Esther 6

Kamba (Mbivilia) 1956

← Chapter 5 Jump to: Chapter 7 →

1Ũtukũ ũsu mũsumbĩ ndaatonya kũkoma; nake eeaa mavuku ma molilikan’yo ma mavinda maetwe, na makĩsomewa vu mbee wa mũsumbĩ.

2Na vooneka vaandĩkĩtwe, kana Molitekai nĩwatavanisye ũvoo wa Mbikithana na Telesi, avakũe elĩ ma kwa mũsumbĩ, asu masũvĩaa myalyonĩ, ala mamanthaa kũmũkwata mũsumbĩ Aasuelo.

3Na mũsumbĩ akũlya, Nĩ ndaĩa na ũnene mwaũ ila inengetwe Molitekai nũndũ wa ũndũ ũũ? Nĩvo ĩndĩ athũkũmi ma mũsumbĩ ala mamũthũkũmaa mamwĩie, Nde ũndũ waaĩkwa.

4Na mũsumbĩ akũlya, Nũũ ũla wĩ nza? Na ĩndĩ Amani aĩ anooka nza yĩ ũtee wa nyũmba ya mũsumbĩ, aneene na mũsumbĩ ũndũ wa kũsũsya Molitekai ũla mũtĩnĩ ũmũseũvĩsye.

5Na athũkũmi ma mũsumbĩ mamwĩa, Sisya, Amani aũngeme nza. Na mũsumbĩ asya, Nalike nthĩnĩ.

6Na ĩndĩ Amani alika nthĩnĩ. Na mũsumbĩ amũkũlya, Kwĩĩkĩka ata kwa mũndũ ũla mũsumbĩ wendeew’e nĩ kũmũtaĩa? Na ĩndĩ Amani asya ngoonĩ yake, Nĩ kwaũ ũla mũsumbĩ wendeew’e nĩ kũmũtaĩa mũno kwĩ nyie mwene?

7Na Amani amwĩa mũsumbĩ, Nũndũ wa mũndũ ũla mũsumbĩ wendeew’e nĩ kũtaĩa,

8ngũa ya kĩũsumbĩ ĩetwe ĩla mũsumbĩ wakothaa kwĩkĩa, na mbalasi ĩla mũsumbĩ ũtũlaa ĩũlũ, ĩla mũtwenĩ wayo yĩkĩawa ngovia ya kĩũsumbĩ:

9na ngũa na mbalasi ninenganwe kw’okonĩ kwa ũmwe wa ala anene ma mũsumbĩ me mbee ũsumbĩnĩ, ũla wĩ ndaĩa mbee, nĩ kana mamĩkĩe mũndũ ũla mũsumbĩ ũnũkwendeew’a nĩ kũtaĩa, na kũmũtũlya mbalasinĩ akinyĩlw’e nzĩanĩ nene ya ĩ ndũa, na kũtavan’ya e mbee wake, Ũũ nĩw’o wĩĩkwa mũndũ ũla mũsumbĩ wĩendeew’a nĩ kũtaĩa.

10Nĩvo indĩ mũsumbĩ wamwĩie Amani, Ĩkalaate, na ũyosa ngũa na mbalasi, o tondũ wasya na ũyĩka o ta ũu na Molitekai Mũyuti, ũla wĩkalaa mbingĩlonĩ kwa mũsumbĩ: kũtikatiale ũndũ wa onthe ala ũneenete.

11Nĩvo ĩndĩ Amani wosie ĩ ngũa na mbalasi, na eekĩa Molitekai, na amũtũlya akinyĩlw’e nzĩanĩ nene ya ĩ ndũa, na atavan’ya e mbee wake, Ũũ nĩw’o wĩĩkwa mũndũ ũla mũsumbĩ wĩendeew’a nĩ kũtaĩa.

12Na Molitekai ooka ĩngĩ mbingĩlonĩ kwa mũsumbĩ. Ĩndĩ Amani eekalaata athi nyũmbanĩ kwake, akĩw’a woo mũnene na avw’ĩkĩte mũtwe wake.

13Na Amani atalĩla Nzelesi mũka wake na anyanyae make onthe kĩla ũndũ ũla wamũkĩtĩkĩa. Nĩvo ĩndĩ andũ oĩ make na Nzelesi mũka wake mamwĩie, Ethĩwa Molitekai, ũla wambĩlĩlya kũvalũka mbee wake, nĩ wa mbaĩ ya Ayuti, we ndũkamũtonya, ĩndĩ vate ndĩi ũkavalũkaa mbee wake.

14Na makĩneenanga nake, kwooka avakũe ma kwa mũsumbĩ, na mekalaata kũmũtwaa Amani mbokanĩ ĩla waseũvĩtye.

← Chapter 5 Jump to: Chapter 7 →