Romans 15

Mien Bible (Thai Script) © Thailand Bible Society, 2007

← Chapter 14 Jump to: Chapter 16 →

1บัว เสียน ตุ๊ เฮ้น เญย เมี่ยน อ๋อย หฒุ ต๋าย เสียน ไม้ เฮ้น วั้ว เต๋ย. ไม้ ตู๋ง ขูง โหฒว หอบ กั้น เญย เฮญี้ยว ฮนั้ง.

2บัว เต้าๆ เมี่ยน อ๋อย หฒุ โหฒว หอบ ก๋อ-โย์ว เหว่ย ปุน นิ่น ตุ๊ หลง, หย่า เถง นิ่น เสียน เฮ้น เจี์ย ต้าย.

3เหว่ย หฒุ กีตู่ ไม้ โหฒว หอบ นิ่น กั้น เญย เฮญี้ยว. ฮนั้ง กีง-โซว เฟี้ย เจี๊ยน ก๊อง นอ, “เมี่ยน ก๊อง โตะ เม่ย มป่า นิ่น บัว เญย หว่า ก๊อง หฒุ เยีย.”

4โล์-ฮนอย เฟี้ย เจี๊ยน กีง-โซว เญย เหยียด ฒู้ง หว่า เซ เฟี้ย ต้าย หฌาว บัว, เหว่ย ปุน บัว ม่าย หน่อย เตี๊ย หย่า ขวิน บัว, บัว หธีง ต้าย ม่าย ลั่ม ฮนั้ม ต๋อง.

5โท้ เหธย ปุน บัว ม่าย หน่อย เตี๊ย หย่า ออน บัว เญย เฮญี้ยว เญย ทิน-ฮู่ง เถง บัว หฒวด กีตู่ เยซู เญย หญู่ง ฯฒฯ ปุน เม่ย บัว ต้ง ติ่ว เฮญี้ยว.

6เม่ย บัว ฯฒฯ ต้ง เฮญี้ยว ต้ง เฉีย เธง บัว เฒี้ยว เยซู กีตู่ เญย เตีย, ทิน-ฮู่ง.

7ฮนั้ง หน่าย, ล่าน อ๋อย หฒุ ฒิบ ล่าน ฮนั้ง กีตู่ ฒิบ เม่ย บัว นอ, เหว่ย ปุน เมี่ยน เธง ทิน-ฮู่ง.

8เยีย บั๋ว เม่ย บัว, เยซู เป๋น ยิวไท เมี่ยน เญย โปว เหว่ย ปุน ทิน-ฮู่ง เหธา ยิวไท เมี่ยน เญย อง-ถาย-แงะ แล์ง ลิ์ว วั้ว เต๋ย หว่า ธ้วด ต้าย เฒียน. นิ่น ฮนั้ง น้าย โหฒว ปิ๋ว เม่ง ทิน-ฮู่ง เซ เหฒียบ ฒัวะ เญย.

9เยซู หย่า ปุน จั๋น เธง ทิน-ฮู่ง เหว่ย หฒุ ทิน-ฮู่ง ค้อ-เลี่ยน นิ่น บัว. ฮนั้ง กีง-โซว ก๊อง นอ, “ฮนั้ง หน่าย, เยีย อ๋อย เยียม จั๋น เญย บุด๋ง เธง เม่ย, หย่า ป๋าว ฑูง เธง เม่ย เญย เม่ง.”

10กีง-โซว หย่า ก๊อง, “จั๋น อ่า, เม่ย บัว อ๋อย หฒุ เหธา ทิน-ฮู่ง เญย แปะ ฝีง ล่ม ฑ่อย เฌียน-โย่ว.”

11กีง-โซว แอ๋ง ม่าย โจ๋ว หว่า, “หม่าน ฝีง จั๋น อ้า! อ๋อย หฒุ เธง เฒี้ยว. หม่าน กั๊วะ เมี่ยน อ้า! อ๋อย หฒุ เธง นิ่น.”

12อิสะยา หย่า ก๊อง, “ม่าย เต้า เจียดซี เญย เฒ้ย-ฟุน, นิ่น อ๋อย ธ้วด ต้าย กุ๊น หม่าน ฝีง จั๋น. จั๋น ฯฒฯ เหว่ย นิ่น ม่าย ลั่ม ฮนั้ม ต๋อง.”

