Romans 10

Mien Bible (Thai Script) © Thailand Bible Society, 2007

← Chapter 9 Jump to: Chapter 11 →

1ก๋อ- โย์ว อ่า, เยีย หฒะเก้ง! อ๋อย ทิน-ฮู่ง เหฌียว เหธา เยีย จวั่ง ฝีง เญย เมี่ยน ไห่ อ๊ะ, ฯฒฯ เหฌี่ย ชะ เถง นิ่น บัว โท้ ทิน-ฮู่ง.

2เยีย เถง นิ่น บัว โหฒว ฒอง-เหฒง ก๊อง นิ่น บัว เหว่ย ทิน-ฮู่ง จอม เฮญี้ยว ไห่, มป่า นิ่น บัว ไม้ เม่ง แปะ ทิน-ฮู่ง เญย เจ๊า.

3นิ่น บัว ไม้ ฮิ้ว ตุ๊ ทิน-ฮู่ง ฮนั้ง หาย นอ ปุน เมี่ยน เหธา นิ่น หอบ เฮญี้ยว ฯฒฯ ต๊า กั้น เญย หฒะเอ๋ย อ๋อย เหธา ทิน-ฮู่ง หอบ. นิ่น บัว ไม้ หล่ง ทิน-ฮู่ง เญย หฒะเอ๋ย.

4กีตู่ โหฒว ปุน เล์ย-หลัด เหฑ่ง หมี่ อ๊ะ. ฮนั้ง หน่าย, หาย เต้า เสียน เขา กีตู่ ฯฒฯ ตุ๊ เหธา ทิน-ฮู่ง หอบ เฮญี้ยว.

5โมเซ เฟี้ย เจี๊ยน ก๊อง เมี่ยน กัน เล์ย-หลัด ตุ๊ เหธา ทิน-ฮู่ง หอบ เฮญี้ยว เญย หฒะเอ๋ย. นิ่น ก๊อง, “หาย เต้า เอย เจี๊ยน เล์ย-หลัด โหฒว, วั้ว เต้า ฯฒฯ ตุ๊ เอย เล์ย-หลัด เฒี่ยง เจี๊ยน.”

6มป่า กีง-โซว หย่า ก๊อง เหว่ย เสียน กีตู่ ฯฒฯ ตุ๊ เหธา ทิน-ฮู่ง หอบ เฮญี้ยว เญย หฒะเอ๋ย. กีง-โซว ก๊อง, “ไม้ ตู๋ง เยียม เฮญี้ยว ฮนั้ม, ‘หาย เต้า อ๋อย ฝาว ทิน-ต้อง?’” (น้าย เซ เหว่ย ต้อ กีตู่ เหฌี่ย.)

7“หย่า ไม้ ตู๋ง ฮนั้ม, ‘หาย เต้า อ๋อย มี่ง เยี่ยม เกน?’” (น้าย เซ เหว่ย ปุน กีตู่ เยียม ไต่ มี่ง เญย เมี่ยน เญย ต๋อง ธ้วด ต้าย.)

8กีง-โซว ฮนั้ง น้าย นอ ก๊อง, “ทิน-ฮู่ง เญย หว่า เยียม นิด เม่ย ฟัด เญย, ฒู้ง เยียม เจี๊ยน เม่ย เญย ฑุ่ย หย่า เยียม เจี๊ยน เม่ย เญย เฮญี้ยว.” น้าย เซ เยีย บัว ฒุ่น บั๋ว เมี่ยน อ๋อย หฒุ เสียน เฒี้ยว วั้ว เต๋ย หว่า.

9สี ก๊อง เม่ย เญย ฑุ่ย เหญี่ยม, “เยซู โหฒว เฒี้ยว,” เม่ย หย่า หล่ง เฮญี้ยว เสียน เยซู ไต่ มี่ง, ทิน-ฮู่ง แอ๋ง ปุน นิ่น นั่ง ต้าย, เม่ย ฯฒฯ ตุ๊ เหฌียว อ๊ะ.

10เหว่ย หฒุ บัว หล่ง เฮญี้ยว เสียน ฯฒฯ ตุ๊ เหธา ทิน-ฮู่ง หอบ. บัว หล่ง ฑุ่ย เหญี่ยม เยซู โหฒว เฒี้ยว, บัว ฯฒฯ ตุ๊ เหฌียว อ๊ะ.

11กีง-โซว ม่าย โจ๋ว หว่า ก๊อง, “หาย เต้า เสียน เขา นิ่น, วั้ว เต้า ฒู้ง ไม้ ไญ้.”

