Esther 2

Kamba (Mbivilia) 1956

← Chapter 1 Jump to: Chapter 3 →

1Ĩtina wa maũndũ asu, yĩla ũthilĩku wa mũsumbĩ Aasuelo wauisye, amũlilikana Vasiti, na ũndũ wekie, na ũndũ watw’ĩĩwe.

2Nĩvo ĩndĩ athũkũmi ma mũsumbĩ ala mamũthũkũmaa mamwĩie, Nĩkũmanthwe eĩtu ma mũika atheu na aseo kwondũ wa mũsumbĩ:

3na mũsumbĩ naie anene ilungunĩ nene syonthe sya nthĩ sya ũsumbĩ wake, nĩ kana mombanĩsye eĩtu onthe ma mũika atheu na aseo nyũmbanĩ nene ya ũsumbĩ ku Susani, nyũmbanĩ ya aka, ũsũvĩonĩ kwa Ekai, mũvakũe wa kwa mũsumbĩ, ũla ũsũvĩaa aka; na manengwe syĩndũ syoo kwondũ wa kwĩthesya;

4na mwĩĩtu ũla wĩendeesya mũsumbĩ natw’ĩke mũka wa mũsumbĩ vandũ va Vasiti. Na ũndũ ũsu wendeesya mũsumbĩ; na eeka ũu.

5Na kwaĩ Mũyuti ũmwe nyũmbanĩ ya ũsumbĩ ku Susani, ũla wetawa Molitekai, mwana wa Yaili, mwana wa Simei, mwana wa Kisu, Mũmbenyamini,

6ũla watwaĩtwe kuma Yelusaleme na ala matavĩtwe vamwe na Yekonĩa mũsumbĩ wa Yuta, ũla Nevukatilesa mũsumbĩ wa Mbaviloni wamũtwaie.

7Nake amũea Atasisa, nake nĩ Esita, mwĩĩtu wa mwendw’aĩthe: nũndũ ndaĩ na ĩthe o na nyinyia, na mwĩĩtu ũsu aĩ mwanake na mũseo; na yĩla ĩthe na nyinyia makwie, Molitekai amwosa ethĩwe mwĩĩtu wake mwene.

8Na kweethĩwa, yĩla mwĩao wa mũsumbĩ na ũtw’ĩo wake weew’ĩkie, na eĩtu aingĩ moombanĩw’a nyũmbanĩ nene ya ũsumbĩ ku Susani, ũsũvĩonĩ kwa Ekai, Esita atwawa nyũmbanĩ ya mũsumbĩ, ku ũsũvĩonĩ kwa Ekai, mũsũvĩi wa aka.

9Na ũla mwĩĩtu amwendeesya, na oona ũseo kwake; na amũnenga na mĩtũkĩ syĩndũ syake kwondũ wa kwĩthesya, vamwe na malĩu make, na anengwa eĩtu mũonza ala maĩle ũnengwa kuma nyũmbanĩ ya mũsumbĩ: na amũthamĩĩsya e na eĩtu make vandũ vala vaseo mbee nyũmbanĩ ya aka.

10Esita ndaamanyĩthan’ya andũ make kana ũko wake; nũndũ Molitekai nĩwamwĩaĩĩte kana ndakaamanyĩthan’ye.

11Na Molitekai nĩwangangaa kĩla mũthenya mbee wa nza ya nyũmba ya aka, amanye ũndũ Esita ũilyĩ, na ũndũ wĩmũtw’ĩkĩkĩa.

