Romans 4

Mien Bible (Thai Script) © Thailand Bible Society, 2007

← Chapter 3 Jump to: Chapter 5 →

1วั้ว หญู่ง, บัว อ๋อย หฒุ ฮนั้ง หาย นอ ก๊อง? เอย บัว ยิวไท เมี่ยน เญย โต้ว ฒง, โหฒว อง-ถาย-แงะ วั้ว เต้า อับลาฮัม, ฮนั้ง หาย นอ ตุ๊ เหธา ทิน-ฮู่ง หอบ เฮญี้ยว?

2สี ก๊อง อับลาฮัม เหว่ย นิ่น โหฒว เญย สี่ ตุ๊ เหธา ทิน-ฮู่ง หอบ เฮญี้ยว, นิ่น ฯฒฯ ไฮ่ ปู๋ง หว่า-เหมา. มป่า เยียม ทิน-ฮู่ง เญย หฑะเฮมียน อับลาฮัม ไม้ ไฮ่ ปู๋ง หว่า-เหมา.

3กีง-โซว ก๊อง, “อับลาฮัม เสียน ทิน-ฮู่ง. เหว่ย นิ่น เสียน, ทิน-ฮู่ง ฯฒฯ ฝุน อับลาฮัม เหธา นิ่น หอบ เฮญี้ยว.”

4เมี่ยน โหฒว กง ตุ๊ กง-ฒิ่น. นิ่น เญย กง-ฒิ่น ไม้ ฝุน โหฒว ฒี่ง เหญ่ย, เซ นิ่น กั้น เปี๊ยด ต้าย เญย ฮนั้ง.

5หาย เต้า ไม้ เขา กั้น โหฒว เญย สี่ มป่า เสียน เขา ทิน-ฮู่ง, ต้ง ปุน ฒุ์ย-เมี่ยน เหธา นิ่น หอบ เฮญี้ยว วั้ว เต้า, เหว่ย นิ่น เสียน, ทิน-ฮู่ง ฯฒฯ ฝุน วั้ว เต้า เหธา นิ่น หอบ เฮญี้ยว หมี่ อ๊ะ.

6ดาวิด หย่า ฟี่ ฮนั้ง เญย ก๊อง, ไม้ เขา กั้น โหฒว เญย สี่ มป่า เสียน เขา ทิน-ฮู่ง ฯฒฯ ตุ๊ เหธา ทิน-ฮู่ง หอบ เฮญี้ยว, วั้ว หญู่ง เมี่ยน ม่าย เฌียน-โย่ว อ๊ะ.

7ดาวิด ก๊อง, “หาย เต้า โหฒว ต่อง ฒุ์ย มป่า ตุ๊ ทิน-ฮู่ง กวั่ง ฆอย, นิ่น ป์าม ฒุ์ย มป่า ทิน-ฮู่ง กวั่ง นิ่น เญย ฒุ์ย, วั้ว เต้า ม่าย ออน-เหลาะ.

8หาย เต้า ไม้ หฒุ เฒี้ยว ฝุน นิ่น ม่าย ฒุ์ย, วั้ว เต้า ฯฒฯ ม่าย ออน-เหลาะ อ๊ะ.”

9น้าย หญู่ง เฌียน-โย่ว, ขูง เจี๋ย ก๊าด เญย เล์ย วั้ว เต๋ย เมี่ยน ไฮ่ ม่าย ฮนั้ง ไฟ? ไม้ เฒ์ย. ไม้ เจี๋ย ก๊าด เญย เมี่ยน มป่า ไฮ่ ม่าย เญย. เยีย บัว ฒู้ง ก๊อง เจี๋ย เญย. อับลาฮัม เสียน ทิน-ฮู่ง, ทิน-ฮู่ง ฯฒฯ ฝุน อับลาฮัม เหธา นิ่น หอบ เฮญี้ยว หมี่ อ๊ะ.

10ทิน-ฮู่ง เฒี่ยง หาย ฝุน อับลาฮัม เหธา นิ่น หอบ เฮญี้ยว? วั้ว หฒั่น อับลาฮัม เจี๋ย ก๊าด เญย เล์ย ไฟ ไม้ แก้ง เจี๋ย? วั้ว หฒั่น นิ่น หธ่อ ไม้ แก้ง เจี๋ย.

