2 Corinthians 1

Kamba (Mbivilia) 1956

Jump to: Chapter 2 →

1Vaulo, mũtũmwa wa Klĩsto Yesũ kwondũ wa kwenda kwa Ngai, na Timotheo mwana‐a‐asa waitũ, valũa ũũ witũ ũyĩvikĩe ĩkanisa ya Ngai yĩla yĩ Kolintho, vamwe na ala atheu onthe, ala me nthĩ yonthe ya Akaia:

2Mumo na mũuo nĩmethĩwe nenyu kuma kwa Ngai Asa waitũ na kwa Mwĩaĩi Yesũ Klĩsto.

3Nataĩwe Ngai, Ĩthe wa Mwĩaĩi waitũ Yesũ Klĩsto, Ĩthe wa matei na Ngai wa ũkiakisyo w’onthe;

4ũla ũtũkiakiasya mathĩnanĩ maitũ onthe, nĩ kana ithyĩ tũtonye kũmakiakisya ala me thĩnanĩ o na wĩva, na ũkiakisyo ũla ithyĩ naitũ tũkiakiaw’a naw’o nĩ Ngai.

5Nĩkwĩthĩwa o tondũ mathĩna ma Klĩsto mausũĩte ki kwitũ, o ta ũu ũkiakisyo witũ naw’o nĩwusũĩte ki kwondũ wa Klĩsto.

6Ĩndĩ ethĩwa nĩtũthĩnaw’a, nĩ ũndũ wa ũkiakisyo na ũtangĩĩo wenyu; kana ethĩwa nĩtũkiakiaw’a, nĩ ũndũ wa ũkiakisyo wenyu, ũla ũtethasya wĩa wa kũmĩĩsya mathĩna o ala naitũ tũthĩnaw’a nĩo:

7na wĩkwatyo witũ kwondũ wenyu nĩ mũlũmu, twĩsĩ kana o tondũ mwĩ osi ma mathĩna, o ta ũu mwĩ osi ma mokiakisyo.

8O na tũikwenda, ana‐a‐asa, mũlee ũmanya mathĩna ala matũkwatĩe nthĩ ya Asia, kana twaitavĩwe mũno, kũvĩta vinya witũ, o na twayĩtũka kwĩthĩwa thayũ:

9ĩĩ, ithyĩ ene nthĩnĩ waitũ tweewie ta tũte ndĩi ya kũlea ũkw’a, nĩ kana tũikeĩkĩĩe ithyĩ ene, ĩndĩ tũmũĩkĩĩe Ngai ũla ũthayũũkasya akw’ũ:

10ũla watwovoisye kũtumya kĩkw’ũnĩ kĩnene ta kyu, nake akatwovosya: we ũla tũmwĩkwatĩtye kana akatwovoasya:

11inyw’ĩ nenyu mũkĩtetheanĩsya kũvoya kwondũ witũ; nĩ kana, kwondũ wa mũthĩnzĩo ũla twanengiwe ithyĩ nũndũ wa andũ aingĩ, aingĩ matonye kũtũnga mũvea kwondũ witũ.

12Nũndũ kwĩkathĩĩa kwitũ nĩ kũũ, ũkũsĩ wa wasya wa ngoo witũ, kana twekalile kũũ nthĩ, na mbee mũno nĩ kwenyu, twĩ na ũtheu na w’o wa ngoo wumĩte kwa Ngai, na ti na ũĩ wa mwĩĩ ĩndĩ mumonĩ wa Ngai.

13Nũndũ tũiũmũandĩkĩa maũndũ angĩ, no ala mũsomaa na kũmalĩkĩla, nakwa nĩnĩkwatĩtye kana mũkalĩkĩla kũvika mũminũkĩlyo:

14o tondũ nenyu mwatũlĩkĩle ithyĩ kũmwe, kana kĩtumi kya kwĩkathĩĩa kwenyu nĩ ithyĩ, o tondũ nenyu mwĩĩthĩwa kĩtumi kya kwĩkathĩĩa kwitũ, mũthenya wa Mwĩaĩi waitũ Yesũ.

15Na ngĩkwatya ũu, nenda kũka kwenyu mbee, nĩ kana mwone ũtethyo wa kelĩ;

16na ngĩvĩtĩla kwenyu kũvika nthĩ ya Masetonia, na ĩngĩ kuma Masetonia kũsyoka kwenyu, na ngyumaaw’a ĩngĩ nĩ inyw’ĩ kũthi Yutia.

17Ĩndĩ yĩla nasũanĩaa ũu, naĩ na mĩtwe ĩlĩ? Kana maũndũ ala nĩsũanĩaa, nĩsũanĩaa kwĩanana na mwĩĩ, kana kwakwa kwĩthĩwe ĩĩ na ĩĩ, na aiee na aiee?

18Ĩndĩ o tondũ Ngai wĩ kĩthito, ndeto yaitũ ĩla twamũtavisye ti ĩĩ na aiee.

19Nũndũ Mwana wa Ngai, Yesũ Klĩsto, ũla watavaniw’e kwenyu nĩ ithyĩ, nyie na Silivano na Timotheo, ndaĩ na ĩĩ na aiee, ĩndĩ nthĩnĩ wake nĩ ĩĩ.

20Nũndũ o ũndũ matho ma Ngai meana, nthĩnĩ wake nĩ ĩĩ: nayo Ameni nĩ kwondũ wake, nĩ kana Ngai ataĩwe kwondũ witũ.

21Ĩndĩ we ũla ũtũlũlũmĩlasya vamwe nenyu nthĩnĩ wa Klĩsto, na watwĩtĩkĩĩsye mauta, nĩ Ngai;

22nake nĩwe watũsiĩlile, na watũnengie ngwatĩlĩlyo, nayo nĩ Veva ngooni sitũ.

23Ĩndĩ nyie nĩngũmũweta Ngai akũsĩĩe ngoo yakwa, kana naleile kũka Kolintho nũndũ wa ũmwĩw’ĩa tei.

24Ti ati twĩsumbĩkĩtye mũĩkĩĩonĩ wenyu, ĩndĩ twĩ atethya ma ũtanu wenyu; nũndũ nĩmũũngeme na ũlũmu kwondũ wa mũĩkĩĩo.

Jump to: Chapter 2 →