2 Corinthians 7

Kamba (Mbivilia) 1956

← Chapter 6 Jump to: Chapter 8 →

1Kwondũ wa kwĩthĩwa twĩ na matho aa, endwa, twĩthesye ene ũvuku w’onthe wa mwĩĩ na wa ngoo, tũkĩanĩsya ũtheu nthĩnĩ wa kũmũkĩa Ngai.

2Tũvingũĩei ngoo syenyu: tũimwĩkite mũndũ naĩ, tũiaathũkya mũndũ, tũiaasesenga mũndũ.

3Ndiũneena ũu nĩmũsilĩle inyw’ĩ: nũndũ nambie ũneena, kana mwĩ nthĩnĩ wa ngoo sitũ tũkw’e vamwe na twĩthĩwe thayũ vamwe.

4Kũneena kwakwa nenyu kwĩ na ũkũmbaũ mũnene, kwĩkathĩĩa kwakwa kwondũ wenyu nĩ kũnene: nusũĩtwe nĩ ũkiakisyo, na thĩnanĩ witũ w’onthe nusũĩtwe nĩ ũtanu ki, ũketĩka.

5Nũndũ o yĩla twavikie Masetonia mĩĩ yaitũ ndĩaĩ na ũthũmũo, ĩndĩ nĩtwathĩnaw’a ngalĩ syonthe; ũtee kwaĩ kaũ, na nthĩnĩ kwaĩ w’ĩa.

6Ĩndĩ vamwe na ũu Ngai, ũla ũkiakiasya, ala mavinyĩwe, nĩwe watũkiakiisye nũndũ wa Tito kũka;

7na ti ũndũ wa kũka kwake kw’oka, ĩndĩ ũndũ wa ũkiakisyo naw’o ũla ũkiakiĩtw’e nĩ inyw’ĩ, akĩtũtavya ũndũ wa mea menyu maingĩ, na kĩĩo, na kĩthing’ĩĩsyo kyenyu kwondũ wakwa; nakwa neethĩwa ngĩtana mũno mbee.

8Nũndũ o na ethĩwa namwĩw’ĩthisye woo na valũa wakwa, ndikwĩlila: o na ethĩwa nĩneelilile (nũndũ nĩngwona kana valũa ũsu nĩwamwĩw’ĩthisye woo, o na kau no kavinda),

9yu nĩngũtana, ti ũndũ mweew’ĩthiw’e woo, ĩndĩ nũndũ mwew’ĩthĩw’e woo kũvika ũalyũlo wa ngoo; nũndũ mwew’ĩthiw’e woo ũla Ngai wendete, nĩ kana mũikone wasyo kwondũ witũ ũndũnĩ o na wĩva.

10Nũndũ woo ũla Ngai wendete ũetae ũalyũlo wa ngoo kũvika ũtangĩĩo, naw’o nĩ ũalyũlo ũtaetae kwĩlila: ĩndĩ woo wa nthĩ ũetae kĩkw’ũ.

11Nũndũ sisyai ũndũ ũũ, kwĩw’ĩthw’a woo kũla Ngai wendete, ũndũ kwaetie kwĩsũvĩa kũnene nthĩnĩ wenyu, ĩĩ, na kwĩkaĩĩa, ĩĩ, na kũthata, ĩĩ, na kũkĩa, ĩĩ, na mea, ĩĩ, na kwĩthing’ĩĩsya, ĩĩ, na kũĩvanĩsya! Kĩla ũndũnĩ nĩmwĩyonanĩtye kwĩthĩwa mwĩ atheu ũndũnĩ ũsu.

12Na ĩndĩ o na ethĩwa nĩnamũandĩkĩe, ndyaamũandĩkĩa kwondũ wa ũsu wekĩte naĩ, o na ti ũndũ wa ũla wekĩtwe naĩ, ĩndĩ nĩ kana kĩthing’ĩĩsyo kyenyu kwondũ witũ kyoneke kwenyu mbee wa Ngai.

13Kwondũ wa ũu nĩtwakiakiiw’e: na kũkiakiw’anĩ kwitũ twatanie mũno mbee kwondũ wa ũtanu wa Tito, nũndũ veva wake nũvuũkĩtw’e nĩ inyw’ĩ inyw’onthe.

14Nũndũ ethĩwa nĩneekathĩĩe kwake ũndũnĩ ũmwe kwondũ wenyu, ndyaasonokw’a; ĩndĩ o ũndũ twamũtavisye maũndũ onthe w’o, o ta ũu kwĩkathĩĩa kwitũ nakw’o kũla nakathĩĩaa mbee wa Tito kwoonekie nĩ kwa w’o.

15Na wendo wake wa ngoo wingĩvĩte mũno kwenyu, yĩla ũnũũlilikana wĩwi wenyu inyw’onthe, ũndũ mwamwosie na w’ĩa na kũtetema.

16Nĩngũtana nũndũ maũndũnĩ onthe nĩ na ũnyiau mwingĩ kwondũ wenyu.

← Chapter 6 Jump to: Chapter 8 →