Revelation 4

Ilokano (Ti Biblia (1973))

← Chapter 3 Jump to: Chapter 5 →

1Calpasan dagitoy, kimmitaac, ket adtoy, maysa a ruangan, a naluctan idiay langit, ket ti umuna a timec a nangngegco, a cas la uni ti tangguyob, a nakisasao caniac, a cuncunana; Umulica ditoy; ket iparangconto kenca dagiti banbanag a mapasamacto iti masacbayan.

2Naigiddato nga naaddaac iti Espiritu: ket adtoy ti maysa a trono a naisaad sadi langit, ket idi trono adda maysa a situtugaw;

3Ket daydi agtugtugaw, cas la umasping iti maysa a bato a jaspe ken maysa a bato a sardio; ket adda idi ti maysa a bul-lalayaw a nanglawlaw iti trono, nga umasping iti maysa nga esmeralda.

4Ket iti aglicmut di trono adda duapulo ket uppat a trono, ket dagiti trono agtutugaw dagiti duapulo ket uppat a lallacay a nagcawes cadagiti pagananay a puraw; ket cadagiti ol-oloda adda balbalangat a balitoc.

5Ket iti trono rumrummuar idi dagiti kimkimat, ken timtimec ken gurgurruod; ket adda idi pito a pagsilawan nga apuy a sumsumged iti sangoanan ti trono, nga isuda dagiti pito nga Espiritu ti Dios;

6Ket iti sangoanan di trono adda idi maysa a baybay a sarming, nga umasping iti cristal; ket di trono, iti tengnga, ken iti aglicmut daydi trono, adda idi uppat a parsua a sibibiag a napno cadagiti matmata, iti sango ken iti licud.

7Ket daydi umuna a parsua umas-asping idi iti maysa a leon; ket daydi maicadua a parsua umas-asping iti maysa nga urbong ti vaca; ket daydi maicatlo a parsua adda rupana a cas la rupa ti maysa a tao, ket daydi maicapat a parsua umas-asping iti maysa nga aguila a tumaytayab.

8Ket dagidi uppat a parsua a sibibiag, tunggal maysa cadacuada adda innem a payacna ket napnoda cadagiti matmata iti aglawlaw ken iti uneg; ket dida umingga iti aldaw ken rabii a cuncunada: Santo, santo, ni Apo Dios, ti Mannacabalin-amin, isu nga adda idi, ken adda ita, ken umayto.

9Ket intono dagiti parsua a sibibiag mangtedda iti dayag ken dayaw ken panagyaman iti daydi adda a situtugaw iti trono, isu nga agbiag iti awan inggana.

10Dagidi duapulo ket uppat a lallacay agparintumengda iti sangoanan daydi adda nga agtutugaw iti trono, ket agrucbabda iti daydiay agbiag iti agnanayon, ket ipurruacda dagiti balbalangatda iti sangoanan di trono, a cuncunada:

11Sica ti maiparbeng, Apomi ken Diosmi, nga umawat iti dayag, iti dayaw ken iti pannacabalin; ta sica pinarsuam dagiti isu-amin nga adda, ket gapu iti nakemmo naaddada, ket naparsuada.

← Chapter 3 Jump to: Chapter 5 →