12Na ĩndĩ yĩla kyathĩ kyavikie kya kĩla mwĩĩtu kũenda kwa mũsumbĩ Aasuelo, ĩtina wa kwĩkĩwa kwake kwĩanana na mwĩao wa aka myei ĩkũmi na ĩlĩ (nũndũ ũu waĩ wĩanĩsyo wa kwĩthesya kwoo, atĩĩ, myei thanthatũ ya mauta ma manemane, na myei thanthatũ ya syĩndũ syĩ mũuke mũseo vamwe na syĩndũ sya kwĩthesya sya aka),

13nĩvo ĩndĩ kĩla mwĩĩtu waendie kwa mũsumbĩ kũatĩĩa maũndũ aa: kĩla wendaa nĩwanengiwe kũthi nakyo kuma nyũmbanĩ ya aka kũvika nyũmbanĩ ya mũsumbĩ.

14Athi wĩoo, na kĩoko auma athi nyũmbanĩ ya kelĩ ya aka, ũsũvĩonĩ kwa Saasikasi, mũvakũe wa kwa mũsumbĩ, ũla wasũvĩaa aka ngombo: ndaalika kwa mũsumbĩ ĩngĩ, ate o mũsumbĩ nĩwendeew’e nĩwe, na eetwa na syĩtwa.

15Na ĩndĩ yĩla kyathĩ kya Esita kyavikie kya kũthi kwa mũsumbĩ, mwĩĩtu wa Aviaili mwendw’a‐ĩthe wa Molitekai, ũla wamwosete ethĩwe mwĩĩtu wake, ndaaenda kĩndũ o na kĩva no kĩla Ekai mũvakũe wa kwa mũsumbĩ, mũsũvĩi wa aka, watw’ĩte. Na Esita oona ũseo methonĩ ma onthe ala mamũsyaĩĩsye.

16Na ĩndĩ Esita atwawa kwa mũsumbĩ Aasuelo nyũmbanĩ yake ya kĩũsumbĩ mwei wa ĩkũmi, naw’o nĩ mwei wa Tevethi, mwaka wa mũonza wa kũsumbĩka kwake.

17Na mũsumbĩ endie Esita kwĩ aka ala angĩ onthe, na oona waĩlu na ũseo methonĩ make kwĩ eĩtu atheu ala angĩ onthe; kwondũ wa ũu amwĩkĩa ngovia ya kĩũsumbĩ mũtwenĩ wake, na amũtw’a mũka wa mũsumbĩ vandũ va Vasiti.

18Nĩvo ĩndĩ mũsumbĩ wamavokee anene make onthe me mbee ũsumbĩnĩ na athũkũmi make mboka nene, nayo nĩ mboka ya Esita; na athũmũsya ilungu nene sya nthĩ koti, na anengane mĩthĩnzĩo, kwĩanana na ũlau wa mũsumbĩ.

19Na yĩla eĩtu asu atheu moombaniw’e ĩvinda ya kelĩ, nĩvo Molitekai wekalile nthĩ mbingĩlonĩ kwa mũsumbĩ.

20Esita ndaĩ anamba kũmanyĩthan’ya ũko wake kana andũ make; o tondũ Molitekai wamwĩaĩĩte: nũndũ Esita eekĩte o tondũ Molitekai wamwĩaĩaa, o ta yĩla waeiwe nĩwe.

21Mĩthenya ĩsu, yĩla Molitekai wekalaa nthĩ mbingĩlonĩ kwa mũsumbĩ, avakũe elĩ ma kwa mũsumbĩ, Mbikithana na Telesi, ma asu ala masũvĩaa myalyonĩ, mathilĩka, na mamantha kũmũkwata mũsumbĩ Aasuelo.

22Na ũndũ ũsu wamanyĩka nĩ Molitekai, ũla nake wamwonisye Esita mũka wa mũsumbĩ; na Esita atavya mũsumbĩ ũndũ ũsu syĩtwanĩ ya Molitekai.

23Na yĩla ũndũ ũsu wakũlanganilw’e, na wooneka nĩ wa w’o, asu me elĩ masũw’a mũtĩnĩ: na waandĩkwa ĩvukunĩ ya maũndũ ma mavinda vu mbee wa mũsumbĩ.

← Chapter 1 Jump to: Chapter 3 →