13โท้ ทิน-ฮู่ง, ต้ง ปุน เม่ย บัว ม่าย ลั่ม ฮนั้ม วั้ว เต้า, ปุน เม่ย บัว ม่าย เฌียน-โย่ว หย่า ม่าย แป้ง ออน เถา ต้าว, เหว่ย หฒุ เม่ย บัว เสียน นิ่น. ฮนั้ง หน่าย, สีง ลี่ง เญย ชะ ฯฒฯ ปุน เม่ย บัว หฒั่นๆ ม่าย ลั่ม ฮนั้ม อ๊ะ.

14หฒวัง ก๋อ-โย์ว อ่า, เยีย ฮิ้ว ตี่ง เม่ย บัว หฒะเก้ง หลง ไห่ แอ๋ง ม่าย หญู่งๆ ว่วน ฒาง. ล่าน หย่า ไฮ่ หฌาว ล่าน.

15มป่า น้าย เฒ้ย เฝียน ม่าย ธั้ม-ติ่ว เจ๊า เยีย ปู๋ง หล่าง เญย เฟี้ย เหว่ย เถง เม่ย บัว จั๋ง เจี๊ยน. เยีย ฮนั้ง น้าย ปู๋ง หล่าง เญย เฟี้ย

16เหว่ย หฒุ ทิน-ฮู่ง เหธย เอน ปุน เยีย โหฒว กีตู่ เยซู เญย โปว เถง จั๋น. เยีย โหฒว ฮนั้ง ไซ เมี่ยน นอ, ฒุ่น ทิน-ฮู่ง เญย คู้ เฝียน เหว่ย ปุน จั๋น ฮนั้ง เหฒี่ย เญย กะน้าย, ต้ง สีง ลี่ง ฝูง ปุน ทิน-ฮู่ง, ทิน-ฮู่ง ฯฒฯ อะเฮน้ย ฒิบ เญย กะน้าย.

17เหว่ย น้าย, เยีย เหธา กีตู่ เยซู จวั่ง แหม่ง เฒี่ยง ฯฒฯ อะเฮน้ย เธง เยีย เหว่ย ทิน-ฮู่ง โหฒว เญย กง.

18เยีย อ๋อย ปู๋ง หล่าง เญย ก๊อง ดุ หญู่ง ฮนั้ง. เซ กีตู่ หล่ง เยีย ต้อ จั๋น ต้าย หมวัง ทิน-ฮู่ง เญย หว่า. นิ่น หล่ง เยีย ก๊อง เญย หว่า, โหฒว เญย สี่,

19หล่ง ม่าย ชะ เญย จั๋ง-โห่ เหธา บัวะ ฮ่อง เญย สี่, หย่า หล่ง สีง ลี่ง เญย ชะ. ฮนั้ง หน่าย, เยียม เยลูซาเลม ฒี่ง มี่ง เถา อินลีลีคุม กั๊วะ เฝย โหธว ฒุ่น ก๋อม, เยีย ก๊อง เหฑ่ง กีตู่ เญย คู้ เฝียน.

20เยีย เหลียบ ตี่ง เฮญี้ยว ขูง อ๋อย มี่ง เมี่ยน ไม้ ไฮ์ เจี๋ย กีตู่ เญย บั๋ว วั้ว เต๋ย ต๋อง ฒุ่น คู้ เฝียน ฮนั้ง. เยีย ไม้ อ๋อย โต้ว เมี่ยน หฒวัง เจี๊ยน ธา ฯฒฯ มี่ง ปั่ง วั้ว ก๊ม เปย๊า.

21ฮนั้ง กีง-โซว ก๊อง นอ, “ต้ง ไม้ ตุ๊ เมี่ยน บั๋ว เจี๋ย นิ่น เญย เจ๊า-โหล่ว วั้ว เต๋ย อ๋อย ตุ๊ ปวัด. ไม้ ไฮ์ เจี๋ย เญย เมี่ยน หย่า อ๋อย เม่ง แปะ.”

22เหว่ย น้าย, ธั้ม-หฑุ่น เยีย อ๋อย มี่ง เม่ย บัว หน่าย มป่า ม่าย น้าย เต๋ย เจ๊า ฒ้อ เจี๊ยน, ไม้ ตุ๊ มี่ง.

