Romans 7

Mien Bible (Thai Script) © Thailand Bible Society, 2007

← Chapter 6 Jump to: Chapter 8 →

1ก๋อ- โย์ว อ่า, น้าย เต๋ย หว่า เยีย เหธา ฮิ้ว เล์ย-หลัด เญย เมี่ยน ก๊อง. เม่ย บัว ไม้ ฮิ้ว ไฟ? เล์ย-หลัด กุ๊น เมี่ยน เซ ต้ง เมี่ยน เฒี่ยง เจี๊ยน เญย เฒี่ยง โห่ ฮนั้ง.

2ฮนั้ง มเซียะ ตอน หล่ง เจี๊ยน โหฆ นอ. โหฆ หธ่อ เฒี่ยง เจี๊ยน เญย เฒี่ยง โห่, เอ๊า หฒุ ตอง จา เญย เล์ย กุ๊น เจี๊ยน. มป่า สี ก๊อง โหฆ ไต่, เอ๊า ฯฒฯ เล่ย ดุ๊ด, ไม้ หฒุ ตอง จา เญย เล์ย กุ๊น อ๊ะ.

3ฮนั้ง หน่าย, โหฆ หธ่อ เฒี่ยง เจี๊ยน เญย เฒี่ยง โห่, เอ๊า มี่ง หล่ง กั้น เต้า มจั่ง ตอน, นิ่น ฯฒฯ ตุ๊ เหฮยียน โหฆ เญย เม่ง เต้า. มป่า สี ก๊อง นิ่น เญย โหฆ ไต่ หมี่ อ๊ะ นอ, ตอง จา เญย เล์ย ฯฒฯ ไม้ กุ๊น วั้ว เต้า เอ๊า อ๊ะ. นิ่น แอ๋ง มี่ง เหธา กั้น เต้า ตอง จา หย่า ไม้ ฝุน เหฮยียน โหฆ.

4เยีย เญย ก๋อ-โย์ว อ่า, เม่ย บัว หย่า ฮนั้ง หน่าย. เม่ย บัว เซ ฮนั้ง ไต่ หมี่ อ๊ะ นอ. เล์ย-หลัด กุ๊น ไม้ ตุ๊ เม่ย บัว, เหว่ย หฒุ เม่ย บัว จวั่ง กีตู่ เญย ซิน. อี้ หฒั่น เม่ย บัว เป๋น กั้น เต้า เฒี้ยว เญย เมี่ยน, ต้ง ไต่ มี่ง แอ๋ง นั่ง ต้าย วั้ว เต้า กีตู่ เญย เมี่ยน, เหว่ย โหฒว หลง ฟู-สู ทิน-ฮู่ง.

5ต้ง บัว หธ่อ ม่าย ป์าม ฒุ์ย เญย เฟียม-ฝีง กุ๊น เจี๊ยน บัว วั้ว หฒั่น, เล์ย-หลัด หย่า เต๋า หฒุ บัว เญย เฮญี้ยว, ปุน บัว อ๋อย ป์าม ฒุ์ย. บัว โหฒว เญย เหยียด ฒู้ง ฯฒฯ ปุน บัว หฒุ ไต่.

6มป่า อี้ หฒั่น บัว เล่ย ดุ๊ด เล์ย-หลัด หมี่ อ๊ะ. บัว เซ ฮนั้ง ไต่ หมี่ อ๊ะ นอ. ไม้ ม่าย เล์ย-หลัด กุ๊น เจี๊ยน ฮนั้ง ฒิ่น ด่าง กุ๊น บัว วั้ว นอ. บัว อี้ หฒั่น ไม้ หล่ง เฟี้ย เจี๊ยน วั้ว เต๋ย โล์-เล์ย-หลัด ฟู-สู ทิน-ฮู่ง. บัว หล่ง สีง ลี่ง เญย เซียง-เล์ย ฟู-สู ทิน-ฮู่ง.

7วั้ว หญู่ง บัว อ๋อย หฒุ ฮนั้ง หาย นอ ก๊อง? เล์ย-หลัด กั้น ป์าม ฒุ์ย ไฟ? ฒู้ง ไม้ เฒ์ย! มป่า สี ก๊อง ไม้ เฒ์ย เหว่ย เล์ย-หลัด, เยีย ไม้ ฮิ้ว ตุ๊ หาย หญู่ง เป๋น ฒุ์ย. สี ก๊อง เล์ย-หลัด ไม้ ก๊อง, “ไม้ ตู๋ง เม้า กะน้าย”, เยีย ฯฒฯ ไม้ ฮิ้ว ตุ๊ เม้า กะน้าย ฮนั้ง หาย นอ.

8ฒุ์ย ปั่ง เล์ย-หลัด โหฒว กอน ล์อ ฉัง ปุน เยีย เม้า น้าย เม้า วั้ว. สี ก๊อง ไม้ ม่าย เล์ย-หลัด, ฒุ์ย ฯฒฯ ไต่ หมี่ อ๊ะ.

9เยีย ฒิ่น ด่าง เฒี่ยง เจี๊ยน ไม้ แก้ง ม่าย เล์ย-หลัด กุ๊น เยีย, มป่า ฆะฮ้า เล์ย-หลัด ต้าย, ฒุ์ย ฯฒฯ เฮ้น ต้าย, เยีย หย่า ไต่ หมี่ อ๊ะ.