12เหว่ย หฒุ ยิวไท เมี่ยน เหธา จั๋น ฟี่ ฮนั้ง เญย, ไม้ กั้น หญู่ง. เหยียด ฒู้ง จวั่ง เต้า เฒี้ยว ฮนั้ง, ต้ง โหฒว หม่าน เมี่ยน เญย เฒี้ยว วั้ว เต้า. หาย เต้า โท้ เฒี้ยว, เฒี้ยว ฯฒฯ ธั้มๆ เญย เหธย ฟุ ปุน วั้ว เต้า.

13ฮนั้ง กีง-โซว ก๊อง นอ, “หาย เต้า เห่ว เฒี้ยว เญย บั๋ว, วั้ว เต้า ตุ๊ เหฌียว อ๊ะ.”

14สี ก๊อง เมี่ยน ไม้ แก้ง เสียน เยซู กีตู่, นิ่น บัว ฮนั้ง หาย นอ ไฮ่ เห่ว นิ่น? สี ก๊อง ไม้ แก้ง ไฮ์ หาย เต้า ก๊อง เจี๋ย เยซู เญย เจ๊า-โหล่ว, นิ่น บัว ฮนั้ง หาย นอ ไฮ่ เสียน? สี ก๊อง ไม้ ม่าย หาย เต้า ฒุ่น คู้ เฝียน ปุน นิ่น บัว หมวัง, นิ่น บัว ฮนั้ง หาย นอ ไฮ่ ตุ๊ ไฮ์ คู้ เฝียน?

15สี ก๊อง ไม้ ม่าย หาย เต้า พ้าย เมี่ยน มี่ง ฒุ่น คู้ เฝียน, เมี่ยน ฮนั้ง หาย นอ ไฮ่ มี่ง ฒุ่น? ฮนั้ง กีง-โซว ก๊อง นอ, “ปวัด เมี่ยน ต้าย ฒุ่น คู้ เฝียน เก้ง อะเฮน้ย ไห่ อ๊ะ.”

16มป่า ไม้ เฒ์ย อิสะลาเอน เมี่ยน เต้าๆ ฒิบ คู้ เฝียน เหว่ย หฒุ อิสะยา ก๊อง, “เฒี้ยว อ่า, หาย เต้า เสียน เยีย บัว ฒุ่น เญย หว่า?”

17ฮนั้ง หน่าย, เมี่ยน เสียน เหว่ย หฒุ นิ่น บัว ไฮ์ กีตู่ เญย โต์. นิ่น บัว ตุ๊ ไฮ์ เหว่ย หฒุ ม่าย เมี่ยน มี่ง ฒุ่น ปุน นิ่น บัว หมวัง.

18มป่า เยีย อ๋อย หน่าย ก๋า, นิ่น บัว หฒะเก้ง ไม้ ไฮ์ เจี๋ย กีตู่ เญย โต์ ไฟ? ไฮ์ เจี๋ย เญย เหลาะ. ฮนั้ง กีง-โซว ก๊อง นอ, “ฒุ่น โต์ เมี่ยน เญย เฉีย ซีง ก๋อม ป้าม เกน. นิ่น บัว เญย หว่า ฒุ่น จ่ม ลู่ง เดี๊ย.”

19เยีย อ๋อย แอ๋ง หน่าย ก๋า, อิสะลาเอน เมี่ยน ไม้ เม่ง แปะ ไฟ? โมเซ กั้น หล่ง ทิน-ฮู่ง เญย หว่า เตา ด่าง. นิ่น ก๊อง, “เยีย อ๋อย ปุน เม่ย บัว เหมว่ย เจี๊ยะ เหยียด ฝีง จั๋น. เยีย อ๋อย หล่ง เหยียด ฝีง หฮงง เญย เมี่ยน ธัวะ เม่ย บัว เฉีย เจี์ย.”

20อิสะยา หย่า หล่ง ทิน-ฮู่ง เญย หว่า เก้า ปู๋ง หล่าง เญย ก๊อง. นิ่น ก๊อง, “ไม้ ล์อ เยีย วั้ว เต๋ย ตุ๊ ปวัด เยีย. ไม้ หน่าย เถา เยีย วั้ว เต๋ย, เยีย ปุน นิ่น บัว ฮิ้ว ตุ๊ เยีย.”

21อิสะยา หย่า เฟี้ย เจี๊ยน ทิน-ฮู่ง เญย หว่า ก๊อง เถา อิสะลาเอน เมี่ยน. นิ่น ก๊อง, “เยีย เฒี่ยง ฮนอย ซูง เจี๊ยน ปั์ว อ๋อย ฒิบ ไม้ หมวัง หว่า, เฮญี้ยว แหง่ง เญย เมี่ยน.”

← Chapter 9 Jump to: Chapter 11 →