23มป่า อี้ หฒั่น เยียม น้าย เต๋ย เต่ย-ปูง เยีย เญย กง โหฒว เหฒียง เหฑ่ง อ๊ะ. ตุ๊ เหฒีย หฮญัง เยีย หฒะเก้ง อ๋อย มี่ง เม่ย บัว หน่าย,

24อี้ หฒั่น ฮนั้ม ต้าย ตุ๊ มี่ง อ๊ะ. เยีย มี่ง สะเปน กั๊วะ วั้ว หฒั่น เยีย อ๋อย เจี๋ย เม่ย บัว หน่าย เยียม หธาม. หฑย่าว เก๋า เต๋ย, อ๋อย ปั่ง เม่ย บัว แอ๋ง เถง เยีย ธ้วด เจ๊า มี่ง สะเปน กั๊วะ.

25มป่า อี้ หฒั่น เยีย อ๋อย มี่ง เยลูซาเลม ฒี่ง เหว่ย เถง วั้ว เต๋ย ก๋อ-โย์ว.

26เหว่ย หฒุ เยียม มาซีโดเนีย แซ้ง เหธา อาคายา แซ้ง เญย หฒวัง จิว-ปาง ธ้วด ฟิม กั๊บ ญ่าน เถง เยียม เยลูซาเลม ฒี่ง, กะน่าน เญย ก๋อ-โย์ว.

27กั๊บ ญ่าน วั้ว เต๋ย, นิ่น บัว กั้น ธ้วด ฟิม โหฒว. มป่า นิ่น บัว เก้ง เฉียม วั้ว เต๋ย ก๋อ-โย์ว เญย แฒะ, เหว่ย หฒุ ยิวไท เมี่ยน ตุ๊ สีง ลี่ง ปุน เญย ฟุ ฯฒฯ ปุน จั๋น ตุ๊ ป่วน สีง ลี่ง เญย ฟุ. ฮนั้ง หน่าย, จั๋น ม่าย ยู์ง แหม่ง เญย กะน้าย ฯฒฯ อ๋อย หฒุ ปุน ยิวไท เมี่ยน ตุ๊ ป่วน.

28ฒั้ว เยีย โหฒว เหฒียง น้าย เต๋ย กง, เฒาะ กั๊บ ต้าย เญย ญ่าน จิว ซูง นิ่น บัว ลิ์ว, เยีย ฯฒฯ มี่ง สะเปน กั๊วะ ยั่ง เม่ย บัว หน่าย เจี๋ย.

29มี่ง เญย เฒี่ยง โห่, เยีย ฮิ้ว ตุ๊ กีตู่ อ๋อย ธั้มๆ เญย เหธย ฟุ ปุน บัว.

30ก๋อ-โย์ว อ่า, บัว เสียน เฒี้ยว เยซู กีตู่, สีง ลี่ง หย่า ปุน บัว ฮนั้ม เมี่ยน, เยีย ฯฒฯ โท้! เม่ย บัว จอม เฮญี้ยว หล่ง ชะ เถง เยีย เต๋า เก๋า.

31โท้ ทิน-ฮู่ง โก๋ว เยีย, ปุน เยีย ไม้ หฒุ ยูเดีย เต่ย-ปูง ไม้ เสียน เญย เมี่ยน โหฒว หาย หญู่ง ห่อย เยีย. หย่า โท้ ทิน-ฮู่ง ปุน เยีย เยียม เยลูซาเลม ฒี่ง เบ่น เญย กง ไฮ่ ปุน วั้ว เต๋ย เสียน เยซู เญย ก๋อ-โย์ว ปวั๊ง เฮญี้ยว.

32ฮนั้ง หน่าย, สี ก๊อง เอย ทิน-ฮู่ง เญย หฒะเอ๋ย, เยีย ฯฒฯ เฌียน-โย่ว เญย มี่ง เม่ย บัว หน่าย ตุ๊ เหธา เม่ย บัว ฮิด เต๋ย ขวน.

33โท้ เหธย แป้ง ออน เญย ทิน-ฮู่ง เหธา เม่ย บัว หฒวัง เมี่ยน เยียม. อาเมน.

← Chapter 14 Jump to: Chapter 16 →