Esther 9

Kamba (Mbivilia) 1956

← Chapter 8 Jump to: Chapter 10 →

1Na ĩndĩ mwei wa ĩkũmi na ĩlĩ, naw’o nĩ mwei wa Atali, mũthenya wa ĩkũmi na ĩtatũ waw’o, yĩla mwĩao wa mũsumbĩ na ũtw’ĩo wake wathengeee kwĩanĩwa, mũthenya ũla amaitha ma Ayuti meekwatasya methĩwe na ũsumbĩko ĩũlũ wamo (ĩndĩ nĩwasyokie kwĩalyũla, atĩ Ayuti maĩ na ũsumbĩko ĩũlũ wa asu mamamenaa),

2Ayuti meeyũmbanĩsya ndũanĩ syoo ilungunĩ nene syonthe sya nthĩ sya mũsumbĩ Aasuelo, mamatambũũkĩsye kw’oko asu mamanthaa kũmathĩn’ya: o na vati mũndũ waatonya kũmasiĩĩa; nũndũ kũmakĩa kwakwatie ngo syonthe sya andũ.

3Na anene onthe me mbee ũsumbĩnĩ ma ila ilungu nene sya nthĩ, na asumbĩ anini, na makavana, na ala matethasya mawĩa ma mũsumbĩ, matetheesya Ayuti; nĩkwĩthĩwa kũmũkĩa Molitekai nĩkwamakwatie.

4Nũndũ Molitekai aĩ mũnene nyũmbanĩ ya mũsumbĩ, na nguma yake yanyaĩĩka ilungunĩ nene syonthe sya nthĩ; nũndũ ũ mũndũ Molitekai nĩwaendeee kũneneva na kũneneva.

5Na Ayuti makũna amaitha moo onthe na makũna ma ũvyũ, na ũai na wanangĩko, na mameka o tondũ mendie asu mamamenaa.

6Na nyũmbanĩ nene ya ũsumbĩ ku Susani, Ayuti mooaie na kũmina andũ maana atano.

7Na Valisandatha, na Ndalivoni, na Asivatha,

8na Volatha, na Atalia, na Alitatha,

9na Valimasita, na Alisai, na Alitai, na Vaisatha,

10ala ana ĩkũmi ma Amani mwana wa Ametatha, mũmaitha wa Ayuti, mamoaa; ĩndĩ mũtavo maiaaũtambũũkĩsya moko moo.

11Mũthenya ũsu ũtalo wa ala mooaĩwe nyũmbanĩ nene ya ũsumbĩ ku Susani, waetwe mbee wa mũsumbĩ.

12Na mũsumbĩ amwĩa Esita mũka, Ayuti nĩmooaie na kũmina andũ maana atano nyũmbanĩ nene ya ũsumbĩ ku Susani, na ana ĩkũmi ma Amani; na ĩndĩ mekĩte ata ũtialonĩ wa ilungu nene sya nthĩ ila ingĩ sya mũsumbĩ! Na yu vata waku nĩ mwaũ? Na nũũnengwa: kana kwenda kwaku kũngĩ nĩ kwaũ? Na ũkeekwa.

13Nĩvo ĩndĩ Esita waisye, Ethĩwa nĩwendeesya mũsumbĩ, nĩkũnenganwe kwa Ayuti ala matwĩe Susani kwĩka ũnĩ o kwĩanana na ũtw’ĩo wa ũmũnthĩ, na ala ana ĩkũmi ma Amani nĩmasũw’e ũla mũtĩnĩ mũtũlu.

14Na mũsumbĩ eeaa ũu wĩkwe: na ũtw’ĩo waumĩwe vu Susani; na masũsya ala ana ĩkũmi ma Amani.

15Na Ayuti ala maĩ Susani moombana ĩngĩ mũthenya wa ĩkũmi na ĩna wa mwei wa Atali, na mooaĩa andũ maana atatũ vu Susani; ĩndĩ mũtavo maiaaũtambũũkĩsya moko moo.

16Na Ayuti ala angĩ ala maĩ ilungunĩ nene sya nthĩ sya mũsumbĩ moombana, na meeyĩũngamĩa mathayũ moo, na mathũmũa kuma amaithanĩ moo, na mamoaa ala mamamenaa ngili mĩongo mũonza na itano; ĩndĩ mũtavo maiaaũtambũũkĩsya moko moo.

17Ũu weekiwe mũthenya wa ĩkũmi na ĩtatũ wa mwei wa Atali; na mũthenya wa ĩkũmi na ĩna waw’o mathũmũa, na mootw’a mũthenya wa mboka na wa mũyo.

