Esther 5

Kamba (Mbivilia) 1956

← Chapter 4 Jump to: Chapter 6 →

1Na ĩndĩ kweethĩwa mũthenya wa katatũ, Esita eekĩa ngũa syake sya kĩũsumbĩ, na aũngama nza ya nthĩnĩ ya nyũmba ya mũsumbĩ, kwelekela nyũmba ya mũsumbĩ: na mũsumbĩ ekala kĩvĩlanĩ kyake kya kĩũsumbĩ nyũmbanĩ ya kĩũsumbĩ, kwelekela ũlikĩlo wa nyũmba.

2Na kweethĩwa, yĩla mũsumbĩ wonie Esita mũka aũngeme nza, anengwa kwona ũseo methonĩ make; na mũsumbĩ amũtambũũkĩsya Esita ndata ya thaavu ya ũsumbĩ ĩla yaĩ kw’okonĩ kwake. Na ĩndĩ Esita athengeea vakuvĩ, na akiita mũthya wa ndata ya ũsumbĩ.

3Nĩvo ĩndĩ mũsumbĩ wamũkũlilye, Wĩenda kyaũ, Esita, mũka wa mũsumbĩ? Na vata waku nĩ mwaũ? Nũkũnengwa o na ethĩwa nĩ nyunzu ya ũsumbĩ.

4Na Esita amwĩa, Ethĩwa nĩkwoneka wĩ ũseo kwa mũsumbĩ, mũsumbĩ na Amani nĩmoke mũnthĩ ũũ mbokanĩ ĩla nzeũvĩtye nũndũ wake.

5Nĩvo ĩndĩ mũsumbĩ waisye, Kalaatai Amani nĩ kana kũtonye kwikwa o tondũ Esita wasya. Na ĩndĩ mũsumbĩ na Amani mooka mbokanĩ ĩla Esita waseũvĩtye.

6Na mũsumbĩ amũkũlĩlya Esita vu mbokanĩ ya mbinyu, Vata waku nĩ mwaũ? Na nũũnengwa: na wĩenda kĩ? O na ethĩwa nĩ nyunzu ya ũsumbĩ ũkeekwa.

7Nĩvo ĩndĩ Esita wasũngĩie, na amwĩa, Vata wakwa na kwenda kwakwa nĩ atĩĩ:

8Ethĩwa nĩnonete ũseo methonĩ ma mũsumbĩ, na ethĩwa nĩwendeesya mũsumbĩ kũnenga vata wakwa, na kwĩka kwenda kwakwa, mũsumbĩ na Amani nĩmoke mbokanĩ ĩla nĩmaseũvĩsya, na ngeeka ũnĩ o tondũ mũsumbĩ waĩtye.

9Nĩvo ĩndĩ Amani aumaala mũthenya ũsu e mũtanu na e na mũyo ngoonĩ: ĩndĩ yĩla Amani wonie Molitekai mbingĩlonĩ kwa mũsumbĩ, kana ndaaũngama o na kũmwathũkĩa, ausũwa nĩ ũthilĩku ĩũlũ wa Molitekai.

10Ĩndĩ Amani eesiĩĩa mwene, na enũka; na atũmana anyanyae na Nzelesi mũka wake moke.

11Na Amani amatalĩla ũnene wa mothwii make, na wingĩ wa syana syake, na maũndũ onthe ala mũsumbĩ wamũneneveesye, na ũndũ ũmwiĩte ĩũlũ wa anene me mbee ũsumbĩnĩ na athũkũmi ma mũsumbĩ.

12Na ĩngĩ Amani amea, Ĩĩ, Esita mũka wa mũsumbĩ ndanaeka mũndũ ũngĩ alike vamwe na mũsumbĩ mbokanĩ ĩla eĩseũvĩtye ĩndĩ no nyie: na ũnĩ ĩngĩ nĩnĩtĩtwe nowe vamwe na mũsumbĩ.

13Ĩndĩ ũu w’onthe kwakwa no ta mana, yĩla ngũmwona Molitekai ũla Mũyuti ekalĩte mbingĩlonĩ kwa mũsumbĩ.

14Nĩvo ĩndĩ Nzelesi mũka wake na anyanyae make onthe mamwĩie, Nĩkũseũvw’e mũtĩ ũtũlĩte mĩkono mĩongo ĩtano, na ũnĩ ũineena na mũsumbĩ nĩ kana Molitekai atonye kũsũw’a vo: na ĩndĩ ũithi ũtanĩte wĩ na mũsumbĩ mbokanĩ. Na ũndũ ũsu wendeesya Amani; na atuma mũtĩ ũseũvw’a.

← Chapter 4 Jump to: Chapter 6 →