11นิ่น ฆะฮ้า หธีง ต้าย เจี๋ย. น้าย เจี๋ย ก๊าด เญย เล์ย โหฒว จั๋ง-โห่ ฮนั้ง ฆ้าบ เจี๊ยน เหยียน, ปุน ธีง อับลาฮัม เสียน ทิน-ฮู่ง, ทิน-ฮู่ง ฯฒฯ ฝุน เหธา นิ่น หอบ เฮญี้ยว. ฮนั้ง หน่าย, อับลาฮัม ฯฒฯ โหฒว เหยียด ฒู้ง เสียน ทิน-ฮู่ง เญย เมี่ยน เญย อง-ถาย-แงะ, ไม้ กุ๊น นิ่น บัว ไม้ แก้ง เจี๋ย ก๊าด เญย เล์ย. มป่า เมี่ยน เสียน ทิน-ฮู่ง, ทิน-ฮู่ง ฯฒฯ ฝุน นิ่น บัว เหธา นิ่น หอบ เฮญี้ยว อ๊ะ.

12อับลาฮัม หย่า โหฒว เจี๋ย ก๊าด เญย เล์ย วั้ว เต๋ย เมี่ยน เญย อง-ถาย-แงะ. ไม้ เฒ์ย หลาย นิ่น บัว เจี๋ย ก๊าด เญย เล์ย, เซ เหว่ย หฒุ นิ่น บัว เสียน ทิน-ฮู่ง ฮนั้ง อับลาฮัม ไม้ แก้ง เจี๋ย ก๊าด เญย เล์ย เสียน ทิน-ฮู่ง วั้ว นอ.

13ทิน-ฮู่ง แล์ง หว่า ปุน อับลาฮัม เหธา นิ่น เญย เฒ้ย-ฟุน. นิ่น ก๊อง ป้าม เกน อ๋อย เป๋น นิ่น บัว เญย ป่วน. ทิน-ฮู่ง ฮนั้ง น้าย นอ แล์ง ไม้ เฒ์ย เหว่ย อับลาฮัม เอย เล์ย-หลัด โหฒว. เซ เหว่ย อับลาฮัม เสียน ทิน-ฮู่ง, ทิน-ฮู่ง ฯฒฯ ฝุน อับลาฮัม เหธา นิ่น หอบ เฮญี้ยว.

14สี ก๊อง ทิน-ฮู่ง แล์ง น้าย เต๋ย หว่า ปุน เอย เล์ย-หลัด โหฒว เญย เมี่ยน, เมี่ยน เสียน ทิน-ฮู่ง ฯฒฯ ไม้ ม่าย เอ๋ย เล์ย. ทิน-ฮู่ง แล์ง เญย หว่า หย่า ไม้ ลั่ม หล่ง.

15เมี่ยน ไม้ เอย เจี๊ยน เล์ย-หลัด โหฒว, ทิน-ฮู่ง ฯฒฯ โน์ว ไห่ เมี่ยน. มป่า หาย นอม ต๋อง ไม้ ม่าย เล์ย-หลัด, เยียม วั้ว ไม้ ไฮ่ ป์าม เล์ย-หลัด.

16เหว่ย น้าย, อับลาฮัม เญย เฒ้ย-ฟุน อ๋อย หฒุ เสียน เขา ทิน-ฮู่ง หธีง ตุ๊ ฒิบ เอย ทิน-ฮู่ง แล์ง เญย หว่า. นิ่น บัว ตุ๊ ฒิบ เซ เหว่ย ทิน-ฮู่ง เญย เอน ฮนั้ง. เอย ทิน-ฮู่ง แล์ง เญย หว่า นิ่น เปว เจี๊ยน อับลาฮัม เญย เหยียด ฒู้ง เฒ้ย-ฟุน ตุ๊ ฒิบ. ไม้ เฒ์ย ขูง เอย เล์ย-หลัด โหฒว วั้ว เต๋ย ตุ๊ ฒิบ ฮนั้ง. นิ่น หย่า แล์ง ปุน เหยียด ฒู้ง เสียน ฮนั้ง อับลาฮัม เสียน วั้ว เต๋ย ตุ๊ ฒิบ, เหว่ย หฒุ อับลาฮัม โหฒว บัว เหยียด หฒวัง เญย อง-ถาย-แงะ.

