Romans 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1วั้ว หญู่ง, ยิวไท เมี่ยน ม่าย หาย หญู่ง เก้า หลง? เจี๋ย ก๊าด เญย เล์ย ม่าย หาย หญู่ง ม่าย ลั่ม หล่ง เญย ไฟ?

2ม่าย เญย เหลาะ. เหว่ย หญู่งๆ ม่าย ลั่ม หล่ง เญย. ตะเยี้ยด, ทิน-ฮู่ง เฒาะ นิ่น กั้น เญย หว่า จิว ปุน ยิวไท เมี่ยน โก๋ว.

3สี ก๊อง ม่าย เต๋ย ไม้ เหฒียบ ฒัวะ ฮนั้ง หาย นอ? วั้ว หญู่ง นิ่น บัว โหฒว ปุน ทิน-ฮู่ง เหฒียบ ฒัวะ เญย เจ๊า ไม้ ลั่ม หล่ง ไฟ?

4ไม้ เฒ์ย! ไม้ กุ๊น ลู่ง เดี๊ย เมี่ยน เต้าๆ ก๊อง-แปะ, ทิน-ฮู่ง ขูง ไฮ่ ก๊อง เฒียน ฮนั้ง. ฮนั้ง กีง-โซว เฟี้ย เจี๊ยน ก๊อง, “เม่ย ก๊อง เญย หว่า ปุน ธีง เม่ย หอบ. เม่ย หฒุ เซี้ยม เญย เฒี่ยง โห่ เม่ย หย่า ตุ๊ ฮี่ง.”

5อี้ หฒั่น เยีย อ๋อย ก๊อง น้าย เต๋ย หว่า เซ ฮนั้ง ป้าม เมี่ยน ฮนั้ม ธ้วด ต้าย ก๊อง นอ. เหฑีย ม่าย เมี่ยน ก๊อง, “สี ก๊อง บัว โหฒว เญย หว่าย สี่ ปุน ธีง ทิน-ฮู่ง โหฒว ตุ๊ หอบ, วั้ว หญู่ง บัว อ๋อย หฒุ ฮนั้ง หาย นอ ก๊อง? ทิน-ฮู่ง โน์ว บัว เซ นิ่น ไม้ แป้ง ฟิม ไฟ?”

6ฒู้ง ไม้ เฒ์ย! สี ก๊อง ทิน-ฮู่ง ไม้ แป้ง ฟิม, นิ่น ฮนั้ง หาย นอ ไฮ่ เซี้ยม ลู่ง เดี๊ย เมี่ยน?

7เหฑีย ม่าย เมี่ยน ไฮ่ ก๊อง, “สี ก๊อง เยีย โหฒว ไม้ หฒีง เก้า ไฮ่ ปุน ธีง ทิน-ฮู่ง โหฒว ตุ๊ หฒีง, ฯฒฯ ปุน เมี่ยน เก้า ตุ๊ ปวัด ทิน-ฮู่ง เญย ฌัง-หล่าง. ฮนั้ง หน่าย, ทิน-ฮู่ง เหว่ย หาย ติ่ว หธ่อ ตี่ง เยีย โหฒว ฒุ์ย-เมี่ยน?”

8เหว่ย หาย ติ่ว ไม้ ก๊อง, “อ๋อย หฒุ โหฒว หว่าย สี่ หธีง ต้าย ไฮ่ ธ้วด คู้ สี่?” ม่าย เต๋ย ก๊อง หว่า-ฮู้ บั๋ว เมี่ยน เยีย บัว ฮนั้ง น้าย นอ ก๊อง. นิ่น บัว หฒุ ตี่ง ฒุ์ย เซ หอบ ไห่ อ๊ะ.

9วั้ว หญู่ง, บัว ยิวไท เมี่ยน เก้า หลง จั๋น ไฟ? ไม้ เฒ์ย. ฒู้ง ก๊อง เจี๋ย เญย, ยิวไท เมี่ยน เหธา จั๋น, เหยียด ฒู้ง หฒุ ฒุ์ย เญย ชะ กุ๊น เจี๊ยน.

10ฮนั้ง กีง-โซว เฟี้ย เจี๊ยน ก๊อง, “ไม้ ม่าย หาย เต้า เหธา ทิน-ฮู่ง หอบ เฮญี้ยว, เหยียด เต้า หย่า ไม้ ม่าย.

11ไม้ ม่าย หาย เต้า เม่ง แปะ, หย่า ไม้ ม่าย หาย เต้า อ๋อย ล์อ ทิน-ฮู่ง.

12เต้าๆ ฮวิน ฆาง เล่ย ทิน-ฮู่ง. เหยียด ฒู้ง ฯฒฯ หว่าย เหฑ่ง หมี่ อ๊ะ. ไม้ ม่าย หาย เต้า โหฒว หลง, เหยียด เต้า หย่า ไม้ ม่าย.”

13“นิ่น บัว เญย จาง-โฮ่ ฮนั้ง เว้ด ทง เญย จั๋น-ไต่ โฒ้ว นอ. นิ่น บัว หล่ง เบียด ก๊อง หว่า ดั๊ว เมี่ยน.” “ฑุ่ย เหมย หย่า ก๊อง หว่า-โตะ ฮนั้ง นาง-โตะ เญย เดีย นอ.”

14“ม่าย อิม ไห่, เหฒียว เมี่ยน เญย หว่า ปวั๊ง เหฑ่ง ฑุ่ย.”

15“นิ่น บัว ฮู่ง เห่ โหฒว โตะ ไต๋ เมี่ยน เซี้ยบ,

16มี่ง เถา หาย หย่า ขูง โหฒว หว่าย ปุน เมี่ยน โค้ว ฮนั้ง.

17แป้ง ออน เญย เจ๊า นิ่น บัว ไม้ ฮิ้ว.”

