Revelation 3

Ilokano (Ti Biblia (1973))

← Chapter 2 Jump to: Chapter 4 →

1Ket isuratmo iti angel ti Iglesia sadi Sardis Dagitoy: a banbanag cuna ti addaan cadagiti pito nga Espiritu ti Dios ken dagiti pito a bituen: Siac ammoc dagiti ar-aramidmo, a managananca sibibiag, ket natayca.

2Agsalucagca, ket pasingkedam dagiti banag a natda pay, isuda a nganngani natay; ta cadagiti ar-aramidmo awan ti nasaracac a nasayaat unay iti sangoanan ti Diosco.

3Lagipem ngarud no casano ti panangawat ken panagdengngegmo; ket aywanam, ket agbabawica. No saancanto ngarud nga agsalucag, umayacto a cas la mannanacaw, ket dicanto ammo no ania nga horas ti iyaayco kenca.

4Ngem adda kenca sumagmamano a nagnagan dita Sardis a dida rinugitan dagiti pagananayda; ket dagitoy makicuyogdanto caniac nga agcawesda iti puraw; ta isuda dagiti maicari.

5Ti agbal-liginto castoyto a macawesan cadagiti pagananay a puraw; ket uray caano diacto punasen ti naganna iti libro ti biag, no di ket ipaduyacyacconto ti naganna iti sangoanan ni Amac ken dagiti angelna.

6Ti adda pagdengngegna, denggenna coma ti cuna ti Espiritu cadagiti Iglesia.

7Ket isuratmo iti angel ti Iglesia sadi Filadelfia: Dagitoy a banbanag cuna ti santo, ti napudno, ti addaan ti tulbec ni David, ti manglucat, ket awan ti macapunit, ken ti mangpunit ket awan ti macalucat:

8Siac ammoc dagiti ar-aramidmo: (adtoy, incabilco iti sangoanam ti maysa a ruangan a silulucat, isu nga awan ti macairikepto; ta adda bassit a pannacabalinmo, ket sinalimetmetam ti saoc, ket dica naglibacan ti naganco.

9Adtoy, siac itdec manipud iti sinagoga ni Satanas, dagidiay mangnagan iti bagida Judio, ket saan met no di ket agulbodda: Adtoy, aramidecto nga umayda ken agrucbabda cadagiti sacsacam, ket maammoanda a dinungdongngoca.

10Gapu ta sinalimetmetam ti saoc a kinaanos, siac igagacanto met iti horas ti pannacasuut isu nga umayto iti isu-amin a lubong a natao-an, tapno masuut dagiti agnaed iti rabaw ti daga.

11Siac umayac iti madaras; salimetmetam a sititibker ti adda kenca, tapno awan ti mangala iti balangatmo.

12Daydiay agbal-ligi aramidento nga isu ti maysa nga adigi iti templo ti Diosco, ket saanto a rummuaren sadiay; ket isuratconto kencuana ti nagan ti Diosco, ken ti nagan ti ciudad ti Diosco, ti baro a Jerusalem, isu a bumaba manipud langit, nga aggapu iti Diosco: ket isuratconto met kencuana ti baro a naganco.

13Ti adda pagdengngegna denggenna coma ti cuna ti Espiritu cadagiti Iglesia.

14Ket isuratmo iti angel ti Iglesia sadi Laodicea: Dagitoy a banbanag cuna ni Amen, ti mamanecnec a matalec ken napudno, ti poon ti pinarsua ti Dios:

15Siac ammoc dagiti ar-aramidmo, a saanca a nalamiis ket saanca met a napudot. Siac cayatco coma a nalamiisca wenno napudotca.

16Iti casta, gapu ta napatay ti lamiismo ket saanca a napudot ket saanca met a nalamiis, itupracanto iti ngiwatco.

17Agsipud ta cunam: Siac nabacnangac ket nagunodacon ti kinabacnang, ket awan ti pacasapulac iti aniaman; ket dica ammo a sica ti dacsan-gasat ken marigrigat, ken napanglaw, ken bulsec ken lamolamo:

18Ibalacadco kenca a gumatangca caniac iti balitoc a napasudi iti apuy, tapno bumacnangca coma; ken dagiti pagananay a puraw, tapno agcawesca, ket saan a maiparang ti nacababain a kinalamolamom; ken ti agas ti mata, tapno sapsapoam dagiti matam tapno macakitaca.

19Cadagiti isu-amin a dungdungngoec siac babalawec ken gugurac ida; aggagetca ngarud ket agbabawica.

20Adtoy, siac addaac nga agtactacder iti ruangan, ket agtugtugac; no adda dumngegto iti timecco ket luctannanto ti ruangan, sumrecacto kencuana, ket makipanganacto kencuana, ket isu, caniac.

21Daydiay agbal-ligi, ipaayconto kencuana, a makicatugaw caniac iti tronoc a casmet caniac a nagballigiac ket nakicatugawac ken Amac idiay tronona.

22Ti adda pagdengngegna, denggenna coma ti cuna ti Espiritu cadagiti Iglesia.

← Chapter 2 Jump to: Chapter 4 →