10เล์ย-หลัด หอบ หฒุ ปุน เมี่ยน เฒี่ยง เจี๊ยน. ต๋าว หฑวน เล์ย-หลัด ปุน เยีย หฒุ ไต่.

11เหว่ย หฒุ ฒุ์ย ล์อ ฉัง ปุน เล์ย-หลัด ดั๊ว เยีย, ฒุ์ย ฯฒฯ หล่ง เล์ย-หลัด ไต๋ เยีย.

12ฮนั้ง หน่าย, เล์ย-หลัด เซ ธีง-เหฑ่ง เญย. เล์ย-หลัด เญย ติ้วๆ เล์ย หย่า ธีง-เหฑ่ง เญย, แป้ง ฟิม เญย, หลง เญย.

13วั้ว หญู่ง, สี ก๊อง เล์ย-หลัด หลง เญย, เล์ย-หลัด ไฮ่ ปุน เยีย ไต่ ไฟ? ฒู้ง ไม้ เฒ์ย! ปุน เยีย ไต่ เซ ต้ง ฒุ์ย. ฒุ์ย หล่ง หลง เญย กะน้าย ปุน เยีย หฒุ ไต่ เหว่ย ปุน เยีย ฮิ้ว ตุ๊ ฒุ์ย หฒะเก้ง ฮนั้ง หาย นอ. ฮนั้ง หน่าย, หลาย เล์ย-หลัด บัว ฮิ้ว ตุ๊ ฒุ์ย เซ หว่าย เถา ต้าว อ๊ะ.

14บัว ฮิ้ว ตุ๊ เล์ย-หลัด เซ เยียม ทิน-ฮู่ง ต้าย. มป่า เยีย โหฒว ป้าม เมี่ยน, หฒุ หม่าย เถง ฒุ์ย โหฒว โน่ว เก๊า.

15เยีย กั้น โหฒว เญย, เยีย ไม้ เม่ง แปะ, เหว่ย หฒุ เยีย อ๋อย โหฒว เญย, เยีย หย่า ไม้ โหฒว. ต๋าว หฑวน โหฒว ต้ง เยีย ฑอง เญย.

16ต้ง เยีย โหฒว ลิ์ว เยีย ไม้ อ๋อย โหฒว เญย สี่, เยีย ฯฒฯ แล์ง เล์ย-หลัด เซ หลง เญย.

17ฮนั้ง หน่าย, ไม้ เฒ์ย เยีย กั้น โหฒว, เซ ต้ง เยียม เยีย เญย เฮญี้ยว วั้ว เต๋ย ฒุ์ย โหฒว.

18เยีย ฮิ้ว ตุ๊ เยียม เยีย ป้าม เมี่ยน เญย เฮญี้ยว ไม้ ม่าย หาย หญู่ง หลง. เยีย เก้ง อ๋อย โหฒว หลง เญย หย่า ไม้ ไฮ่ โหฒว.

19เยีย อ๋อย โหฒว เญย คู้ สี่ เยีย หย่า ไม้ โหฒว. มป่า ต้ง เยีย ไม้ อ๋อย โหฒว เญย หว่าย สี่ เยีย หธ่อ โหฒว เจี๊ยน มี่ง.

20สี ก๊อง เยีย โหฒว ต้ง เยีย ไม้ อ๋อย โหฒว เญย สี่, เซ ไม้ เฒ์ย เยีย กั้น โหฒว. ต้ง เยียม เยีย กะญั์ว เญย ฒุ์ย โหฒว.

21ฮนั้ง หน่าย, เยีย ปวัด ม่าย หญู่ง เล์ย ธ้วด ต้าย. เยีย เจี์ย เฮญี้ยว อ๋อย โหฒว หลง, ขูง ไฮ่ โหฒว ธ้วด เอ๊าะ เญย สี่ ฮนั้ง.

22เยียม เยีย เญย เฮญี้ยว กะญั์ว เยีย อะเฮน้ย ไห่ ทิน-ฮู่ง เญย เล์ย.

23มป่า เยียม เยีย เญย ซิน ม่าย กั้น หญู่ง เล์ย. น้าย หญู่ง เล์ย แอ๋ง เหธา เยีย เญย เฮญี้ยว อะเฮน้ย วั้ว หญู่ง เล์ย เบ๊าะ จ๋า. ฮนั้ง หน่าย, เยียม เยีย เญย ซิน ปุน เยีย ป์าม ฒุ์ย วั้ว หญู่ง เล์ย ฯฒฯ ฮี่ง เยีย, กุ๊น เจี๊ยน เยีย อ๊ะ.

24อ๊า! เยีย หฒะเก้ง โค้ว ไห่ อ๊ะ. หาย เต้า ไฮ่ เหฌียว เยีย เล่ย ดุ๊ด น้าย ไฮ่ หฒุ ไต่ เญย ซิน?

25หฒ่ง ฒี่ง ทิน-ฮู่ง! นิ่น ปุน บัว เญย เฒี้ยว เยซู กีตู่ เหฌียว ธ้วด เยีย. วั้ว หญู่ง, เยียม เยีย เญย เฮญี้ยว เยีย อ๋อย เอย เจี๊ยน ทิน-ฮู่ง เญย เล์ย โหฒว. มป่า เยีย หฒิว ป้าม เมี่ยน เญย เฮญี้ยว โหฒว, ขูง กัน ปุน เยีย ป์าม ฒุ์ย วั้ว หญู่ง เล์ย ฮนั้ง.

← Chapter 6 Jump to: Chapter 8 →