Esther 3

Kamba (Mbivilia) 1956

← Chapter 2 Jump to: Chapter 4 →

1Ĩtina wa maũndũ asu mũsumbĩ Aasuelo amũnenevya Amani mwana wa Ametatha Mũakaki, na amũkĩlya, na aia kĩvĩla kyake ĩũlũ wa anene onthe me mbee ũsumbĩnĩ ala maĩ nake.

2Na athũkũmi onthe ma mũsumbĩ, ala maĩ mbingĩlonĩ kwa mũsumbĩ, makunama, na kũmwĩkunamĩsya Amani vyũ; nũndũ mũsumbĩ nĩweaĩte ũu ũndũ wake. Ĩndĩ Molitekai ndaakunama, o na kũmwĩkunamĩsya.

3Nĩvo ĩndĩ athũkũmi ma mũsumbĩ, ala maĩ mbingĩlonĩ kwa mũsumbĩ, makũlilye Molitekai, Nĩkĩ ũũtũla mwĩao wa mũsumbĩ?

4Na ĩndĩ kweethĩwa, makĩneena nake mũthenya na mũthenya, nake ndaamethukĩĩsya, mamũtavya Amani, masisye ethĩwa maũndũ ma Molitekai makaũngama: nũndũ amatavĩtye kana nĩ Mũyuti.

5Na yĩla Amani wonie kana Molitekai ndaakunama, o na kũmwĩkunamĩsya, nĩvo ĩndĩ Amani wausũiwe nĩ ũthilĩku.

6Ĩndĩ asũanĩa ndwĩanĩa kũmũkwata Molitekai e weka; nũndũ nĩmamũmanyĩthĩtye ũko wa andũ wa Molitekai: kwondũ wa ũu Amani amantha kũmananga Ayuti onthe ala maĩ ũsumbĩnĩ w’onthe wa Aasuelo, o ũko wa andũ wa Molitekai.

7Mwei wa mbee, naw’o nĩ mwei wa Nisani, mwaka wa ĩkũmi na ĩlĩ wa kũsumbĩka kwa mũsumbĩ Aasuelo, mekya Vuli, naw’o nĩ kũlimana, vu mbee wa Amani mũthenya na mũthenya, na mwei na mwei, kũvika mwei wa ĩkũmi na ĩlĩ, naw’o nĩ mwei wa Atali.

8Na Amani amwĩa mũsumbĩ Aasuelo, Ve ũko ũmwe wa andũ ũnyaĩĩkĩe kũũ na kũũ katĩ wa ngo sya andũ ilungunĩ nene sya nthĩ sya ũsumbĩ waku; na mĩao yoo ĩ kĩvathũkan’yo na ya kĩla ũko wa andũ; o na maikwataa mĩao ya mũsumbĩ: kwondũ wa ũu kũti ũuno kwa mũsumbĩ kũmaeka mekale.

9Ethĩwa nĩkwendeesya mũsumbĩ, nĩkũandĩkwe nĩ kana manangwe: nakwa ngaĩva talendi ngili ĩkũmi sya vetha mokonĩ ma asu masyaĩĩsya mawĩa ma mũsumbĩ, ietwe kũla kwiawa ũthwii kwa mũsumbĩ.

10Na mũsumbĩ aumya ngome yake kyaanĩ kyake, na amũnenga Amani mwana wa Ametatha Mũakaki, ũla mũmaitha wa Ayuti.

11Na mũsumbĩ amwĩa Amani, Ũla vetha nĩwanengwa, o na ũko wa andũ naw’o, wĩke naw’o ũndũ ũkwona wĩ ũseo.

12Nĩvo ĩndĩ aandĩki ma mũsumbĩ meetiwe mwei wa mbee, mũthenya wa ĩkũmi na ĩtatũ waw’o; na kwaandĩkiwe kwĩanana na w’onthe, ũla Amani weaĩe asumbĩ anini ma kwa mũsumbĩ, na makavana ala maĩ ĩũlũ wa kĩla kĩlungu kĩnene kya nthĩ, na anene me mbee ũsumbĩnĩ ma kĩla ũko wa andũ, kwa kĩla kĩlungu kĩnene kya nthĩ kwĩanana na maandĩko makyo, na kĩla ũko wa andũ kũatĩĩa kĩthyomo kyaw’o; kwaandĩkwa syĩtwanĩ ya mũsumbĩ Aasuelo, na kũsiĩlwa na ngome ya mũsumbĩ.

13Na mavalũa matwawa nĩ atwai ma mavalũa ilungunĩ nene syonthe sya nthĩ sya mũsumbĩ, mamanange, na kũmoaa, na kũmamina, Ayuti onthe, o ma mũika na ala akũũ, syana nini na aka, mũthenya ũmwe, o mũthenya wa ĩkũmi na ĩtatũ wa mwei wa ĩkũmi na ĩlĩ, naw’o nĩ mwei wa Atali, na makyosa syĩndũ syoo syĩthĩwe mũtavo.

14Na wumĩĩsyo wa ũla ũandĩko, nĩ kana ũtw’ĩo ũnyaĩĩkwe kĩla kĩlungu kĩnene kya nthĩ, watavaniw’e kwa ngo syonthe sya andũ, nĩ kana meĩthĩwa meyũmbanĩtye mũthenya ũsu.

15Atwai ma mavalũa mathi mekalaatĩte nũndũ wa mwĩao wa mũsumbĩ, na ũtw’ĩo watavaniw’e nyũmbanĩ nene ya ũsumbĩ ku Susani. Na mũsumbĩ na Amani mekala nthĩ manyw’e; ĩndĩ ndũa ya Susani yasũanĩwa.

← Chapter 2 Jump to: Chapter 4 →