Revelation 18

Ilokano (Ti Biblia (1973))

← Chapter 17 Jump to: Chapter 19 →

1Calpasan dagitoy a banag, nakitac ti sabali nga angel a bumaba nanipud langit, nga addaan dackel a turay; ket ti daga nasilnagan daydi dayagna.

2Ket pimmuccaw iti napigsa a timec, a cuncunana: Narba, narba ti dackel a Babilonia, ket nagbalin nga pagnaedan dagiti diablo, ken pagapunan ti amin a kita ti espiritu a nacarimrimon, ken tangcal ti amin a tumatayab a narugit ken macapagura.

3Ta gapu iti arac ti pungtot ti pannakicamalalana, narba dagiti isu-amin a pagpagarian: ket dagiti ar-ari ti daga nakicamalalada kencuana, ket dagiti agtagtagilaco ditoy daga bimmacnangda gapu iti kinabuslon dagiti ragragsacna.

4Ket nangngegco ti sabali a timec a naggapu sadi langit, a cuncunana: Rummuarcay kencuana, O tattaoc, tapno dicay mairaman cadagiti basbasolna, ken tapno saanyo nga awaten dagiti saplitna:

5Ta dagiti basbasolna nacagtengda sadi langit, ket ti Dios linagipna dagiti kinadangkesna.

6Supapacanyo a cas ti impaayna met; ket paminduaenyo ti mamindua, kencuana, cas mainugot cadagiti ar-aramidna; iti copa a nangilaocanna, ilaocanyo iti mamindua a maipaay kencuana.

7No casano ti panagpasindayagna ken panagbuslonna cadagiti ragragsac casta ti itedyo a tuoc ken sangsangit, ta isu cunana iti pusona: Naisaadac a reina, ken saanac a balo, ket uray caano diacto aglac-am ti ladingit.

8Gapuna, iti maymaysa nga aldaw umayto dagiti saplitna, ti ipapatay, ken ti ladingit, ken ti bisin: ken isu mapuuranto iti apuy: ta napigsa ni Apo Dios a mangocom kencuana.

9Ket dagiti ar-ari ti daga, a nakicamalala ken nakipagbiag iti kinabuslon dagiti ragragsac kencuana agsangsangit ket agdungawdanto intono makitada ti asuc ti pacapuuranna.

10Nga agtatacderda iti adayu gapu ti butengda iti tuocna, a cuncunada: Asipay, asipay daydi dackel a ciudad ti Babilonia, daydi ciudad a mannacabalin; ta iti maymaysa nga horas immay ti pannacaocommo.

11Ket dagiti agtagtagilaco ditoy daga isu ti sangsangitan ken dungdungawanda, ta awan ti gumatangen iti tagtagilacoda;

12Tagtagilaco a balitoc ken pirac, ken dagiti batbato a napateg, ken dagiti perlas, ken ti lupot a nalapat a puraw, ken purpura, ken seda, ken escarlata; ken isu-amin a kita ti cayo a nabanglo, ken amin a kita ti alalicamen a marfil ken amin a kita dagiti alalicamen a cayo a napateg unay, ken bronce, ken landoc, ken marmol;

13Ken canela, ken recado ken incienso ken unguento, ken bangbanglo, ken arac, ken lana, ken nasayaat nga harina ken trigo, ken an-animal ken carcarnero; ken cabcabayo ken luglugan, ken dagiti ad-adipen; ken dagiti carcararua dagiti tao.

14Ket dagiti bungbunga nga ag-aguman idi ti cararuam immadayuda kenca; ket isu-amin dagiti banag a naganas ken nabacnang napucawda kenca, ket saanto a masaracanen ida.

15Dagiti agtagtagilaco cadagitoy a banbanag, a bimmacnangda gapu kencuana, agtatacderdanto idiay adayu, gapu iti butengda iti tuocna, nga agsangsangit ken agdungdung-awda;

16A cuncunada: Asi pay, asi pay daydiay dackel a ciudad a nagcawes iti lupot a nalapat a puraw ken iti purpura, ken iti escarlata, ken naarcosan iti balitoc ken iti bato a napateg, ken perlas.

17Ta iti maymaysa nga horas nagbalin a dapo ti nagdackel a kinabacnang. Ket amin a piloto, ken isu-amin dagiti aglaylayag nga agturong iti uray ania a disso, ken dagiti marinero, ken dagup dagiti agsapsapul iti pagbiagda iti baybay, nagtatacderda iti adayu.

18Ket agic-ickisda, idi makitada ti asuc daydi pacapuuranna, a cuncunada: Ania ti umas-asping iti daydiay dackel a ciudad?

19Ket pinurroacanda ti tapoc dagiti ol-oloda; ket agic-ickisda, nga agsangsangit ken agan-anug-ugda a cuncunada: Ay, asi pay daydi dackel a ciudad, isu a binacnangan dagiti isu-amin nga adda sasacayanda idi iti baybay, gapu cadagiti agcacapateg a gamengna; ta iti maymaysa nga horas isu napucaw.

20Agragragoca maipanggep kencuana, O, langit, ken dacayo a sasanto ken dacayo nga apostol ken dacayo a mammadto; ta ti Dios imbalesanna cayo kencuana.

21Ket maysa nga angel a napigsa binagcatna ti maysa a bato, a cas la maysa a dackel a bato a gilingan, ket intapuacna iti baybay, a cuncunana; Castoy a babaen ti nacaal-alinget a pannacatnag, marbecto ti Babilonia, daydi dackel a ciudad, ket saanto a masaracanen.

22Ket ti timec dagiti umaarpa, ken dagiti agcancanta, ken dagiti pumaflauta, ken dagiti tumatangguyob saanto a mangngeganen kenca; ket awanton ti manursuro ti aniaman nga partuat a masaracan kenca; ket ti uni ti gilingan saanto a mangngegen kenca;

23Ket ti lawag ti maysa a pagsilawan saanto nga aglawagen kenca; ket ti timec ti novio ken ti novia saanto a mangngeganen kenca: ta dagiti agtagtagilaco kenca isuda idi dagiti pangoloen ti daga; ta gapu cadagiti panagsalsalamangcam naallilaw dagiti isu-amin a pagpagarian.

24Ket nasaracan kencuana ti naiparucpoc a dara dagiti mammadto, ken dagiti sasanto, ken dagiti isu-amin a napapatay ditoy daga.

← Chapter 17 Jump to: Chapter 19 →