Revelation 1

Ilokano (Ti Biblia (1973))

Jump to: Chapter 2 →

1Paltiing ni Jesu-Cristo, nga inted ti Dios kencuana, tapno ipacaammona cadagiti ad-adipenna dagiti banbanag, isuda a maaramidto iti mabiit: ket isu intedna ket pinaibagana gapu iti angelna, iti adipenna a Juan;

2Isu a namanecnec iti sao ti Dios ken iti pammanecnec ni Jesu-Cristo, cas cadagiti isu-amin a nakitana.

3Nagasat ti bumasa ken dagiti agdengngeg cadagiti sasao ti padto, ket salimetmetanda dagiti banbanag a naisurat kencuana: ta ti pannawen asidegen.

4Ni Juan isuratna cadagiti pito nga Iglesia nga addada iti Asia: Parabur cadacayo ken talna nga aggapu iti daydiay nga adda ita ket adda idi, ken umayto; ken aggapu cadagiti pito nga Espiritu nga addada iti sangoanan ti tronona;

5Ken aggapu ken Jesu-Cristo, ti matalec a mamanecnec, ti inauna nga anac cadagiti natay, ken ti agturay cadagiti ar-ari ditoy daga: Iti daydiay mangdungdungngo cadatayo, ken nangluc-at cadatayo cadagiti basbasoltayo iti darana met laeng;

6Ket pinagbalinnatayo a maysa a pagarian ken papadi a maipaay iti Dios ken Amana, adda coma kencuana ti dayaw ken ti panagturay iti agnanayon nga awan inggana, Amen.

7Adtoy isu umay a buyugen dagiti ululep ket makitanto dagiti isu-amin a matmata, ken castamet dagidi nangduyuc kencuana; ket dagiti isu-amin a capcaputotan ditoy daga agdung-awdanto gapu kencuana. Casta coma; Amen.

8Siac ti Alfa ken ti Omega, cuna ni Apo Dios, ti adda ita, ken ti adda idi ken ti umayto, ti Mannacabalin-amin.

9Siac ni Juan, a cabsatyo ken makipaglac-am cadacayo iti rigat, ken iti pagarian ken iti kinaanus ni Jesus addaac idi idiay puro a managan Patmos, maipuon iti sao ti Dios ken iti pammanecnec ken Jesus.

10Siac addaac idi iti Espiritu, iti aldaw ti Apo, ket nangngegco iti licudac ti maysa a dackel ti timec, a cas la iti uni ti tangguyob.

11A cuncunana: Ti makitam, isuratmo iti maysa a pagbasaan ket ipawitmo cadagiti pito nga Iglesia: idiay Efeso, ken idiay Smirna, ken idiay Pergamo, ken idiay Tiatira, ken idiay Sardis, ken idiay Filadelfia ken idiay Laodicea.

12Ket timmaliawac tapno kitaec daydi timec a makisasao caniac. Ket idinto a nagpusipusac nakitac dagiti pito a pagsilawan a nabalitocan.

13Ket iti tengnga dagidi pito a pagsilawan nakitac ti maysa nga umasping iti maysa nga anac ti tao a nagcawes iti pagan-anay a macagteng agingga iti saca ket nalicmut iti barucong ti maysa a barikes a nabalitocan.

14Ket ti olona ken boboocna napudawda a cas la iti dutdut ti carnero a puraw, napudaw a cas la nieve; ket dagiti matana cas da la darang ti apuy;

15Ket dagiti sacsacana, umaspingda iti bronce a napasileng a cas la naguguran iti apuy ti pagpandayan; ket ti timecna cas la daranudor dagiti adu a dandanum.

16Ket iti macanawan nga imana nagiggem cadagiti pito a bituen; ket iti ngiwatna rimmuar ti maysa a campilan, a dua ti tademna; ket daydi rupana cas la panaglawag ti init no caraniagna.

17Ket idi nakitac, napasagac cadagiti sacsacana a cas la natay; ket impatayna daydi macanawanna caniac, a kinunana: Dica agbuteng siac ti umuna ken ti camaudianan,

18Ken ti Sibibiag; ket natayac idi, ket adtoy, sibibiagac iti agnanayon nga awan inggana; ket adda caniac dagiti tultulbec ni patay ken ti Hades.

19Isuratmo, ngarud dagiti banbanag a nakitam ken dagiti adda ita, ken dagiti mapasamacto calpasan dagitoy:

20Ti palimed dagiti pito a bituen a nakitam iti macanawanco, ken dagiti pito a pagsilawan a nabalitocan. Dagiti pito a bituen isuda dagiti angel cadagiti pito nga Iglesia; ket dagiti pito a pagsilawan isuda dagiti pito nga Iglesia.

Jump to: Chapter 2 →