17ฮนั้ง กีง-โซว เฟี้ย เจี๊ยน ก๊อง, “เยีย ปุน เม่ย โหฒว ธั้ม-ฝีง เมี่ยน เญย อง-ถาย-แงะ.” เอย ทิน-ฮู่ง หมั่ง, อับลาฮัม โหฒว บัว เญย เตีย. อับลาฮัม เสียน วั้ว เต้า ทิน-ฮู่ง เซ ต้ง ปุน ไต่ มี่ง เญย เมี่ยน นั่ง ต้าย หย่า ต้ง เห่ว ไม้ แก้ง ม่าย เญย กะน้าย ม่าย ต้าย ฯฒฯ หฒะเก้ง ม่าย ต้าย วั้ว เต้า ทิน-ฮู่ง.

18ไม้ กุ๊น อับลาฮัม กั้น ปวัด ไม้ ลั่ม ฮนั้ม อ๊ะ, นิ่น เสียน ทิน-ฮู่ง ฯฒฯ ม่าย ลั่ม ฮนั้ม เญย, หธีง ตุ๊ โหฒว เหฒีย ฝีง เมี่ยน เญย อง-ถาย-แงะ. ฮนั้ง กีง-โซว ก๊อง, “เม่ย ฒู้ง อ๋อย ม่าย เฒ้ย-ฟุน ด่ง น้าย ธั้ม.”

19วั้ว หฒั่น อับลาฮัม อ๊า ลั่ม ดั๊บ เปียะ เหยียด แป๊ะ หฮญัง. นิ่น ฮิ้ว ตุ๊ นิ่น กั้น เญย ซิน ต๋อง ฮนั้ง ไต่ หมี่ อ๊ะ นอ. ซาลา แซง-ยู์ง เญย เฒี่ยง โห่ หย่า เจี๋ย หมี่ อ๊ะ. มป่า อับลาฮัม หธ่อ เสียน ว้วน ทิน-ฮู่ง, หย่า ไม้ ถุย โป่ว.

20นิ่น เสียน ทิน-ฮู่ง อ๋อย เอย เจี๊ยน วั้ว เต๋ย แล์ง เญย หว่า โหฒว. นิ่น เญย เฮญี้ยว หย่า ไม้ ฮลู่ง ฮล้วด, หธ่อ จา เสียน เก้า ว้วน หย่า เธง ทิน-ฮู่ง.

21อับลาฮัม เสียน ตี่ง ทิน-ฮู่ง อ๋อย เอย วั้ว เต๋ย แล์ง เญย หว่า โหฒว.

22เหว่ย หฒุ อับลาฮัม ฮนั้ง น้าย นอ เสียน ทิน-ฮู่ง, ทิน-ฮู่ง ฯฒฯ ฝุน อับลาฮัม เหธา นิ่น หอบ เฮญี้ยว หมี่ อ๊ะ.

23“ฝุน นิ่น เหธา ทิน-ฮู่ง หอบ เฮญี้ยว หมี่ อ๊ะ,” น้าย โจ๋ว หว่า ไม้ ตาน เหว่ย อับลาฮัม เฟี้ย ฮนั้ง.

24หย่า เหว่ย บัว เฟี้ย เหว่ย หฒุ บัว เสียน ทิน-ฮู่ง, ต้ง ปุน บัว เญย เฒี้ยว เยซู นั่ง ต้าย วั้ว เต้า. ฮนั้ง หน่าย, ทิน-ฮู่ง ฯฒฯ ฝุน บัว เหธา นิ่น หอบ เฮญี้ยว หมี่ อ๊ะ.

25เยซู หฒุ จิว ปุน เมี่ยน ไต๋ เซ หลาย บัว เญย ฒุ์ย. หฒุ ไต๋ ไต่ มป่า ทิน-ฮู่ง แอ๋ง ปุน นิ่น นั่ง ต้าย เหว่ย ปุน บัว ตุ๊ เหธา ทิน-ฮู่ง หอบ เฮญี้ยว.

← Chapter 3 Jump to: Chapter 5 →