2 Corinthians 3

Kamba (Mbivilia) 1956

← Chapter 2 Jump to: Chapter 4 →

1Nĩtũkwambĩlĩlya ĩngĩ kwĩĩkĩĩthya ithyĩ ene? Kana twĩ vata na mavalũa ma kũtũĩkĩĩthya maetwe kwenyu kana maume kwenyu tondũ amwe mekaa?

2Valũa witũ nĩ inyw’ĩ, ũandĩkĩtwe ngoonĩ sitũ, ũla wĩsĩkĩwe na ũsomawa nĩ andũ onthe;

3mũkyonanw’a kana mwĩ valũa wa Klĩsto, ũthũkũmĩtwe nĩ ithyĩ, ũla ũtaandĩkĩtwe na ingi, ĩndĩ na Veva wa Ngai ũla wĩ thayũ; na ti masengeanĩ ma mavia, ĩndĩ nĩ masengeanĩ ma ngoo sya nyama.

4Na wĩkwatyo ũsu twĩ naw’o ũmwelekele Ngai kwondũ wa Klĩsto:

5ti atĩ nĩtwĩanĩsye ĩthyĩ ene kũsũanĩa ũndũ o na wĩva ta wumĩte kwitũ; ĩndĩ wĩanĩsyo witũ wumaa kwa Ngai;

6ũla nake watwĩanĩsye twĩthĩwe athũkũmi ma ũtianĩo mweũ; ti wa ũandĩko, ĩndĩ nĩ wa veva; nũndũ ũandĩko nĩwũaa, ĩndĩ veva ũetae thayũ.

7Ĩndĩ ethĩwa ũla ũthũkũmi wa kĩkw’ũ, waandĩkĩtwe ũvanĩtwe masengeanĩ ma mavia, wookie na ũtheu mũtisu, ũndũ ana ma Isilaeli matyaatonya kũketeea ũthyũ wa Mose kwondũ wa ũtheu mũtisu waw’o; na nĩ ũtheu mũtisu ũla wavĩtĩte:

8nĩ mbee veana ata ũthũkũmi wa veva kwĩthĩwa wĩ na ũtheu mũtisu kwĩ ũsu?

9Nũndũ ethĩwa ũthũkũmi wa ũsilĩlo wĩ na ũtheu mũtisu, ũthũkũmi wa ũlũngalu wĩ na ũtheu mũtisu kũvĩtũka mũno mbee.

10Nũndũ nĩ w’o ũla wataĩiwe ndwaĩ ũtaĩo ũndũnĩ ũũ, nũndũ wa ũtaĩo ũvĩtũkĩte mũno.

11Nũndũ ethĩwa ũla ũvĩtĩte waĩ na ũtaĩo, ũla wĩkalaa nũvĩtũkĩte mũno mbee.

12Kwondũ wa kwĩthĩwa twĩ na wĩkwatyo ta ũsu, twĩneena na ũkũmbaũ mũnene,

13na tũtitilyĩ ta Mose, ũla wavw’ĩkie ũthyũ wake suka mũvũthũ, nĩ kana ana ma Isilaeli maikaketeee mũminũkĩlyo wa ũndũ wavĩtĩte:

14ĩndĩ mosũanĩo moo maĩ momũ: na kũvika mũnthĩ ũũ, ũtianĩo wa tene ũkĩsomwa, suka ũsu wĩ o vo, ndwaavetwa; ĩndĩ nũvetawa nthĩnĩ wa Klĩsto.

15Ĩndĩ kũvika ũmũnthĩ, o yĩla mavuku ma Mose meũsomwa, suka ũsu nũvw’ĩkĩte ngoo syoo.

16Ĩndĩ ĩvinda o yĩla mũndũ wĩmwĩthyũũĩa Mwĩaĩi, suka ũsu nũvetawa.

17Ĩndĩ Mwĩaĩi nĩwe Veva; na vala ve Veva wa Mwĩaĩi, nĩvo ve ũthasyo.

18Ĩndĩ ithyonthe, na mothyũ mate mavw’ĩke tũkyona ũtheu mũtisu wa Ngai ta kĩsisyonĩ, nĩtũũalyũlwa na kwosa mũvw’ano ũsu, kuma ũtheu mũtisu kũvĩkĩa ũtheu mũtisu, o ta kuma kwa Mwĩaĩi, nake nĩwe Veva.

← Chapter 2 Jump to: Chapter 4 →