Revelation 22

Ilokano (Ti Biblia (1973))

← Chapter 21 Jump to:

1Ket impakitana caniac ti maysa a carayan ti danum ti biag, a sumilsilap a cas iti sarming a rummuar iti trono ti Dios ken iti Cordero, ket agayus.

2Iti tengnga ti calzada sadiay, ket iti agsumbangir nga igid daydi carayan, adda daydi cayo ti biag, nga adda sangapulo ket dua a kita ti bungana, nga agbunga iti binulan; ket dagiti bulbulong daydi cayo maipaayda iti pannacaagas dagiti pagpagarian.

3Ket awanton ti lunod ket ti trono ti Dios ken ti Cordero addadanto kencuana, ket dagiti adipenna agservidanto kencuana;

4Ket makitadanto ti rupana, ket ti naganna addanto cadagiti mugmugingda.

5Ket awanton ti rabii; ket dida masapul ti lawag ti pagsilawan, wenno ti lawag ti init: ta ni Apo Dios lawaganna ida: ket agaridanto iti awan inggana.

6Ket kinunana caniac: Dagitoy a sasao papatien ken napudnoda: ket ti Apo, daydi Dios dagiti espiritu dagiti mammadto, imbaonna daydi angelna, tapno ipakitana cadagiti ad-adipenna dagiti banbanag a maipapilit a mapasamac iti mabiit.

7Adtoy, siac umayac iti madaras. Nagasat daydiay mangsalimetmet cadagiti sasao ti padto daytoy a pagbasaan.

8Ket siac ni Juan a nacangngeg ken nacakita cadagitoy a banag. Ket idi nangngegco ken nakitac, nagrucnoyac tapno agdaydayawac iti sangoanan dagiti sacsaca daydi angel a nangipakita caniac cadagitoy a banbanag.

9Ket isu kinunana caniac: Bay-am, dica aramiden dayta; siac adipenac a caduam ken cadua dagiti cacabsatmo a mammadto, ken dagiti mangsalimetmet cadagiti sasao daytoy a pagbasaan. Agdaydayawca iti Dios.

10Ket kinunana caniac: Saanmo a selloan dagiti sasao ti padto daytoy a pagbasaan: ta ti aldaw asidegen.

11Ti nakil-lo agaramid laeng iti kinakil-lo; ket ti narugit, narugit laeng; ket ti nalinteg, nalinlinteg pay coma; ket ti santo nasansanto pay coma.

12Adtoy, siac umayac a dagus; ket ti panggongona adda caniac, tapno gongonaac ti tunggal maysa cas mayannatup iti aramidna.

13Siac ti Alpha ken ti Omega, ti umuna ken ti camaudianan ti pangrugian ken ti pagpatinggaan.

14Nagasat dagidiay mangdalus cadagiti pagananayda, tapno adda calinteganda nga aglac-am iti cayo ti biag, ken tapno mabalinda ti sumrec cadagiti ruruangan ti ciudad.

15Idiay ruar addada dagiti asaso, ken dagiti managanito, ken dagiti mannakicamalala, ken dagiti nacapapatay, ken dagiti agrucbab cadagiti didiosen, ken tunggal maysa nga agayat ken agaramid iti ulbod.

16Siac ni Jesus imbaonco ti angelco tapno sacsianna cadacayo dagitoy a banbanag cadagiti Iglesia. Siac ti capuonan ken ti caputotan ni David, siac ti naraniag, siac ti baggac.

17Ket daydi Espiritu ken daydi novia cunada: Umayca! ket ti dumngeg, cunaenna coma: Umayca! Ket ti mawaw, umay coma. Ket ti mayat, awatenna ti danum ti biag, nga awan baybayadna.

18Siac sacsiac iti tunggal maysa a dumngeg cadagiti sasao ti padto daytoy a pagbasaan: No addanto mangnayon cadacuada, ti Dios inayonnanto kencuana dagiti pannaplit a naisurat itoy a pagbasaan.

19Ket no addanto mangkissay cadagiti sasao ti pagbasaan daytoy a padto, ti Dios iccatennanto ti pannacabagina iti cayo ti biag, ken idiay nasantoan a ciudad, ken cadagiti banbanag a naisurat itoy a pagbasaan.

20Ti mangsacsi cadagitoy a banbanag, cunana: Wen siac umayac a dagus. Amen! Umayca, Apo Jesus!

21Ti parabur ni Apo Jesus agtaeng coma cadagiti amin a sasanto! Amen.

← Chapter 21 Jump to: