casano ti pannakigubatna, saanda aya a naisurat iti libro dagiti cronicas dagiti ar-ari ti Juda?

46Ket ti natda cadagiti sodomitas, a natda cadagiti aldaw ni amana nga Asa, isu pinagtalawna iti daga.

47Ket awan idi ti ari sadi Edom: maysa a diputado isu ti ari.

48Ni Josafat nangaramid cadagiti sasacayan ti Tarsis tapno mapanda coma sadi Ofir a gapu iti balitoc: ngem saanda a napan; ta dagiti sasacayan narbada sadi Eziongaber.

49Iti casta kinuna ni Ocozias nga anac ni Acab ken Josafat, Ipalubosmo a dagiti adipenco mapanda cumuyog cadagiti adipenmo cadagiti sasacayan. Ngem ni Josafat nagmadi.

50Ket ni Josafat nakiturog cadagiti ammana, ket isu naitabon a nainayon cadagiti ammana iti ili ni David nga amana; ket ni Joram nga anacna nagari iti saadna.

51Ni Ocozias nga anac ni Acab nangrugi nga agari iti Israel idiay Samaria idi maicasangapulo ket pito a tawen ni Josafat nga ari ti Juda, ket isu nagari iti dua a tawen iti Israel.

52Ket isu inaramidna daydi a dakes iti imatang ni Jehova, ket nagna iti dalan ni amana, ken iti dalan ni inana, ket iti dalan ni Jeroboam nga anac ni Nabat, isu a namagbasol iti Israel.

53Ket isu nagservi ken Baal, ket nagrucbab kencuana, ket ginargarina nga agpungtot ni Jehova, ti Dios ti Israel, a mayannurot iti amin nga inaramid ni amana.