2 Corinthians 10

Kamba (Mbivilia) 1956

← Chapter 9 Jump to: Chapter 11 →

1Na yu, nyie Vaulo mwene, nĩngũmwĩsũva na wĩnyivyo na ũuu wa Klĩsto, nyie ũla nĩ na wĩnyivyo yĩla nĩ vamwe nenyu, ĩndĩ neethĩwa nĩ kũasa nenyu nĩ na ũkũmbaũ mwingĩ kwenyu:

2ĩĩ, nĩngũmwĩsũva, nĩ kana yĩla nĩĩthĩwa vamwe nenyu ndikethĩwe ngyonan’ya ũkũmbaũ mũnene ũla ngũtala kũmakũmbaĩa amwe, ala matũtalaa ta tũendaa kĩ‐mwĩĩ.

3Nũndũ o na kau twĩkinya na mwĩĩ, tũikũkita kwĩanana na mwĩĩ

4(nũndũ mĩio ya kaũ ya kũkita kwitũ ti ya mwĩĩ, ĩndĩ yĩ na vinya kwa Ngai wa kũomboa ngome syĩ vinya);

5tũkĩomboa malilikano, na kĩla kĩndũ kĩtũlu kĩtũlĩtye kĩlee ũmanyi wa Ngai, na tũkĩete kĩla kĩsũanĩo ũkombonĩ wa kũmwĩw’a Klĩsto;

6na tũkĩthĩwa twĩyũmbanĩtye kũivanĩsya kũlea kwĩw’a kw’onthe, o yĩla kwĩwa kwenyu kũkeanĩw’a.

7Mwĩsisya maũndũ ala me mbee wa mothyũ menyu. Ethĩwa mũndũ o na wĩva nũkwĩĩkĩĩa mwene kana nĩ wa Klĩsto, nasũanĩe ĩngĩ nthĩnĩ wake, kana, o ũndũ we nĩ wa Klĩsto, naitũ no ta ũu.

8Nũndũ o na ngekathĩĩa mũnango kwondũ wa ũkũmũ witũ (ũla Ngai watũnengie wa kũmwaka, na ti wa kũmũomboa), ndikasonoka:

9ndikesa kwoneka ta ngũmũtĩsya na mavalũa makwa.

10Nĩkwĩthĩwa measya, Mavalũa make nĩ maito na me vinya; ĩndĩ yĩla wĩ vo mwĩĩnĩ nĩ kyonze, na ũneeni wake ndwĩ ũndũ ũtonya.

11Ũla uilyĩ ũu nasũanĩe ũũ, kana, o ũndũ tũilyĩ ndetonĩ sya mavalũa tũte vo, nĩw’o tũilyĩ kwa meko twĩ vo.

12Nũndũ tũti na ũkũmbaũ wa kwĩtala kana kwĩelekan’ya na asu ala mekwĩkathĩĩa ene: ĩndĩ nao ene, makĩthima ene kwa ene, na kwĩelekan’ya ene kwa ene, mati na ũmanyi.

13Ĩndĩ ithyĩ tũikekathĩĩa kũvita vala tũthimĩwe, ĩndĩ o kwĩanana na kĩthimo kĩla Ngai watũthimĩe, nĩ kana tũvike o na kwenyu.

14Nũndũ tũtiũvĩtũka vala tũthimĩwe, ta tũteũvika kwenyu: nũndũ twambie kũvika o na kwenyu tũkĩtavan’ya ũvoo mũseo wa Klĩsto:

15o na ti kwĩkathĩĩa kũvĩtũka vala tũthimĩwe, ta kwĩkathĩĩa mawĩanĩ ma andũ angĩ; ĩndĩ tũkĩkwatya kana ũndũ mũĩkĩĩo wenyu wĩanaa, tũkataĩwa kwenyu mũno kwĩanana na vala tũthimĩwe,

16nĩ kana tũtonye kũtavan’ya ũla ũvoo mũseo kũvika nthĩ ila syĩ mbee wa kwenyu, tũtekwĩkathĩĩa wĩanĩ wa mũndũ ũngĩ maũndũnĩ ala maminĩtwe kũseũvw’a.

17Ĩndĩ ũla ũnũkwĩkathĩĩa, nĩekathĩĩe nthĩnĩ wa Mwĩaĩi.

18Nũndũ ti ũla ũnũkwĩkathĩĩa mwene wĩtĩkĩlawa, ĩndĩ no ũla Mwĩaĩi ũnũũmũkathĩĩa.

← Chapter 9 Jump to: Chapter 11 →