18“นิ่น บัว หย่า ไม้ ฮิ้ว ตุ๊ กั้ม เหฑีย ทิน-ฮู่ง.”

19บัว ฮิ้ว ตุ๊ เล์ย-หลัด เฟี้ย ต้าย ก๊อง เญย เหยียด ฒู้ง เซ ก๊อง ปุน เยียม เล์ย-หลัด กะเดี๊ย เญย เมี่ยน. ฮนั้ง น้าย ปุน โม์ว ล่าน เมี่ยน ไม้ ม่าย หว่า ก๊อง, หย่า ปุน ลู่ง เดี๊ย เมี่ยน หฒุ ทิน-ฮู่ง เซี้ยม ฒุ์ย.

20เหว่ย หฒุ เอย ทิน-ฮู่ง หมั่ง, ไม้ ม่าย เหยียด เต้า เมี่ยน เหว่ย เอย เจี๊ยน เล์ย-หลัด โหฒว ไฮ่ ตุ๊ เหธา ทิน-ฮู่ง หอบ เฮญี้ยว. เล์ย-หลัด ขูง ปุน เมี่ยน ฮิ้ว ตุ๊ กั้น ม่าย ฒุ์ย ฮนั้ง.

21อี้ หฒั่น ทิน-ฮู่ง ปุน เมี่ยน ฮิ้ว ตุ๊ ฮนั้ง หาย นอ ไฮ่ ตุ๊ เหธา นิ่น หอบ เฮญี้ยว ต้าย. เซ ไม้ เฒ์ย เขา เล์ย-หลัด. มป่า เล์ย-หลัด เหธา โต่ว หว่า เมี่ยน เญย โซว โหฒว ฒอง-เหฒง ก๊อง น้าย ไม้ เขา เล์ย-หลัด เญย หฒะเอ๋ย.

22เหว่ย หฒุ เมี่ยน เสียน เขา เยซู กีตู่, ทิน-ฮู่ง หธีง ปุน เต้าๆ เสียน นิ่น วั้ว เต๋ย ตุ๊ เหธา นิ่น หอบ เฮญี้ยว. หย่า ไม้ ม่าย หาย เต้า กั้น หญู่ง,

23เหว่ย หฒุ โม์ว ล่าน เมี่ยน ฒู้ง ป์าม ฒุ์ย, เล่ย ตุ๊ ทิน-ฮู่ง เญย ฌัง-หล่าง โก.

24มป่า ทิน-ฮู่ง แปะๆ เหธย เอน, หล่ง กีตู่ เยซู หฒัวะ เมี่ยน หฑวน ฯฒฯ ปุน เมี่ยน เหธา นิ่น หอบ เฮญี้ยว ต้าย.

25ทิน-ฮู่ง จิว เยซู โหฒว เหฒี่ย เญย กะน้าย เหว่ย ปุน เมี่ยน เสียน เขา เยซู เญย ฑย้าม ฯฒฯ ตุ๊ ทิน-ฮู่ง กวั่ง ฒุ์ย. ทิน-ฮู่ง ฮนั้ง น้าย นอ โหฒว, ปิ๋ว เม่ง นิ่น เซ แป้ง ฟิม เญย. ฒิ่น ด่าง ทิน-ฮู่ง โหฒว เฮญี้ยว ด๊าว, ไม้ แก้ง เฒาะ เมี่ยน เญย ฒุ์ย.

26มป่า อี้ หฒั่น ทิน-ฮู่ง ปุน ธีง นิ่น แป้ง ฟิม เญย, เหว่ย หฒุ เมี่ยน ป์าม ฒุ์ย มป่า หาย เต้า เสียน เขา เยซู กีตู่, ทิน-ฮู่ง ปุน วั้ว เต้า เหธา นิ่น หอบ เฮญี้ยว.

27ฮนั้ง หน่าย, บัว ต้อ หาย หญู่ง ต้าย ปู๋ง หว่า-เหมา? ไม้ ม่าย หาย หญู่ง. เหว่ย หาย ติ่ว ไม้ ม่าย? เหว่ย หฒุ บัว เอย เจี๊ยน เล์ย-หลัด โหฒว ไฟ? ไม้ เฒ์ย. เซ เหว่ย หฒุ บัว เสียน ฮนั้ง.

28บัว ฮิ้ว ตุ๊ ทิน-ฮู่ง ปุน เมี่ยน เหธา นิ่น หอบ เฮญี้ยว เซ เหว่ย บัว เสียน เขา เยซู, ไม้ เฒ์ย เหว่ย เอย เล์ย-หลัด โหฒว.

29ทิน-ฮู่ง ขูง โหฒว ยิวไท เมี่ยน เญย ทิน-ฮู่ง ฮนั้ง ไฟ? นิ่น ไม้ โหฒว จั๋น เญย ทิน-ฮู่ง? โหฒว เญย เหลาะ. นิ่น หย่า โหฒว จั๋น เญย ทิน-ฮู่ง.

30ขูง ม่าย ดุ เต้า ทิน-ฮู่ง ฮนั้ง. นิ่น อ๋อย ปุน เลี่ยม ยิวไท เมี่ยน, เลี่ยม จั๋น เหธา นิ่น หอบ เฮญี้ยว. เหยียด ฒู้ง ตุ๊ เหธา นิ่น หอบ เซ เหว่ย นิ่น บัว เสียน เขา เยซู.

31วั้ว หญู่ง, บัว เสียน เยซู ฯฒฯ ปุน เล์ย-หลัด ด๊อด ไฟ? ไม้ เฒ์ย. ต๋าว หฑวน บัว โหฒว ปุน เล์ย-หลัด เก้า ว้วน.

← Chapter 2 Jump to: Chapter 4 →