Esther 4

Kamba (Mbivilia) 1956

← Chapter 3 Jump to: Chapter 5 →

1Na ĩndĩ yĩla Molitekai wamanyie w’onthe ũla wĩkĩtwe, Molitekai atembũanga ngũa syake, na eekĩa makunia na kwĩyũmba mũu, na aenda na ku ndũani katĩ, na akaya na wasya mũtũlu na kĩĩo kĩ woo;

2na ooka o vu mbee wa mbingĩlo ya kwa mũsumbĩ: nũndũ vatyaĩ ũtonya kũlika mbingĩlonĩ kwa mũsumbĩ ekĩe makunia.

3Na kĩla kĩlungu kĩnene kya nthĩ, o vala mwĩao wa mũsumbĩ na ũtw’ĩo wake wavikie, kwaĩ woo mũnene katĩ wa Ayuti, na kũtĩĩa kũya, na kũĩa, na kũmeta; na aingĩ makoma makunianĩ na mũunĩ.

4Na eĩtu athũkũmi ma Esita na avakũe ma kwake mooka na mamũtavya; na mũka wa mũsumbĩ eew’a woo mũnene mũno: na anengane ngũa ĩkekĩwe Molitekai, na kũmumya makunia make; ĩndĩ ndaamyosa.

5Nĩvo ĩndĩ Esita wetie Athaki, ũmwe wa avakũe ma kwa mũsumbĩ, ũla wamwiĩte amũthũkũmae, na amwĩaĩa aende vala ve Molitekai, akamanye ũu nata, na kĩtumi nĩ kyaũ.

6Na ĩndĩ Athaki aenda vala ve Molitekai vala vandũ vathanthau va ndũa, vu vala ve mbingĩlo ya kwa mũsumbĩ.

7Na Molitekai amũtavya w’onthe ũla ũmũkĩtĩkĩe, na ũtalo wa w’o wa mbesa ila Amani wathanĩte kũnengane kũla kwiawa ũthwii wa mũsumbĩ nũndũ wa Ayuti, amamine.

8Na ĩndĩ amũnenga wumĩĩsyo wa ũandĩko wa ũla ũtw’ĩo ũla watavaniw’e vu Susani wa kũmamina, awon’ye Esita, na kũmũvuanĩsya, na kũmũtavya aende kwa mũsumbĩ, na kũmũvoya, na kũmwĩsũva, nũndũ wa andũ make.

9Na Athaki ooka na atavya Esita ndeto sya Molitekai.

10Nĩvo ĩndĩ Esita waneenie na Athaki, na amũnenga ũtũmane wa Molitekai, akĩmwĩa:

11Athũkũmi onthe ma mũsumbĩ, na andũ ma ilungu nene sya nthĩ sya mũsumbĩ, nĩmeũmanya, mũndũ o na wĩva, ethĩwa nĩ mũndũ mũũme kana mũndũ mũka, wĩũka alike kwa mũsumbĩ kũvika nza ya nthĩnĩ, ate mwĩte, ve mwĩao ũmwe kwake, kana akooawa, ate o ala mũsumbĩ wĩmatambũũkĩsya ĩla ndata ya thaavu ya ũsumbĩ, nĩ kana atonye kwĩkala thayũ: ĩndĩ nyie ndineeĩtwa nĩlike kwa mũsumbĩ mĩthenya ĩno mĩongo ĩtatũ.

12Na matavya Molitekai ndeto sya Esita.

13Nĩvo ĩndĩ Molitekai wameaĩe mamũtũngĩe Esita ũsũngĩo, Ndũkeesũanĩĩe mwene kana ũkavĩtĩa nyũmbanĩ ya mũsumbĩ, kwĩ Ayuti onthe.

14Nũndũ ethĩwa ũkavindya ki ĩvinda yĩĩ, nĩvo ĩndĩ ũthasyo na ũvonokyo ũkookĩla kwa Ayuti kuma vandũ vangĩ, ĩndĩ we na nyũmba ya au mũkaaa: na nũũ wĩsĩ kana ndwaalika ũsumbĩnĩ nũndũ wa ĩvinda ta yĩĩ?

15Nĩvo ĩndĩ Esita wameaĩe mamũtũngĩe Molitekai ũsũngĩo,

16Enda, ũmban’ye Ayuti onthe ala me Susani, na mũitĩĩa kũya nũndũ wakwa, o na mũikaye o na mũikanyw’e mĩthenya ĩtatũ, ũtukũ kana mũthenya: nyie nakwa na eĩtu athũkũmi makwa tũkatĩĩa kũya o ta ũu; na ĩndĩ ngaenda vala ve mũsumbĩ, o na kau ti kwĩanana na mwĩao: na ethĩwa nĩngwaa, nongwaa.

17Na ĩndĩ Molitekai eeyĩendea, na eeka kwĩanana na w’onthe ũla Esita wamwĩaĩe.

← Chapter 3 Jump to: Chapter 5 →