18Ĩndĩ Ayuti ala maĩ Susani moombana mũthenya wa ĩkũmi na ĩtatũ waw’o, na wa ĩkũmi na ĩna waw’o; na mũthenya wa ĩkũmi na ĩtano waw’o mathũmũa, na mootw’a mũthenya wa mboka na mũyo.

19Kwondũ wa ũu Ayuti ma mĩsyĩ, ala matwĩe tũtũla tũte twake na maũvai, matw’a mũthenya wa ĩkũmi na ĩna wa mwei wa Atali mũthenya wa mũyo na mboka, na mũthenya mũseo, na wa kũtwaanĩaa syĩndũ ũmwe na ũla ũngĩ.

20Na Molitekai aandĩka maũndũ asu, na atwaa mavalũa kwa Ayuti onthe ala maĩ ilungunĩ nene syonthe sya nthĩ sya mũsumbĩ Aasuelo, kũla kũkuvĩ na kũla kũasa,

21kũmalũlũmĩlya kana masũvĩae mũthenya wa ĩkũmi na ĩna wa mwei wa Atali, na mũthenya wa ĩkũmi na ĩtano waw’o, kĩla mwaka,

22o mĩthenya ĩsu ĩla Ayuti mathũmũie kuma amaithanĩ moo, na mwei ũla wamaalyũkĩle kuma woonĩ kũlika mũyonĩ, na kuma woonĩ mũnene kũlika mũthenya mũseo; nĩ kana mamĩtw’e mĩthenya ya mboka na ya mũyo, na ya kũtwaanĩaa syĩndũ ũmwe na ũla ũngĩ, na mĩthĩnzĩo kwa ngya.

23Na Ayuti meetĩkĩla kwĩka ũndũ mambĩlĩlye, na tondũ Molitekai wamaandĩkĩe;

24nĩkwĩthĩwa Amani mwana wa Ametatha Mũakaki, mũmaitha wa Ayuti onthe, asilĩte ĩũlũ wa Ayuti amanange, na akĩkya Vuli, naw’o nĩ kũlimana, nĩ kana amamine, na kwananga;

25ĩndĩ yĩla ũvoo wavikie vala ve mũsumbĩ, eeaa na mavalũa kana ũsũanĩo ũsu mũthũku, ũla wasũanĩĩe Ayuti, ũsyoke ĩũlũ wa mũtwe wake mwene, na kana we na ana make masũw’e mũtĩnĩ mũtũlu.

26Kwondũ wa ũu meeta mĩthenya ĩsu Vulimu, kũatĩĩa syĩtwa ya Vuli. Na ĩndĩ kwondũ wa ndeto syonthe sya valũa ũsu, na ũndũ ũla monete kwondũ wa ũndũ ũsu, na ũndũ wamakĩtĩkie,

27Ayuti meeaa, na kwĩyaĩkya ene, na ĩũlũ wa ũsyao woo, na ĩũlũ wa onthe ala meevulanĩtye namo, nĩ kana ũndũ ũsu ndũkaathele, kana makasũvĩaa mĩthenya ĩsu ĩlĩ kwĩanana na ũandĩko wayo, na kwĩanana na kũtw’ĩwa ĩvinda yayo, kĩla mwaka;

28na kana mĩthenya ĩsu ĩkalilikanawe na kũsũvĩawa kĩla nzyawanĩ, na kĩla mũvĩa, na kĩla kĩlungu kĩnene kya nthĩ, na kĩla ndũa; na nĩ kana mĩthenya ĩsu ya Vulimu ndĩkaathele kuma katĩ wa Ayuti, o na ũlilikano wayo ndũkaaae kuma ũsyaonĩ woo.

29Nĩvo ĩndĩ Esita mũka wa mũsumbĩ, mwĩĩtu wa Aviaili, na Molitekai Mũyuti, maandĩkie na ũkũmũ w’onthe malũlũmĩlye valũa ũsu wa kelĩ wa Vulimu.

30Na atwaa mavalũa kwa Ayuti onthe ilungunĩ nene sya nthĩ ĩana na mĩongo ĩlĩ na mũonza sya ũsumbĩ wa Aasuelo, na ndeto sya mũuo na sya w’o,

31malũlũmĩlye mĩthenya ĩsu ya Vulimu mavindanĩ mayo ala maiĩtwe, kwĩanana na ũndũ Molitekai Mũyuti na Esita mũka wa mũsumbĩ mameaĩe, na ũndũ meetw’ĩĩe ene na ũsyao woo, ũvoonĩ wa kũtĩĩa kũya na kũĩa kwoo.

32Na mwĩao wa Esita walũlũmĩlya maũndũ asu ma Vulimu; na waandĩkwa yĩla ĩvukunĩ.

← Chapter 8 Jump to: Chapter 10 →