Song of Solomon 1

Kamba (Mbivilia) 1956

Jump to: Chapter 2 →

1Wathi wa mbathi, ũla wa Solomoni.

2We namumunye nyie na momumunyo ma kanyw’a wake: Nũndũ wendo waku wĩ kavaa kwĩ mbinyu.

3Mauta maku me mũuke mũseo; Syĩtwa yaku nĩ ta mauta metĩkye; Kwondũ wa ũu eĩtu atheu nĩmakwendaa.

4Ngusya; naitũ nĩtũũkũvikĩla tũsembete: Mũsumbĩ nĩwandetie tũsũmbanĩ twake; Tũkatana na kũkwĩw’ĩa mũyo; Tũkaweta wendo waku kũte mbinyu: Nĩmakwendaa na w’o.

5Nyie nĩ mwiũ, ĩndĩ nĩ mũmbe nesa, Inyw’ĩ eĩtu ma Yelusaleme, O ta maeema ma Ketali, O ta ngũa sya ũtũta sya Solomoni.

6Ndũkanzisye, nĩkwĩthĩwa nĩ mũtune, Nũndũ syũa nĩyĩmbĩvĩtye. Ana‐a‐ia makwa nĩmanthatĩe; Mandw’ĩte mũsũvĩi wa miũnda ya mĩsavivũ; Ĩndĩ mũũnda ũla wakwa mwene ndyaosũvĩa.

7Ndavya, we ũla ngoo yakwa yendete, Vala ũĩthasya ĩĩthya yaku ya mbũi na malondu, Vala ũtindiasya mũthenya katĩ: Nũndũ wa kĩ nĩilyĩ ta ũmwe ũla ũvw’ĩkĩte ũthyũ suka mũvũthũ Ũtee wa ĩĩthya ya mbũi na malondũ ya atindan’ya maku?

8Ethĩwa ndwĩsĩ, we ũla wĩ mwanakavu kũvĩtũka aka ala angĩ, Ĩendee umaalĩte na malata ma ndĩthya ya mbũi na malondu, Na ũiĩthya tũtenatwaku twambũi ũtee wa maeema ma aĩthi.

9Ngũvw’anen’ye, we mwendwa wakwa, Na mbalasi yĩ makasyanĩ ma Valao.

10Matau maku nĩ manake nĩ mũvĩndĩle wa nzw’ĩĩ, Ngingo yaku, na ndii syĩ na tũvila twĩ thooa mũnene.

11Tũkakũvĩndanĩsya tũkanda twa thaavu, Twĩ na ivungo sya vetha.

12Yĩla mũsumbĩ wailyĩ mesanĩ yake, Manukato makwa nĩmataavũkie mũuke wamo mũseo.

13Mwendwa wakwa kwakwa nĩ ta kakusu ka manemane, Kala kaiĩtwe katĩ wa nondo syakwa.

14Mwendwa wakwa kwakwa nĩ ta kitũngo kya malaa ma mũena Mĩũndanĩ ya mĩsavivũ ya Eni‐ngeti.

15Sisya, wĩ mwanakavu; mwendwa wakwa; Sisya, wĩ mwanakavu; Metho maku nĩ ta ma mavũĩ.

16Sisya, wĩ mwanakavu, mwendwa wakwa, ĩĩ, wa kwendeesya: O na ĩngĩ ũkomo witũ wĩ langi wĩ kĩsũnzũni.

17Mĩamba ya nyũmba yaitũ nĩ ya mĩtĩ ya mĩkũũ, Mĩtĩ ya kĩala nĩ ya mĩtĩ ya mĩsonovali.

Jump to: Chapter 2 →