2 Corinthians 13

Kamba (Mbivilia) 1956

← Chapter 12 Jump to:

1Yũka yĩĩ niũka kwenyu nĩ ya katatũ. Ũndũ wa makanyw’a ma ngũsĩ ili kana itatũ kĩla ũndũ ũkalũlũmĩlw’a.

2Nambie kũneena na nĩngũneena ĩngĩ nde vo, o tondũ namũtavisye yĩla naĩ nenyu ĩvinda ya kelĩ, no ta ũu yu, kana ala meekie naĩ na vu tene na ala angĩ onthe, ethĩwa nĩngũka ĩngĩ, ndiĩw’ĩa tei;

3nũndũ nĩmũkũmantha ũndũ wa kũmũmanyĩthya kana Klĩsto nĩwe ũneenaa nthĩnĩ wakwa; ũla ũte mwonzu kwenyu, ĩndĩ e na vinya nthĩnĩ wenyu:

4nũndũ ambiwe kwondũ wa wonzu, ĩndĩ e thayũ kwondũ wa vinya wa Ngai. Nũndũ ithyĩ naitũ twĩ onzu nthĩnĩ wake, ĩndĩ tũkeethĩwa thayũ vamwe nake kwondũ wa vinya Ngai ũla welekele kwenyu.

5Ĩthimei inyw’ĩ ene, kana mwĩ ũla mũĩkĩĩonĩ; iosyei inyw’ĩ ene. Kana mũtyĩsĩ ũndũ wenyu, atĩ Yesũ Klĩsto e nthĩnĩ wenyu? Ate ũu mwĩthĩwa mũleetwe.

6Ĩndĩ nĩngwĩkwatya kana mũkamanya kana ithyĩ tũtileetwe.

7Na yu twĩmũvoya Ngai kana mũikeke naĩ; ti kana ithyĩ twoneke twĩtĩkĩlwe, ĩndĩ nĩ kana inyw’ĩ mwĩke ũla waĩle, o na kau nĩ ta tũleetwe.

8Nũndũ tũtitonya kwĩka ũndũ o na wĩva wa ũsiĩĩa ũla w’o, ĩndĩ no kwa ngalĩ ya ũla w’o.

9Nũndũ nĩtũtanaa, yĩla ithyĩ twĩ onzu, na inyw’ĩ mwĩ na vinya: na ĩngĩ nĩtũvoyeaa ũndũ ũũ naw’o, nĩ kana mwĩanĩe.

10Kwondũ wa ũu nĩandĩka maũndũ aa nde vo, nĩ kana yĩla nĩĩthĩwa vo ndikeke ũndũ na ũkandĩa, kwĩanana na ũkũmũ ũla Mwĩaĩi wanengie kwondũ wa kwaka, na ti kũomboa.

11Na kũminũkĩlya, ana‐a‐asa, ĩkalai na ũvoo. Ianĩai; kiakiw’ai; ĩthĩwai na kĩlilikano kĩmwe; ĩkalai mũuonĩ: na Ngai wa wendo na mũuo akeethĩwa nenyu.

12Kethan’yai na ũmumunyano mũtheu.

13Atheu onthe nĩmamũkethya.

14Mumo wa Mwĩaĩi Yesũ Klĩsto, na wendo wa Ngai, na mũamba wa Veva Mũtheu, nĩmethĩwe nenyu inyw’onthe.

← Chapter 12 Jump to: