Esther 1

Kamba (Mbivilia) 1956

Jump to: Chapter 2 →

1Na kweethĩwa mĩthenyanĩ ya Aasuelo (Aasuelo ũsu nĩ ũla wasumbĩkĩte kuma India o na kũvika Ethiovia, ĩũlũ wa ilungu nene sya nthĩ ĩana na mĩongo ĩlĩ na mũonza),

2mĩthenya ĩsu, yĩla mũsumbĩ Aasuelo wekalĩte kĩvĩlanĩ kyake kya ũsumbĩ, kĩla kyaĩ nyũmbanĩ nene ya ũsumbĩ ku Susani,

3mwaka wa katatũ wa kũsumbĩka kwake, avokea anene make onthe me mbee ũsumbĩnĩ na athũkũmi make mboka; ala me ũtonyi ma Velisia na Metia, anene me ndaĩa na anene me mbee ũsumbĩnĩ ma ilungu isu nene sya nthĩ, meethĩwa mbee wake;

4nĩvo wonanisye ũthwii wa ũsumbĩ wake mũnene na ndaĩa ya ũnene wake mwingĩ mĩthenya mingĩ, o mĩthenya ĩana na mĩongo nyanya.

5Na matukũ asu meanĩa, mũsumbĩ avokea andũ onthe ala maĩ nyũmbanĩ nene ya ũsumbĩ ku Susani, mboka, anene o na anini, mĩthenya mũonza, vau nza ya nyũmba nene mbanakavye ya mũsumbĩ yĩ mũũnda.

6Vaniinĩtw’e ngũa nzaũ, na syĩ waiũ, na sya vuluu, syovetwe na ndii sya katane nzeo na iilyĩ ta ndune ngomenĩ sya vetha ituĩnĩ sya mavia maseo: mokomo maĩ ma thaavu na vetha, mekĩtwe vandũ vaseũvye na mavia maseo matune, na meũ, na me ĩuuku, na maiũ.

7Na mamanenga manyw’ĩe mĩionĩ ya thaavu (mĩio ĩla yaĩ kĩvathũkan’yo ũmwe na ũla ũngĩ), na mbinyu ya kĩũsumbĩ mbingĩ mũno, kwĩanana na ũlau wa mũsumbĩ.

8Na kũnyw’a kũu kwaĩ o kwĩanana na mwĩao; vatyaĩ ũtonya kũingĩĩw’a: nũndũ ũu mũsumbĩ nĩwatw’ĩte kwa anene onthe ma nyũmba yake, kana mo meke kwĩanana na kwenda kwa kĩla mũndũ.

9Nake Vasiti mũka wa mũsumbĩ avokea iveti ila syaĩ nyũmbanĩ ya kĩũsumbĩ ya mũsumbĩ Aasuelo mboka.

10Mũthenya wa mũonza, yĩla ngoo ya mũsumbĩ yatanĩtw’e nĩ mbinyu, ameaĩa Meumani, na Mbisitha, na Alivona, na Mbikitha, na Avakitha, na Nzethali, na Kalikasi, avakũe mũonza ala mathũkũmĩaa mbee wa mũsumbĩ Aasuelo,

11mamũete Vasiti mũka wa mũsumbĩ mbee wa mũsumbĩ e na ngovia ya kĩũsumbĩ, asyony’e ngo sya andũ na anene me mbee ũsumbĩnĩ ũseo wake; nũndũ aĩ mũseo kwa kũsiw’a.

12Ĩndĩ Vasiti mũka wa mũsumbĩ alea kũka kwondũ wa mwĩao wa mũsumbĩ ũla watwaĩwe nĩ ala avakũe: kwondũ wa ũu mũsumbĩ athilĩka mũno, na ũthatu wake wakana nthĩnĩ wake.

13Nĩvo ĩndĩ mũsumbĩ wakũlilye andũ oĩ, ala meesĩ mavinda (nũndũ ũu waĩ mwĩkalĩle wa mũsumbĩ kwa onthe ala meesĩ mwĩao na ũsili:

14na ala mamũatĩĩe ũnenenĩ maĩ Kalisena, na Sethali, na Atimatha, na Talisisi, na Melesi, na Malisena, na Memukani, anene mũonza me mbee ũsumbĩnĩ ma Velisia na Metia, ala moonaa ũthyũ wa mũsumbĩ, na mekalaa me ma mbee ũsumbĩnĩ ũsu),

15Twĩmwĩka ata Vasiti mũka wa mũsumbĩ kwĩanana na mwĩao, nĩkwĩthĩwa ndaneka ũtw’ĩo wa mũsumbĩ Aasuelo ũla watwaĩwe nĩ ala avakũe?

16Na Memukani asũngĩa vala ve mũsumbĩ na anene mbee ũsumbĩnĩ, Vasiti mũka wa mũsumbĩ ndaneka mũsumbĩ naĩ e weka, ĩndĩ o na anene onthe me mbee ũsumbĩnĩ, na ngo syonthe sya andũ ila syĩ ilungunĩ nene syonthe sya nthĩ sya mũsumbĩ Aasuelo.

17Nũndũ wĩko ũũ wa mũka wa mũsumbĩ ũkanyaĩĩkw’a kwa aka onthe, mavũthye aũme moo methonĩ moo, yĩla kwĩtavanw’a, Mũsumbĩ Aasuelo aneeaĩe Vasiti mũka wa mũsumbĩ aetwe mbee wake, ĩndĩ ndaneeũka.

18Na mũnthĩ ũũ aka ma anene me mbee ũsumbĩnĩ ma Velisia na Metia, meew’a wĩko wa mũka wa mũsumbĩ, makaneena o ta ũu kwa anene onthe me mbee ũsumbĩnĩ ma mũsumbĩ. Na ĩndĩ kũkookĩla kĩvũthya kĩnene na ũthilĩku.

19Ethĩwa nĩwendeesya mũsumbĩ, nĩkume mwĩao wa kĩũsumbĩ kuma kwake, na ũkĩandĩkwa katĩ wa mĩao ya Avelisia na Ametia, ĩla ĩtaalyũkaa, kana Vasiti ndakaaũke ĩngĩ vala ve mũsumbĩ Aasuelo; na mũsumbĩ nanenge ũngĩ wĩ kavaa kwĩ we kĩanda kya kĩũsumbĩ vandũ vake.

20Na yĩla ũtw’ĩo wa mũsumbĩ ũla wĩumya wĩnyaĩĩkw’a ũsumbĩnĩ wake w’onthe (nũndũ nĩ mũnene), iveti syonthe ikanengae aũme masyo ndaĩa, anene o na anini.

21Na ndeto ĩsu yendeesya mũsumbĩ na anene me mbee ũsumbĩnĩ; na mũsumbĩ eeka o kwĩanana na ndeto ya Memukani:

22nũndũ nĩwatwaie mavalũa ilungunĩ nene syonthe sya nthĩ sya mũsumbĩ, kĩla kĩlungu kĩnene kya nthĩ o kwĩanana na maandĩko makyo, na kĩla ũko wa andũ kũatĩĩa kĩthyomo kyaw’o, nĩ kana kĩla mũndũ amĩsumbĩke nyũmba yake mwene, na atavan’ye o kwĩanana na kĩthyomo kya andũ make.

Jump to: Chapter 2 →