Esther 8

Kamba (Mbivilia) 1956

← Chapter 7 Jump to: Chapter 9 →

1Mũthenya ũsu mũsumbĩ Aasuelo amũnenga Esita mũka nyũmba ya Amani, mũmaitha wa Ayuti. Na Molitekai ooka vala ve mũsumbĩ; nũndũ Esita nĩwatavanĩtye ũndũ mailen’ye.

2Na mũsumbĩ aumya ngome yake, ĩla waumĩsye Amani, na amĩnenga Molitekai. Na Esita amwĩa Molitekai ĩũlũ wa nyũmba ya Amani.

3Na Esita aneena o ĩngĩ mbee wa mũsumbĩ, na avalũka nthĩ maũũnĩ make, na amwĩsũva na methoi avete ũthũku wa Amani Mũakaki, na ũsũanĩo wake ũla wasũanĩĩe Ayuti.

4Nĩvo ĩndĩ mũsumbĩ watambũũkĩsye Esita ndata ya thaavu yake ya ũsumbĩ. Kwondũ wa ũu Esita ookĩla, na aũngama mbee wa mũsumbĩ.

5Na amwĩa, Ethiwa nĩwendeesya mũsumbĩ, na ethĩwa nĩnonete ũseo methonĩ make, na ũndũ ũkwoneka wĩ ũlũngalu vala ve mũsumbĩ, na ngĩmwendeesya methonĩ make, nĩkũandĩkwe kũalyũlwe mavalũa ala masũanĩiwe nĩ Amani, mwana wa Ametatha Mũakaki, ala waandĩkie ma kũmina Ayuti ala me ilungunĩ nene syonthe sya nthĩ sya mũsumbĩ:

6nũndũ ndonya ata kũmĩĩsya kwona ũthũku ũla wĩũka kwa andũ makwa? Kana ndonya ata kũmĩĩsya kwona wanangĩko wa ũko wakwa?

7Nĩvo ĩndĩ mũsumbĩ Aasuelo weie Esita mũka na Molitekai Mũyuti, Sisyai, nĩnĩnengete Esita nyũmba ya Amani, nake mamũsũsya mũtĩnĩ, nĩkwĩthĩwa atambũũkĩsye Ayuti kw’oko kwake amakwate.

8Na ĩngĩ andĩkĩai Ayuti o tondũ mũkwenda, syĩtwanĩ ya mũsumbĩ, na mũkyũsiĩla na ngome ya mũsumbĩ; nũndũ ũandĩko ũla ũandĩkĩtwe syĩtwanĩ ya mũsumbĩ, na kũsiĩlwa na ngome ya mũsumbĩ, vati mũndũ ũtonya ũalyũla.

9Nĩvo ĩndĩ aandĩki ma mũsumbĩ meetiwe ĩvinda yĩu, mwei wa katatũ, naw’o nĩ mwei wa Sivani, mũthenya wa mĩongo ĩlĩ na ĩtatũ waw’o; na kwaandĩkĩtwe kwĩanana na w’onthe ũla Molitekai weaĩĩte Ayuti, na asumbĩ anini, na makavana na anene me mbee ũsumbĩnĩ ma ilungu nene sya nthĩ ila syĩkuma India kũvika Ethiovia, ilungu nene sya nthĩ ĩana na mĩongo ĩlĩ na mũonza, kwa kĩla kĩlungu kĩnene kya nthĩ kwĩanana na ũandĩko wakyo, na kwa kĩla ũko wa andũ kũatĩĩa kĩthyomo kyaw’o, na kwa Ayuti kwĩanana na ũandĩko woo, na kũatĩĩa kĩthyomo kyoo.

10Na aandĩka syĩtwanĩ ya mũsumbĩ Aasuelo, na oosĩĩla na ngome ya mũsumbĩ, na atwaa mavalũa na atwai ma mavalũa matũlĩte mbalasi, matũlĩte mbalasi syĩ maũũ ila syekalaa ũthũkũminĩ wa mũsumbĩ, isyaĩtwe mbalasinĩ sya ũsumbĩ:

11ala nthĩnĩ wamo mũsumbĩ amanenga Ayuti ala maĩ kĩla ndũa ũthei wa kũmbana, na kwĩyĩũngamĩa mathayũ moo, manange, na kũaa, na kũtuma waa, ũtonyi w’onthe wa andũ na wa kĩlungu kĩnene kya nthĩ ũla wĩenda kũmavithũkĩa, anini moo na iveti, na kũkwata syĩndũ syoo syĩthĩwe mũtavo,

12o mũthenya ũmwe ilungunĩ nene syonthe sya nthĩ sya mũsumbĩ Aasuelo, naw’o nĩ mũthenya wa ĩkũmi na ĩtatũ wa mwei wa ĩkũmi na ĩlĩ, naw’o nĩ mwei wa Atali.

13Wumĩĩsyo wa ũandĩko, nĩ kana ũtw’ĩo ũtavanw’e kĩla kĩlungu kĩnene kya nthĩ, wanyaĩĩkw’a kwa ngo syonthe sya andũ, na kana Ayuti methĩwe meyũmbanĩtye mũthenya ũsu kwĩĩvanĩsya ene amaithanĩ moo.

14Kwondũ wa ũu atwai ma mavalũa ala matũlĩte mbalasi syĩ maũũ ila syekalaa ũthũkũminĩ wa mũsumbĩ mathi, makalaatĩtwe na kũkũlũswa nĩ mwĩao wa mũsumbĩ; na ũtw’ĩo waumĩwe nyũmbanĩ nene ya ũsumbĩ ku Susani.

15Na Molitekai aumaala kuma vala mũsumbĩ waĩ ekĩe ngũa ya kĩũsumbĩ ya vuluu na nzaũ, na e na ngovia nene ya ũsumbĩ ya thaavu, na e na kĩtonyeo kĩseo kya katane kĩilyĩ ta kĩtune: na ndũa ya Susani yookĩlya wasya na yaĩ na mũyo.

16Ayuti maĩ na kyeni na mũyo, na ũtanu na ndaĩa.

17Na kĩla kĩlungu kĩnene kya nthĩ, na kĩla ndũa, o vala mwĩao wa mũsumbĩ na ũtw’ĩo wake wavikie, Ayuti maĩ na mũyo na ũtanu, na mboka na mũthenya mũseo. Na aingĩ kuma katĩ wa ngo sya andũ sya ĩ nthĩ matw’ĩka Ayuti; nũndũ kũkĩa Ayuti nĩkwamakwatie.

← Chapter 7 Jump to: Chapter 9 →