2 Corinthians 6

Kamba (Mbivilia) 1956

← Chapter 5 Jump to: Chapter 7 →

1Na ĩndĩ tũkĩtethan’ya vamwe nake twĩmwĩsũva mũikose mumo wa Ngai mana

2(nũndũ we easya, Nĩnakwĩwie ĩvinda yĩla yĩtĩkĩlĩtwe, Na mũthenya wa ũtangĩĩo nĩnaũtethisye: sisyai, yĩĩ nĩyo ĩvinda yĩtĩkĩlĩtwe; sisyai, mũthenya wa ũtangĩĩo no yu):

3mũteũete ũndũ o na wĩva wa ũlulutĩkya, nĩ kana ũthũkũmi ũũ witũ ndũkawetwe naĩ;

4ĩndĩ maũndũnĩ onthe nĩtũkwĩĩkĩĩthya, ta athũkũmi ma Ngai, nthĩnĩ wa wũmĩĩsyo mwingĩ, na mathĩna, na mavata, na monyamao,

5na makũnwa, na kwovwa kolokolonĩ, na ituu, na thĩna wa mawĩa, na kũsyaĩĩsya, na kũtĩĩa kũya;

6na ũtheu, na ũmanyi, na wũmĩĩsyo, na ũseo, na nthĩnĩ wa Veva Mũtheu, na wendo ũte na wangangan’yo,

7na ndeto ya w’o, na vinya wa Ngai; kwondũ wa mĩio ya kaũ ya ũlũngalu kw’okonĩ kwa aũme na kw’okonĩ kwa aka.

8Ethĩwa nĩtũũtaĩwa kana kũtataĩwa, kũwetwa naĩ kana nesa; ta twĩ akengani, na kaĩ twĩ ma w’o;

9ta twĩ ala matesĩkĩwe, na kai twĩsĩkĩwe mũno; ta tũkusaa, na kaĩ twĩ thayũ; ta tũkũnawa, na kaĩ tũtyũawa;

10ta twi na kĩmako, na kaĩ tũtanaa mavinda onthe; ta twĩ ngya, na kaĩ tũmathuasya aingĩ; ta tũte kĩndũ, na kaĩ twĩ na syĩndũ syonthe.

11Makanyw’a maitũ nĩmwathamĩwe, inyw’ĩ Akolintho, ngoo sitũ ninenevetw’e.

12Ti inyw’ĩ mwaĩte va kwendelwa ngoonĩ sitũ, ĩndĩ ngoo syenyu nĩsyo syaĩte va kwendanĩla.

13Ĩndĩ nenevai ngoonĩ syenyu mũtũĩve kĩthemba o kyu (nĩneena ta ngũneena na syana syakwa).

14Mũtikovanĩw’e ĩsoki yĩmwe na ala mate etĩkĩli: nũndũ ũlũngalu na ũthũku wĩ mũamba mwaũ? Kana kyeni kĩ na mũamba mwaũ na kĩvindu?

15Na Klĩsto e na mũamba mwaũ na Veliali? Na ũla wĩtĩkĩlĩte e na kĩanda kyaũ vamwe na ũla ũtetĩkĩlĩte?

16Na ĩkalũ ya Ngai yĩ na wĩw’ano mwaũ na mĩvw’anano? Nũndũ ithyĩ twĩ ĩkalu ya Ngai ũla wĩ thayũ; o tondũ Ngai waisye, Ngekalaa nthĩnĩ woo, na kũendaa nthĩnĩ woo; na ngeethĩwa Ngai woo, namo makeethĩwa andũ makwa.

17Kwondũ wa ũu Umai katĩ woo, na mwĩthĩwe mwĩvathanĩte nao, eneena ũu Mwĩaĩi, Na mũikakiite kĩndũ kĩvuku; Nakwa ngamwosa,

18Na ngeethĩwa ĩthe wenyu, Na inyw’ĩ mũkeethĩwa ana makwa, aũme na eĩtu, eneena ũu Mwĩaĩi, Mwene Vinya W’onthe.

← Chapter 5 Jump to: Chapter 7 →