Revelation 10

Ilokano (Ti Biblia (1973))

← Chapter 9 Jump to: Chapter 11 →

1Ket nacakitaac iti sabali nga angel a napigsa a bumabbaba manipud langit, a nabungon ti maysa nga ulep; ket adda idi ti bul-lalayaw iti rabaw ti olona; ket daydi rupana cas la iti init ket dagiti sacsacana cacas da la adigi nga apuy;

2Ket adda iti imana ti maysa a pagbasaan a bassit a sibibistrad ket impatayna ti sacana a macanawan iti rabaw ti baybay, ket ti macatigid iti rabaw ti daga;

3Ket nagpuccaw iti dackel a timec a cas iti panagungor ti maysa a leon; ket idi a nagpuccaw, dagiti pito a gurrood nagunida.

4Ket idi a dagidi pito a gurrood nagunidan innac coma agsurat, ket nangngegco ti maysa a timec a naggapu sadi langit a nagcuna: Selloam dagiti banag a binalicas dagiti pito a gurrood, ket dica isurat ida.

5Ket daydi angel a nakitac a nagbatay iti baybay ken iti daga, intayagna ti imana a macanawan sadi langit,

6Ket nagsapata gapu iti daydiay agbiag nga awan inggana, isu a namarsua iti langit ken dagup ti adda kencuana, ken iti daga ken dagup ti adda kencuana, ken iti baybay ken dagup ti adda kencuana, tapno awanton ti pacatactacan:

7No di ket cadagiti al-aldaw ti timec ti maicapito nga angel, inton pagunienna ti tangguyobna, isu metten ti pannacatungpalto ti palimed ti Dios, cas mayannurot iti naimbag a damag nga isu impacaammona cadagiti ad-adipenna a mammadto.

8Ket daydi timec a nangngegco a naggapu sadi langit, kinasaonac manen, a kinunana: Magnaca, alaem daydiay pagbasaan nga adda a sibibistrad iti ima ti angel a nagbatay iti baybay ken iti daga.

9Ket immasidegac idi angel, a kinunac kencuana nga itdenna coma caniac daydi pagbasaan a bassit. Ket isu kinunana caniac. Alaem ket canem, ket papaitennanto ti tianmo, ngem ita ngiwatmo nasamitto a cas diro.

10Ket innalac daydi pagbasaan a bassit iti ima daydi angel ket kinnanco; ket nasam-it iti ngiwatco a cas la diro; ngem idi nacancon, ti tianco nagpait.

11Ket cuncunada caniac; masapul nga agipadtoca manen a maipapan cadagiti adu nga ilili, ken pagpagarian, ken pagsasao, ken ar-ari.

← Chapter 9 Jump to: Chapter 11 →